بيىل دۇنيەگە كەلگەنىنە 80 جىل بولاتىن ەرەكشە تالانتتىڭ ەسىمىن حالىق جادىندا جاڭعىرتۋ جونىندە باستاما كوتەرگەن – عاريفوللا قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ باسشىسى باۋىرجان حاليوللا.
«كلاسسيكالىق جانردا, وپەرا سالاسىندا ءان ايتاتىن انشىلەر ءبىزدىڭ باتىس قازاقستان وبلىسىندا از ەمەس. وسى كوشتىڭ باسىندا قاناتقالي قوجاقوۆ, مۇرات ءامىرحانوۆ, جۇماعانىم راحيموۆا سىندى تانىمال ونەرپازدارىمىز تۇر. بيىلعى 29 ناۋرىزدا عاريفوللا قۇرمانعاليەۆ اتىنداعى وبلىستىق فيلارمونيانىڭ ۇيىمداستىرۋمەن, شامعون قاجىعاليەۆ اتىنداعى ەسترادالىق-سيمفونيالىق وركەستردىڭ سۇيەمەلدەۋىمەن «اتامەكەن» ونەر ورداسىندا «وپەراليا» اتتى كونتسەرت ۇيىمداستىرعالى وتىرمىز. بۇل ءىس-شارا لا-سكالادا ءان سالعان تۇڭعىش قازاق, ايگىلى ءانشى امانگەلدى سەمبيندى ەسكە الۋعا ارنالادى» دەيدى باۋىرجان ەرگەن ۇلى.
امانگەلدى ناقىپ ۇلى سەمبين 1945 جىلى جامبىل وبلىسىندا دۇنيەگە كەلگەن. 1971 جىلى ماسكەۋ كونسەرۆاتورياسىنىڭ ۆوكالدىق ءبولىمىن بىتىرگەن سوڭ اباي اتىنداعى قازاق اكادەميالىق وپەرا جانە بالەت تەاترىنا ورنالاستى. ەرەكشە تالانتتى ءانشى كەلگەن بەتتە ساحناعا ەۆگەني برۋسيلوۆسكيدiڭ «قىز جiبەك» وپەراسىنداعى تولەگەن پارتياسىن الىپ شىققان. ال قىز جiبەك پارتياسىن بيبiگۇل تولەگەنوۆا ورىنداعان ەكەن.
امانگەلدى سەمبيننىڭ ەسىمى 1973–1975 جىلدارى يتاليانىڭ ميلان قالاسىنداعى ايگىلى «لا سكالا» وپەرا تەاترىندا تاجىريبە جيناقتاپ, سول ونەر ورداسىندا ءان شىرقاعان تۇڭعىش قازاق رەتىندە تاريحتا قالدى. الايدا ۇلتىمىزدىڭ كلاسسيكالىق ءان ونەرىن الەمدىك دەڭگەيدە تانىتقان تاعدىرلى تۇلعانىڭ ءومىرى كۇنگەي مەن كولەڭكەگە تولى بولعان. وسىناۋ عالامات ءانشى تۋرالى كەزىندە شەرحان مۇرتازا, قالي سارسەنباي, جاناربەك ءاشىمجان سىندى قالامگەرلەر ماقالا جازدى. بىراق ناسيحاتى كەم, جاناشىرى از وسىناۋ ءانشى تۋرالى ماماندار بولماسا, جالپى كوپشىلىك بىلە بەرمەيتىنى راس.
– ءبىز بۇل كونتسەرتتە امانگەلدى سەمبيننىڭ رەپەرتۋارىنداعى كەيبىر شىعارمالاردى حالىققا قايتا ۇسىنامىز. سونىمەن بىرگە كلاسسيكالىق تۋىندىلاردى سۇيەتىن كورەرمەننىڭ تالعامىنا تاتيتىن ماعىنالى كەش بولادى دەگەن ويدامىز. وسى ارقىلى ءتىرى كەزىندە كۇنشىلدىك پەن قىزعانىشتىڭ, باقاستىق پەن كورەالماۋشىلىقتىڭ قۇربانىنا اينالعان, وتباسىندا دا باقىت قۇشاعىنا ەنە الماعان امانگەلدى اعانىڭ مەرەيلى داتاسىن, ارناۋلى جاسىن كۇتپەي-اق دارىپتەۋدى ءجون سانادىق! – دەيدى باۋىرجان حاليوللا.
باتىس قازاقستان وبلىسى
