مۇحتار التىنباەۆ,
سەنات دەپۋتاتى:
– قازاقستان حالقىنىڭ بىرلىگى كۇنى ەلىمىزدە كەڭىنەن اتاپ ءوتىلىپ جاتىر. بۇل مەرەكەنىڭ ءمان-ماڭىزى ەرەكشە. وسى كۇنى حالقىمىزدىڭ ىنتىماعى, تاتۋلىعى انىق كورىنەدى. بارشا قازاقستاندىقتاردىڭ وتانعا, ەلگە, جەرگە دەگەن پاتريوتتىق سەزىمىن جاڭعىرتاتىن وسىناۋ ايتۋلى مەيرامعا ەرەكشە كوڭىل ءبولىنۋى قۇپتارلىق ءىس. سەبەبى, مۇنداي جالپىحالىقتىق مەرەكە ەلدىك سانانى كوتەرۋگە, بىرلىكتى نىعايتۋعا, ۇرپاق تاربيەسىنە وڭتايلى ىقپال ەتەدى.
بيىلعى 1 مامىر مەيرامىن جۇرتىمىز وتە سالتاناتتى جاعدايدا قارسى الىپ وتىر دەپ ايتا الامىن. ويتكەنى, بۇل مەيرامعا ساناۋلى كۇندەر قالعاندا تاتۋلىعىمىزدى الەمگە تاعى ءبىر رەت پاش ەتىپ, مەملەكەتىمىزدىڭ پرەزيدەنتىن ۇيىمشىلدىقپەن سايلاپ الدىق. حالىق ءبىراۋىزدان ەلباسى نۇرسۇلتان نازارباەۆقا داۋىس بەردى. دالىرەگى, جۇرتىمىز تۇراقتىلىقتى, بەيبىتشىلىكتى, ورنىقتى دامۋدى قامتاماسىز ەتىپ كەلە جاتقان نۇرسۇلتان نازارباەۆتى قولدادى. بۇدان ءبىز حالىقتىڭ ءوز تاڭداۋىن جاساردا قاتەلەسپەگەنىن ۇعامىز. سايلاۋ بارىسىندا حالقىمىزعا ەل بىرلىگىنەن وزگە ەشتەڭە كەرەگى جوق ەكەنى تۇسىنىكتى بولدى.
وزدەرىڭىز بىلەسىزدەر, ۇستىمىزدەگى جىلدىڭ 29 ساۋىرىندە قازاقستان پرەزيدەنتىن ۇلىقتاۋ راسىمىندە مەملەكەت باسشىسى اسا ماڭىزدى ماسەلەلەر كوتەردى. ناقتىلاي ايتسام, ەلباسىنىڭ سايلاۋالدى باعدارلاماسىندا كورسەتىلگەن بەس ينستيتۋتتىق رەفورمانى جۇيەلى تۇردە جۇزەگە اسىرۋعا قاتىستى اۋقىمدى مىندەتتەر كۇن تارتىبىنە شىعارىلدى. ەندى ءبىز سولاردى ورىنداۋعا بارلىق كۇش-جىگەرىمىزدى جۇمساۋىمىز قاجەت.
روزاقۇل حالمۇرادوۆ,
ءماجىلىس دەپۋتاتى:
– بۇگىنگى شۋاقتى شاق, ياعني, قازاقستان حالقىنىڭ بىرلىگى كۇنى كوزى اشىق, كوكىرەگى وياۋ ازامات تەبىرەنبەي تۇرا الماس. بۇل مەرەكەدە مەملەكەتىمىزدىڭ مەرەيى تاسىپ, مارتەبەسى بيىكتەي تۇسەدى. ىنتىماعى جاراسقان, بەيبىتشىلىكتى تۋ ەتكەن قازاقستاننىڭ بەرىك ۇستانىمىن ايعاقتايتىن وسىناۋ مەيرامدا قۋانباۋعا, شاتتانباۋعا بولا ما؟!
