ىنتىماقتاستىق كەلىسىمىنە قول قويىلدى

قازاقستان پارلامەنتى ءماجىلىسىنىڭ توراعاسى قابيبوللا جاقىپوۆ پەن قازاقستاندا رەسمي ساپارمەن جۇرگەن بەلارۋس ۇلتتىق جينالىسى وكىلدەر پالاتاسىنىڭ توراعاسى ۆلاديمير اندرەيچەنكو ىنتىماقتاستىق تۋرالى كەلىسىمگە قول قويدى, دەپ حابارلادى ءماجىلىستىڭ ءباسپاسوز قىزمەتى. كەزدەسۋ يەلەرىنىڭ اتاپ ءوت­كە­نىن­دەي, ەكى ەل باسشىلارى ىقپالىنىڭ ءناتي­جەسىندە قازاقستان مەن بەلا­رۋس اراسىنداعى قارىم-قاتىناس ستراتەگيالىق سيپاتقا يە بولدى. 2014 جىلدىڭ قورىتىندىسى بويىنشا ءوزارا تاۋار اينالىمى 750 ملن. دوللاردان استى. قازىرگى ۋاقىتتا كەن جانە شاحتا تەحنيكالارىن, تراكتورلاردى, استىق جانە استىق جيناۋ كومبايندارىن, باسقا دا تەحنيكالاردى قۇراستىرۋعا باعىتتالعان قازاقستان-بەلارۋس بىرلەسكەن جوبالارى جۇزەگە اسىرىلۋدا. بۇل رەتتە تاراپتار بارلىق سالادا ىنتىماقتاستىقتى ودان ءارى نىعايتۋ قاجەتتىلىگىنە توقتالدى. وسىعان وراي, جالپى ءوزارا ءتيىمدى بايلانىستى كۇشەيتۋدە قوس مەملەكەت پارلامەنتتەرىنىڭ ىقپالى زور بولماق. سوندىقتان, ءماجىلىس پەن وكىلدەر پالاتاسىنىڭ اراسىندا قول قويىلىپ وتىرعان بۇگىنگى كەلىسىم پارلامەنتارالىق قاتىناستىڭ تەرەڭدەۋىنە تىڭ سەرپىن بەرەدى. قا­بي­بوللا جاقىپوۆ: – كەلىسىم ەكىجاقتى, سونداي-اق, كوپجاقتى  پىشىمدە پارلامەنتارالىق قارىم-قاتىناستىڭ بولاشاعى ءۇشىن  ۇلكەن مۇمكىندىكتەرگە جول اشادى, بۇل ەكى مەملەكەتتىڭ يگىلىگىنە قىزمەت ەتەتىن بولادى, – دەدى. وكىلدەر پالاتاسىنىڭ توراعاسى ۆلاديمير اندرەيچەنكو ەكى مەملەكەت اراسىنداعى ءوزارا سەنىم مەن سىيلاستىققا نەگىزدەلگەن ساياسي, ديپلوماتيالىق, پارلامەنتارالىق بايلانىستىڭ بۇگىنگى كۇنى جوعارى دەڭگەيدە دامىپ كەلە جاتقانىن العا تارتا كەلىپ: – كەلىسىمگە قول قويا وتىرىپ, ءبىز ساياسات, ساۋدا-ەكونوميكالىق سالالاردا, كەلىسىم-قۇقىقتىق بازانى جەتىلدىرۋدە, ايماقتىق ىنتىماقتاستىق باعىتىندا ارىپتەستىكتى ودان ءارى تەرەڭدەتۋدى جوسپارلاپ وتىرمىز. ول ءۇشىن بارلىق جاعداي جاسالعان, – دەدى.