استانا كۇنىنە ارنالعان شارالارعا جۋرناليستەردى اككرەديتاتسيالاۋ باستالدى

استانا. 18 ماۋسىم. بيىل استانا كۇنىنە وراي «ەل جۇرەگى – استانا!» ۇرانىمەن 70 استام شارا وتەدى. بۇل تۋرالى astana.gov.kz حابارلادى. بارلىق شارالار ءبىر تاقىرىپ پەن توپتامادا بىرىكتىرىلەتىن بولادى. مەرەكەلەۋدىڭ باستى تاقىرىبى قازاق حاندىعىنىڭ 550 جىلدىعىنا, قازاقستان حالقى اسسامبلەياسىنىڭ 20 جىلدىعىنا ارنالادى. استانا قالاسىنىڭ اكىمدىگى قالا كۇنىن مەرەكەلەۋگە ارنالعان شارالاردى جاريالاۋعا باق وكىلدەرىن تىركەۋ جاريالايدى. ارنايى رۇقساتناما دايىنداۋ ءۇشىن جۋرناليستەر ءتىزىمىن ۇسىنۋ قاجەت. تىركەۋ 22 ماۋسىم ساعات 12:00-گە دەيىن جالعاسادى. ەلوردا كۇنىن رەسمي مەرەكەلەۋ 4 شىلدەدە مەملەكەتتىك تۋدى سالتاناتتى كوتەرۋ راسىمىنەن باستالادى. مەرەكەگە ورايلاستىرىلعان شارالار ءداستۇر بويىنشا سالتاناتتى وتشاشۋمەن اياقتالادى. ونى قالانىڭ بىرنەشە بولىگىنەن, اتاپ ايتقاندا ەسىل وزەنىنىڭ جاعاسىنان, «حان شاتىر» ساۋدا, ويىن-ساۋىق ورتالىعى الاڭىنان جانە ابىلاي حان داڭعىلى مەن پۋشكين كوشەسىنىڭ قيىلىسىنداعى ساياباقتان كورۋگە بولادى. تالعات رايىمبەك. دەرەك: astana.gov.kz. سۋرەت: el.kz.