ول ەكى گازەتتىڭ مەملەكەت تۇتاستىعى مەن حالىق بىرلىگىنە قوسقان ەلەۋلى ەڭبەگىن اتاپ ءوتتى.
«العاشقى سانى جارىق كورگەننەن باستاپ قوس باسىلىم ەلىمىزدى وركەندەتۋ جانە بەرەكەلى بىرلىگىمىزدى نىعايتۋ ىسىنە ولشەۋسىز ۇلەس قوسىپ كەلەدى. قازاقتىڭ ءبىرتۋار پەرزەنتتەرى نەگىزىن قالاعان گازەتتەردە ويى ۇشقىر ءسوز زەرگەرلەرى قىزمەت ەتتى. ولار حالىقتىڭ ءسوزىن سويلەپ, ۇلت ماسەلەسىن بارىنەن بيىك قويدى», دەپ جازىلعان قۇتتىقتاۋ حاتىندا.
سونداي-اق پرەزيدەنت جۋرناليستەردىڭ باسىلىمنىڭ داڭقتى جولىن ابىرويمەن جالعاستىرىپ كەلە جاتقانىن تىلگە تيەك ەتتى.
«عاسىردان استام ۋاقىت ىشىندە بۇل اقپارات قۇرالدارى قازاق جۋرناليستيكاسىنىڭ قارا شاڭىراعىنا اينالدى. جاسامپاز ىستەردىڭ جارشىسى, وقىرمان قاۋىمنىڭ رۋحاني شامشىراعى رەتىندە تانىلدى. بۇگىندە بۇل باسىلىمداردىڭ قىزمەتكەرلەرى اعا بۋىن سالعان سارا جولدى لايىقتى جالعاستىرىپ كەلەدى. سىزدەر ۇلتتىڭ جاڭا ساپاسىن قالىپتاستىرۋ جولىندا قاجىرلى ەڭبەك ەتىپ جۇرسىزدەر.
الداعى ۋاقىتتا دا شىنايى اقپارات پەن ساپالى ساراپتامانى باسشىلىققا الىپ, ءوز مىندەتتەرىڭىزدى ابىرويمەن اتقارا بەرەسىزدەر دەپ سەنەمىن.
بارشاڭىزعا ريزاشىلىعىمدى بىلدىرەمىن جانە باق-بەرەكە, تولايىم تابىس تىلەيمىن!», دەدى قاسىم-جومارت توقاەۆ.
