اتىراۋدا قۇلاعان جاتاقحانا تۇرعىندارى جاڭا باسپاناعا يە بولدى

اتىراۋ. 18 ماۋسىم. اتىراۋدا 140 تۇرعىنى بار وتباسىلىق جاتاقحانانىڭ ءۇش قاباتى قۇلاپ, تۇرعىندارى باسپاناسىز قالعان ەدى. ابىروي بولعاندا, ەشكىم زارداپ شەككەن جوق. باسپاناسىز قالعانداردىڭ ءبىرازى كوپ ۇزاماي جاڭا پاتەرگە قونىس اۋداردى. دالىرەك ايتقاندا, ولارعا «قولجەتىمدى باسپانا-2020» مەملەكەتتىك باعدارلاماسىمەن تۇرعىزىلعان جاڭا تۇرعىن ۇيدەن پاتەر بەرىلدى. بۇل تۋرالى egemen.kz ءتىلشىسى حابارلادى. «ەلباسى نۇرسۇلتان نازارباەۆتىڭ تاپسىرماسىن ورىنداۋ ماقساتىندا وبلىستا اۋقىمدى جۇمىستار اتقارىلۋدا, –دەدى وبلىس اكىمى باقتىقوجا ىزمۇحامبەتوۆ. – سونىڭ ءبىرى – جاڭا تۇرعىن ءۇي. جاڭا باسپانادان 100 پاتەردىڭ كىلتى اتا-اناسىنىڭ قامقورلىعىنسىز قالعان بالالارعا تيەسىلى بولىپ وتىر. مۇنداي جوبا جالعاساتىن بولادى. بيىل وبلىستا 1 734 پاتەرلى 27 تۇرعىن ءۇي تاپسىرىلادى. سونىڭ ىشىندە وبلىس ورتالىعىندا 1 194 پاتەرلى 18 تۇرعىن ءۇي پايدالانۋعا بەرىلەدى. شىلدە ايىندا جاس وتباسىلارعا ارنالعان 90 پاتەرلىك ءۇيدىڭ قۇرىلىسى اياقتالادى دەپ جوسپارلانۋدا. سونداي-اق, وتكەن جىلدان باستاپ اۋدانداردا دا كوپ قاباتتى ۇيلەردىڭ قۇرىلىستارى باستالدى». جاڭا باسپاناداعى ءبىر بولمەلى پاتەرلەر اتا-اناسىنىڭ قامقورلىعىنسىز قالعان 100 جاسقا, سونىمەن بىرگە, جاقىندا قۇلاعاننان كەيىن اپاتتى دەپ تانىلعان بايمۇقانوۆ كوشەسىندەگى №39 ءۇيدىڭ 65 پاتەر يەسىنە, سونداي-اق, مۇگەدەكتەر مەن اۋعان سوعىسى ارداگەرلەرىنە بەرىلدى. «جاتاقحانامىز قۇلاعاندا دالادا قالامىز با دەگەن قاۋپى ءتوندى. وبلىس باسشىلىعى قيىن جاعدايىمىزعا تۇسىنىستىكپەن قاراپ, شۇعىل تۇردە ماسەلەنى شەشۋگە كىرىستى. بۇگىن تاعى ءبىر قولداۋدىڭ كۋاسى بولىپ وتىرمىز. شەكسىز قۋانىشتىمىز», – دەپ جاڭا پاتەرگە يە بولعان اقجامال ماحمۇتقىزى قۋانىشىن جاسىرا المادى. جولداسبەك شوپەعۇل. دەرەك: egemen.kz. سۋرەت: راحىم قويلىباەۆ.