24kz سايتى حابارلاعانداي, شاراعا ەلىمىزدىڭ ادام قۇقىعى بويىنشا كوميسسيا مۇشەلەرى مەن بىرىككەن ۇلتتار ۇيىمىنىڭ ادام قۇقىقتارى جونىندەگى ارنايى وكىلدەرى قاتىستى. حالىقارالىق قۇقىق قورعاۋشىلار قازاقستاننىڭ ازاپتاۋعا قارسى كۇرەس سالاسىنداعى جەتىستىكتەرىن اتاپ ءوتتى.
تۇرمەلەردە سوتتالعانداردى ازاپتايتىندارعا جازا قاتاڭداتىلدى. ەندى تاراپتار اراسىندا ءوزارا كەلىسىمگە كەلۋگە, شارتتى تۇردە مەرزىمىنەن بۇرىن بوساتۋعا, راقىمشىلىق جاساۋ سىندى ارەكەتتەرگە جول بەرىلمەيدى. وسىعان دەيىن 5 جىلعا دەيىن, ەگەر جابىرلەنۋشى قايتىس بولعان جاعدايدا 10 جىلعا دەيىن باس بوستاندىعىنان ايىرۋ قاراستىرىلىپ كەلسە, ەندى مەرزىم كەمى 12 جىلعا ۇزاردى. وسىلايشا, قازاقستان «نولدىك توزىمىدىلىك» قاعيداتىن قاتاڭ ۇستانادى.
«الدىمەن ازاپتاۋ ءىسىن قۇزىرەتتى مەملەكەتتىك ورگان – پروكۋراتۋرا تەرگەيدى. ەكىنشىدەن, ءارتۇرلى جابىق مەكەمەلەرگە 45 مىڭنان استام بەينەكامەرا ورناتىلدى. ۇشىنشىدەن, ەڭ باستى نارسە – تۇرمە مەديتسيناسى ىشكى ىستەر مينيسترلىگىنەن دەنساۋلىق ساقتاۋ مينيسترلىگىنە ءوتتى. 2023 جىلى ازاپتاۋ فاكتىلەرى بويىنشا ارىز شاعىمدار ەكى ەسە ازايعان. سوڭعى بەس جىلدا 165 لاۋازىمدى تۇلعا ازاپتاۋ ارەكەتى بويىنشا قىلمىستىق جاۋاپقا تارتىلعان. ونىڭ 80%-ءى باس بوستاندىعىنان ايىرىلدى», دەيدى قر ادام قۇقىقتارى جونىندەگى ۋاكىلى ارتۋر لاستاەۆ.
ەۋروپالىق قوعامدىق قۇقىق ۇيىمى دەلەگاتسياسىنىڭ باسشىسى گەورگي پاپاداتوستىڭ ايتۋىنشا, قازاقستاندا ازاپتاۋعا قارسى كۇرەس سالاسىندا جۇمىستىڭ جۇيەلى ەكەنى بايقالادى.
«تانىستىرىلىم مازمۇنى ۇنادى. ءبىز قازاقستانداعى ازاماتتىق قوعامنىڭ ينستيتۋتتارىن نىعايتۋعا تىرىسىپ جاتقانىن بىلدىك. بۇل رەفورمالار وتە ماڭىزدى. ازاپتاۋعا قارسى كۇرەس سالاسىندا جۇمىستىڭ جۇيەلى ەكەنىن كوردىك. ەلىمىزدە قىلمىستىق ارەكەتتەردىڭ الدىن الۋعا قاتىستى ۇلتتىق مەحانيزم بار. قۇرامىندا 20 وڭىردەن 105 مامان تارتىلعان. ولار قۇقىق قورعاۋشىلار, دارىگەرلەر, تاربيەشىلەر جانە الەۋمەتتىك قىزمەتكەرلەر. ازاپتاۋ فاكتىلەرىن انىقتاۋ ءۇشىن تۇرمەلەرگە بارادى. ناتيجەسىندە 3 مىڭنان اسا دەرەكتى انىقتاعان. وسىلايشا, قازاقستان قۇقىق قورعاۋ ورگاندارىنداعى ىشكى باقىلاۋدى تاعى دا كۇشەيتۋگە نيەتتى. تۇرمەلەردەگى ازاپتاۋ مەن قاتىگەزدىككە قارسى كۇرەس شارالارىن ودان ءارى جالعاستىرا بەرمەك», دەيدى ول.
«بارشاعا ادىلدىك» ۇكىمەتتىك ەمەس ۇيىمىنىڭ اتقارۋشى ديرەكتورى شاروف ازيزوۆ ادام قۇقىقتارى جونىندەگى كوميسسيا ازاپتاۋلاردىڭ الدىن الۋدا عانا ەمەس, سونداي-اق وسى قىلمىستاردى جاساعانداردى جازالاۋدا دا ادالدىق پەن جاقسى ىلگەرىلەۋشىلىك تانىتا العانىن اتاپ ءوتتى.
سونىمەن قاتار ۇلتتىق ءال-اۋقاتقا جاردەمدەسۋ قورىنىڭ ديرەكتورى ۇسەن سۇلەيمەننىڭ ايتۋىنشا, سوڭعى بىرنەشە جىلدا الەۋمەتتىك سالانىڭ, ازاماتتىق قوعامنىڭ پىكىرلەرى مەن ۇسىنىستارىنا نەگىزدەلگەن جانە حالىقارالىق كونۆەنتسيالاردى ەسكەرە وتىرىپ, كوپتەگەن زاڭدار قابىلداندى.
ء«بىز حالىقارالىق كونۆەنتسيالارعا نەگىزدەلگەن بۇل جۇمىستى جالعاستىرىپ, ودان كەيىن ورتالىق ازيادا العا جىلجىتقىمىز كەلەدى», دەيدى ول.
