لوندون ساحناسىندا قازاق تىلىندە سپەكتاكل قويىلدى

استانا. 1 مامىر. قازاقستان تاريحىندا العاش رەت ۇلىبريتانيادا قازاق تىلىندە سپەكتاكل قويىلدى. لوندون قالاسىندا ءوتىپ جاتقان قازاق مادەنيەتى فەستيۆالى اياسىندا نارتاي بەكەجانوۆ اتىنداعى قىزىلوردا مۋزىكالىق-دراما تەاترى بەلگىلى جازۋشى جانە دراماتۋرگ دۋلات يسابەكوۆتىڭ «ەسكى ۇيدەگى كەزدەسۋ» پەساسىن ساحنالادى. بۇل تۋرالى 24.kz حابارلادى. سپەكتاكل ورتا ازيا حالىقتارىنىڭ ونەرىن باعالاۋشى جەرگىلىكتى حالىقتىڭ اسا قىزىعۋشىلىعىن تۋدىردى. وسىدان ەكى جىل بۇرىن اتالعان پەسانى «ورزۋ» بريتانيالىق ورتالىق-ازيا تەاترى جەرگىلىكتى كورەرمەندەرگە اعىلشىن تىلىندە ۇسىنعان بولاتىن. ال بۇل جولى نەگىزىنەن قازاق تىلىندە وينالدى. باستى ديالوگتاردىڭ قازاقشا بولعانىنا قاراماستان, كورەرمەندەر ساحناداعى جاعدايدى ارنايى سۋبتيتر ارقىلى ءتۇسىنىپ وتىردى. لوندون ۋنيۆەرسيتەتىنىڭ ستۋدەنتى دجوردج ۋەر قازاق سپەكتاكلى جونىندە: «نەگە ەكەنىن بىلمەيمىن, باستاپقىدا قويىلىم تراگەديا جانرى بويىنشا بولاتىن شىعار دەپ ويلادىم. دەگەنمەن, العاشقى كورىنىستەن-اق بۇل كوپتەگەن سىناقتان ءوتىپ, ءبىر-بىرىنە قوسىلعان ەكى جاننىڭ ماحابباتى تۋرالى ەكەنىن ءبىلدىم. جالپى, ماعان وتە قاتتى ۇنادى», – دەپ ءوز پىكىرىن ءبىلدىردى. تاعى ءبىر كورەرمەن, مەملەكەتتىك ساياسات بويىنشا ساراپشى يندەرجيت سيح نيجحار: «اۆتور ءوز كەيىپكەرلەرىنىڭ مىنەز-قۇلقىن تاماشا اشا بىلگەن. ماعان بۇل رومانتيكالىق قويىلىم ەرەكشە ۇنادى. مەن يسابەكوۆتىڭ شىعارماشىلىعىن ايرىقشا قۇرمەتتەيتىن جانداردىڭ ءبىرىمىن. كەيبىر كىتاپتى وقىپ وتىرىپ, ونداعى جايتتى جۇرەگىڭمەن قابىلدايتىن كەزدەر بولادى. دۋلات يسابەكوۆتىڭ شىعارمالارى ءدال سونداي», – دەپ قازاق سپەكتاكلىنە جوعارى باعاسىن بەردى. ەلامان قوڭىر. دەرەك, سۋرەت: 24.kz.