تاتۋلىققا ارنالعان بيىلعى 1 مامىر مەرەكەسى بۇرىنعى جىلدارداعىدان مۇلدە وزگەشە كەلدى. وسى مەيرامنىڭ قارساڭىندا بارشا قازاقستاندىقتار ەلباسىنا دەگەن سەنىمدەرى بەرىك ەكەنىن تاعى ءبىر رەت دالەلدەدى. ناقتىسىن ايتقاندا, 26 ساۋىردە وتكەن پرەزيدەنتتىك سايلاۋدا نۇرسۇلتان نازارباەۆقا بۇرىن-سوڭدى بولماعان دەڭگەيدە داۋىس بەرىلدى. بۇل, ارينە, حالىقتىڭ ول كىسىگە دەگەن شەكسىز قۇرمەتىن, سەنىمىن بىلدىرەدى.
وسى ارادا ايتا كەتەيىن, پرەزيدەنت قازىرگى جاھاندىق سىن-قاتەرلەرگە قارسى كۇرەسۋگە, سونى ەڭسەرۋگە, 30 دامىعان مەملەكەت قاتارىنا كىرۋىمىزگە جول اشاتىن ۇلت جوسپارىن ءتۇزۋ قاجەتتىگىن العا تارتىپ وتىر. بۇل باعىتتا ناقتى جۇمىستار قازىردەن باستالىپ تا كەتتى. الداعى 10-15 جىلعا ارنالعان وسى جوسپاردى ورىنداۋ ءۇشىن تەك ۇكىمەت, مەملەكەتتىك ورگاندار عانا ەمەس, بۇكىل حالىق اتسالىسۋ كەرەك. قازىرگى تاڭدا كوميسسيا قۇرىلدى. ەندى ۇلت جوسپارى بەكىتىلسە, قازاقستاننىڭ تىنىسى اشىلا تۇسەدى. ءوزىمىزدىڭ الدىمىزعا قويعان امبيتسيالىق مىندەت – الدىڭعى قاتارلى 30 مەملەكەتتىڭ قاتارىنان كورىنسەك دەگەن تىلەگىمىز دە سونىڭ اياسىندا جۇزەگە اسادى دەپ سانايمىن. بۇل ورايدا قازاقستان حالقى اسسامبلەياسى دا قاراپ قالمايدى, ءوز ۇلەسىن قوسادى.
كامال بۇرحانوۆ,
ءماجىلىس دەپۋتاتى:
– قازاقستان حالقىنىڭ بىرلىگى كۇنى پرەزيدەنتتىڭ جارلىعى نەگىزىندە 1996 جىلدان بەرى تويلانىپ كەلەدى. جىل سايىن وسىناۋ مەرەكەنى اسىعا كۇتىپ, قۋانا قارسى الاتىن قازاقستاندىقتار بيىل دا سول داستۇرىنەن جاڭىلعان جوق. حالىق كوڭىلدى, ەرەكشە قۋانۋ ۇستىندە. نەگىزىنەن, بىرلىگى مىعىم, ىرگەسى نىق, اسپانى اشىق ەلدىڭ الەۋمەتىنە ءار كۇن مەيرام عوي. وسىنداي مەرەيلى شاقتاردان اجىرامايىق.
بارلاپ قاراساڭ, قازاقستاندىقتاردىڭ قاي مەيرامدى بولسىن شاتتانا تويلاعانى جاراسىپ تۇرادى. سەبەبى, تۇرمىسى ءتاۋىر, قوعامى تىنىش, ازاماتتارى سانالى ەلدىڭ ءجونى بولەك قوي.
