9 مامىر – ۇلى جەڭىس كۇنى. ۇلكەن-كىشى, نەمەرە-شوبەرە – ءبارىمىزدىڭ جۇرەگىمىزدى تەبىرەنتەتىن ەرەكشە كۇن.
اتام نۇركەن ەسحوجين 1925 جىلى تۋعان. قاراعاندى وبلىسى نۇرا اۋداندىق اسكەري كوميسسارياتىنىڭ شاقىرتۋىمەن, 1943 جىلى 30 قاڭتاردا ءبىزدىڭ ۇيدەن, مەنىڭ اجەمنىڭ, ياعني جەڭگەسىنىڭ قولىنان اسكەرگە الىنىپ, سوعىسقا كەتەدى. لەنينگراد جانە بەلارۋس مايداندارىندا 219 پولكتىڭ اتقىش-مينومەتشىسى, كەيىن زەنيتشىسى بولادى. ودان سوڭ 312 پولكتە ۆزۆود كومانديرىنىڭ ورىنباسارى, ياعني سەرجانت دارەجەسىندە سوعىسادى.
سوعىستان 1948 جىلى امان-ەسەن قورعالجىنعا قايتا ورالىپ, ۇيلەنەدى. بالا ءسۇيىپ, سوعىس زاردابىنان جان-جاققا تاراپ كەتكەن تۋىستارىن جينايدى, قاناتىنىڭ استىنا الىپ, تاربيەلەيدى. بەيبىت ومىردە ۇلگى بولاتىنداي ءومىر ءسۇردى. اسىرەسە, تىڭ كوتەرۋ كەزەڭىندە, شارۋاشىلىقتىڭ باس اگرونومى رەتىندە تىڭ سوۆحوزى قۇرىلعاندا, ونىڭ وندىرىستىك-الەۋمەتتىك دامۋىن قامتاماسىز ەتۋگە كوپ ەڭبەك سىڭىرەدى. كوپ جىل اۋداننىڭ تۇقىم ينسپەكتسياسىن باسقارىپ, استىق ونىمدەرىنىڭ ارتۋىنا ەسەلى ۇلەس قوسادى. 1997 جىلى 28 مامىردا 72 جاسىندا دۇنيەدەن ءوتتى.
اتام بىزگە سوعىستا ماراپاتتالعان وردەندەرى مەن مەدالدارىن, سۋرەتتەرىن, حاتتارىن كورسەتىپ, قايسىسىن قاي جەردە العانىن, نە ءۇشىن بەرگەنىن ايتىپ وتىراتىن. كوپ ءسوزى جوق اتام: «وتان امان, ەل تىنىش بولسىن, سەندەر سوعىستى كورمەسەڭدەر ەكەن», دەپ تىلەك تىلەيتىن. ءبىز, نەمەرە, شوبەرەلەرى اتامىز سوعىسقا قاتىسقان باتىر, كوپتەگەن ماراپاتتارى بار دەپ ماقتاناتىنبىز. كەزىندە مەكتەپتەگى كەزدەسۋلەرگە شاقىرىپ, اڭگىمە ايتقىزاتىن. وسكىندەردى پاتريوتتىققا تاربيەلەۋدە ۇلگى-ونەگە رەتىندە كورسەتىلەتىن.
بيىل جەڭىستىڭ 70 جىلدىعىنا بايلانىستى رەسەيلىك «پودۆيگ نارودا» دەگەن ينتەرنەت سايتتان اتامنىڭ ءبىز بىلمەيتىن ەرەن ەرلىكتەرى تۋرالى وقىپ, قاتتى تەبىرەنىستە بولدىق. ول كىسى كورسەتكەن ەرەن ەرلىكتەرى ءۇشىن «قىزىل جۇلدىز», « ۇلى وتان سوعىسى» وردەندەرىمەن, 5 مەدالمەن ماراپاتتالعان. سوعىستان كەيىنگى مەرەكەلىك مەدالدار ءوز الدىنا. اتامنىڭ ناگرادالارى مەن ماراپاتقا ۇسىنىلعان قاعازدارىن وقىپ وتىرىپ, قايران اتا, وزىڭە قانداي ۇمىتىلماس ەسكەرتكىش ورناتىپ كەتكەنسىڭ دەپ ويعا شومامىن. اۋىلدان سوعىسقا 18 جاسىندا اتتانىپ, سۇراپىل شايقاستاردا اۋىر جاراقات العانىنا قاراماستان قايتادان ساپقا تۇرىپ, جاۋىپ تۇرعان وقتىڭ استىندا, ەكى كۇندە 31 جارالى جاۋىنگەردى قۇتقارىپ, ەرلىك كورسەتكەنىڭ نە دەگەن ەرجۇرەكتىك, قايتپاس قايسارلىق دەسەڭىزشى!
وتباسىلىق مۇراعاتتا, قارلىعاش تاتەدە اتامنىڭ ماراپاتتارى ساقتاۋلى. №58 قىزىل اسكەر كىتاپشاسىنا باس قولباسشىنىڭ جەتى ماراپاتتاۋ حاتى تىركەلىپتى. ەرلىگىڭ ءاردايىم ەسىمىزدە, كەلەشەك ۇرپاققا ۇلگى بولىپ جادىمىزدا جاڭعىرا بەرمەك!
ديماش ەسقوجين.
قاراعاندى وبلىسى.
