يتاليانىڭ ميلان قالاسىندا ەكسپو-2015 كورمەسى اشىلدى

استانا. 2 مامىر. يتاليانىڭ ميلان قالاسىندا ەكسپو-2015 دۇنيەجۇزىلىك امبەباپ كورمەسى اشىلدى. «الەمدى تاماقتاندىرۋ. ءومىر ەنەرگياسى» دەگەن ۇرانمەن ءوتىپ جاتقان كورمە ازىق-ت ۇلىك قاۋىپسىزدىگى جانە الەمنىڭ تۇراقتى دامۋ ماسەلەلەرىن قامتيدى. بۇل تۋرالى euronews.com حابارلادى. كورمەگە الەمنىڭ 145 مەملەكەتى, حالىقارالىق ۇيىمدار جانە ونداعان ءىرى كومپانيالار قاتىسۋدا. اشىلۋ سالتاناتىندا يتاليا پرەمەر-ءمينيسترى ماتتەو رەنتسي بارشا قاتىسۋشىلاردى قۇتتىقتاپ ءسوز سويلەدى. «بولاشاق بۇگىننەن باستالادى. قازىر ءبىز ءومىر ءسۇرىپ وتىرعان الەمدە ازىق-ت ۇلىك قورى بويىنشا تەڭسىزدىكتەر انىق بايقالادى. ءبىر جەرلەردە تاماق قالدىعى تاۋ بولىپ ءۇيىلىپ جاتسا, كوپتەگەن ەلدەردە ءبىر ءتىلىم نانعا زار بولىپ وتىرعاندار بار. سونىڭ سالدارىنان ميللياردتاعان ادامنىڭ اشتىقتان قىرىلۋى جالعاسىپ جاتىر. ال كەلەسى ميلليارد ادام, كەرىسىنشە, كۇندەلىكتى استىڭ كوپتىگىنەن سەمىزدىك دەرتىنە شالدىعۋدا. سول سەبەپتى, قازىردەن باستاپ مۇنداي قاراما-قايشىلىقتاردى جويۋعا كۇش جۇمساۋىمىز كەرەك», – دەدى ماتتەو رەنتسي. ۆاتيكاننان ارنايى ۆيدەوبايلانىسقا شىققان ريم پاپاسى فرانتسيسك ەكسپو-نىڭ جاھاندىق ىنتىماقتاستىقتى نىعايتۋدا ماڭىزى زور ەكەنىن ايتتى. ميلانداعى كورمەدە 54 مەملەكەت 200 گەكتار جەرگە ۇلتتىق پاۆيلوندارىن ورنالاستىردى. ول جەرلەردە نەگىزىنەن ۇلتتىق ءداستۇردى دارىپتەيتىن ساۋدا-ساتتىق پەن اۋىل شارۋاشىلىعىنا ارنالعان دۇنيەلەر ناسيحاتتالادى. ال وزگە مەملەكەتتەر ءوز ونىمدەرىن بەلگىلى ءبىر سالالارعا عانا ارنالعان جەكەلەگەن پاۆيلوندارعا قويادى. ايتا كەتەيىك, بيىلعى ەكسپو كورمەسى وسى جىلدىڭ 31 قازانىنا دەيىن جالعاسادى. ەلامان قوڭىر. دەرەك: euronews.com. سۋرەت: eninadec.twomini.com.