جالپى, بيىلعى مەرەكەنىڭ قارساڭىندا ەلىمىزدە جاعىمدى جاڭالىقتار كوپ بولدى. ونىڭ ىشىندە پرەزيدەنتىمىزدى سايلاپ العانىمىزدى ايرىقشا اتاپ وتۋگە بولادى. سونداي-اق, قازاقستان پرەزيدەنتىن ۇلىقتاۋ راسىمىندە نۇرسۇلتان نازارباەۆتىڭ كوتەرگەن كەرەمەت باستامالارى, تۇشىمدى ۇسىنىس-پىكىرلەرى ەلدىڭ ەڭسەسىن كوتەرىپ, ءبىر سەرپىلتىپ تاستادى. اسىرەسە, ەلباسىنىڭ قوعامىمىزدى جاڭعىرتۋ ماسەلەلەرىنە قاتىستى اۋقىمدى ماسەلەلەردى كۇن تارتىبىنە شىعارۋى كوڭىل مارقايتتى. ۇلت جوسپارى تۇزىلەتىن بولدى. قازىر وسى باعىتتاعى جۇمىستار باستالىپ كەتتى. جاڭادان قۇرىلعان ۇلتتىق كوميسسيا ەلباسىنىڭ تاپسىرمالارىنا سايكەس, قوعامدىق وي-پىكىرلەر جيناقتاپ جاتىر. «ەلىمىزدى توقتاۋسىز قالاي دامىتا بەرەمىز؟» دەگەندەي سۇراققا جاۋاپ ىزدەۋ ءىسى وڭ ناتيجە بەرەدى دەپ ويلايمىن.
جامبىل احمەتبەكوۆ,
ءماجىلىس دەپۋتاتى:
– حالقىمىزدىڭ بىرلىگىنە ارنالعان 1 مامىر مەرەكەسى قۇتتى بولسىن! ەلىمىزدىڭ بەرەكەسى كىرىپ, الەۋەتى ارتىپ وتىرعانى وسى اۋىزبىرشىلىگىمىزدىڭ ارقاسى ەكەنىن تەرەڭ تۇسىنەتىن الەۋمەتكە ايتار العىسىم شەكسىز.
بيىل قازاقستاندا ماقتانىشپەن ايتار جۇمىستار جۇزەگە اسىرىلىپ جاتىر. ادالدىق ءۇشىن ايتايىن, مۇنىڭ بارلىعى پرەزيدەنتتىڭ, ونىڭ سوڭىنان ەرگەن ۇيىمشىل جۇرتىمىزدىڭ ارقاسى ەكەنى داۋسىز. دەسەك تە, الدىمىزدا تۇرعان بيىك اسۋلاردان ءوتۋ ءۇشىن ءبىز ۇنەمى ىزدەنىستە بولىپ, ۋاقىت تالابىنا ساي ارەكەت ەتۋىمىز كەرەك. وسىنى جان-دۇنيەسىمەن تۇسىنەتىن ەلباسىمىز مەملەكەتىمىزدىڭ الەۋەتىن, حالقىمىزدىڭ بەلسەندىلىگىن ەسەپكە الا وتىرىپ, كوپتەگەن مىندەتتەردى العا قويدى. مەن ونىڭ بارلىعىن قايتالاپ جاتپايىن. تەك, ءبىردى-ەكىلى جاعداياتتارعا توقتالىپ وتەيىن. قازاقستان پرەزيدەنتىن ۇلىقتاۋ شاراسىندا ەلباسى يندۋستريالاندىرۋعا نەگىزدەلگەن ەكونوميكالىق ءوسىمدى قامتاماسىز ەتۋ ماقساتىندا قۇرىلىمدىق رەفورمالاردى جۇزەگە اسىرۋ كەرەكتىگىن ءسوز ەتتى. سونداي-اق, مەملەكەت باسشىسى ءبىلىم بەرۋ مەن دەنساۋلىق ساقتاۋ سالالارىن حالىقارالىق ستاندارتتارعا ساي دامىتۋ باعدارىن ۇستانۋ قاجەتتىگىنە دە باسا نازار اۋداردى. بۇل حالىققا ۋاقىت ىرعاعىنا سايكەس قىزمەت كورسەتۋدى قامتاماسىز ەتۋدى كوزدەيدى. نەگىزىنەن, وسىنداي جالپىۇلتتىق مىندەتتى جۇزەگە اسىرۋدا باستى باعىتتاردى كورسەتەتىن بۇل رەفورمالار قازاقستاندى كوركەيتۋدىڭ كەپىلى بولاتىنىنا سەنەمىن.
سۋرەتتەردى تۇسىرگەن
ەرلان وماروۆ.
