ەكسپەريمەنتتە تاجىريبە كەزىندە بەيجىڭ مەن دوحا اۋەجايىنىڭ سۋرەتتەرى سپۋتنيكتەن جەرگە لازەر ارقىلى 100 گبيت/سەك جىلدامدىقپەن جىبەرىلدى. لازەر تەحنولوگياسى دەرەكتەردى راديوتولقىندار ارقىلى تاسىمالدايتىن «Starlink» جۇيەسىن باسىپ وزدى. كومپانيا ماماندارىنىڭ ايتۋىنشا, بۇل تەحنولوگيا 6G جەلىلەرىنىڭ دامۋىنا سەرپىن بەرىپ, اۋا رايىنىڭ كەز كەلگەن جاعدايىندا تۇراقتى بايلانىس ورناتا الادى. قازىرگى تاڭدا «Chang Guang» كومپانياسى 117 سپۋتنيكتى باسقارىپ وتىر. ال الداعى 3 جىلدا ولاردىڭ سانىن 300-گە جەتكىزۋ كوزدەلۋدە. بۇل جاڭالىق عارىشتىق بايلانىستىڭ بولاشاعىن مۇلدە جاڭا دەڭگەيگە كوتەرمەك.
سۋرەت ارقىلى مەكەنجايدى انىقتايدى
سۋرەتتەگى ناقتى ورىندى انىقتاپ, 3D مودەلدەر قۇرا الاتىن جاڭا نەيروجۇيە پايدا بولدى.
قازىرگى ۋاقىتتا بۇل تەحنولوگيانىڭ دەمو-نۇسقاسى سان-فرانتسيسكو ايماعىندا قولجەتىمدى. تولىق نۇسقاسىنا قول جەتكىزۋ ءۇشىن ارنايى تىزىمگە تىركەلۋ قاجەت. بۇعان دەيىن ستەنفورد ۋنيۆەرسيتەتىنىڭ زەرتتەۋشىلەرى فوتوسۋرەتتەردەگى نىسانداردىڭ ورنىن 40 شاقىرىم دالدىكپەن انىقتاپ, مەكەنجايدى 95% جاعدايدا دۇرىس انىقتايتىن PIGEON جاساندى ينتەللەكت جۇيەسىن ازىرلەگەن ەدى. ال جاڭا نەيروجۇيە ءوزىنىڭ جوعارى دالدىگىمەن ءارى 3D مودەل جاساۋ مۇمكىندىگىمەن ەرەكشەلەنەدى.
جي جۇمىس ورنىن كوبەيتەدى
جاساندى ينتەللەكت ادامنىڭ ورنىن باسىپ, ولاردى جۇمىسسىز قالدىرادى دەگەن قورقىنىش بار. الايدا دۇنيەجۇزىلىك ەكونوميكالىق فورۋمنىڭ ەسەبىنشە, كەرىسىنشە جي 2030 جىلعا قاراي 170 ميلليون جاڭا جۇمىس ورنىن اشادى ەكەن.
بۇگىندە نەيروجۇيە كەيبىر جۇمىستاردى ادامنان ارتىق ورىندايتىن دەڭگەيدە. بىراق ساراپشىلاردىڭ پىكىرىنشە جي دامىعان سايىن جۇيەنى مەڭگەرگەن قىزمەتكەرلەرگە سۇرانىس ارتا تۇسپەك. الەمدىك كومپانيالاردىڭ 77%-ى قىزمەتكەرلەرىن جاساندى ينتەللەكت جۇيەسىمەن جۇمىس ىستەۋگە ۇيرەتۋدى كوزدەپ وتىرسا, 40%-ى قىزمەتكەرلەرىن جي جۇيەسىنە الماستىرۋعا دايىن ەكەنىن اتاپ وتكەن. «OpenAI» باسشىسى سەم التماننىڭ سوزىنشە, جي ەڭبەك نارىعىنا ۇلكەن وزگەرىس اكەلەدى ءارى قوعامعا جاڭا ماماندىقتاردى ەنگىزەدى.
