قازاقستان مەن امەريكا قۇراما شتاتتارىنىڭ ۇكىمەتى اراسىنداعى كەلىسىمگە سايكەس, اقش الماتىدا كونسۋلدىق عيمارات سالۋ ءۇشىن جەر تەلىمىن جالعا الماق.
دەپۋتات ايگۇل قۇسپاننىڭ ايتۋىنشا, ءسوز بولىپ وتىرعان كەلىسىمگە بىلتىر 27 قىركۇيەكتە نيۋ-يوركتە قول قويىلعان.
«قاراستىرىلىپ وتىرعان كەلىسىم بىلتىر 27 قىركۇيەكتە نيۋ-يوركتە جاسالدى. كەلىسىمنىڭ ماقساتى – اقش ۇكىمەتىنە الماتى قالاسىنداعى اقش كونسۋلدىق مەكەمەسىنىڭ ءۇي-جايلارىن سالۋ جانە پايدالانۋ ءۇشىن 49 جىل مەرزىمگە اۋدانى 70 مىڭ شارشى مەتردەن اساتىن جەر ۋچاسكەسىن جالعا بەرۋ. كەلىسىمدە جەر ۋچاسكەسىن بەرۋ ءتارتىبى مەن شارتتارى ايقىندالعان. كوميتەت وسى زاڭ جوباسىن جۇمىسقا الۋعا جانە قورىتىندى دايىنداۋعا ءازىر», دەدى ءماجىلىس دەپۋتاتى ايگۇل قۇسپان.
حالىقارالىق ىستەر, قورعانىس جانە قاۋىپسىزدىك كوميتەتى زاڭ جوباسى بويىنشا قورىتىندى دايىندايدى. قۇجات كەلەسى ءماجىلىس وتىرىسىندا قارالادى.
