جەمقورلىققا قارسى كۇرەس شارالارى تالقىلاندى

كەشە اقوردادا مەملەكەتتىك حاتشى گۇلشارا ابدىقا­لىقوۆانىڭ تورايىم­دى­عىمەن وبلىستاردىڭ, استانا مەن ال­ما­تى قالالارىنىڭ جانە وڭىرلىك سىباي­لاس جەمقورلىققا قارسى كوميسسيا مۇشەلەرىنىڭ قاتىسۋىمەن ونلاين رە­جىمىندە پرەزيدەنت جانىنداعى سىباي­لاس جەمقورلىققا قارسى كۇرەس ماسە­لەلەرى جونىندەگى كوميسسيانىڭ وتىرىسى ءوتتى. وندا كۆازيمەملەكەتتىك سەك­تور­داعى, تابيعي مونوپوليالاردى رەتتەۋ جانە باسەكەلەستىكتى قور­عاۋ سالاسىنداعى سىبايلاس جەم­قور­لىققا قارسى ءىس-قيمىل بويىنشا قابىلدانىپ وتىرعان شارالار, سونىمەن قاتار, اتىراۋ جانە وڭتۇستىك قازاقستان وبلىستارىنداعى سىبايلاس جەمقورلىققا قارسى كۇرەس بويىنشا وڭىرلىك جوسپارلاردى ىسكە اسىرۋ بارىسى تالقىلاندى. جانە دە سىبايلاس جەمقورلىققا قارسى تەتىكتىڭ ءتيىمدى بولۋى ەلى­مىزدىڭ الەمنىڭ ەڭ دامىعان 30 مەملەكەتىنىڭ قاتارىنا كىرۋى بويىنشا مەملەكەتتىڭ ستراتەگيالىق تاپسىرماسىن, بەس ينستيتۋتتىق رەفورمانى ورىنداۋعا باعىتتالعان «ۇلت جوسپارى – 100 ناقتى قا­دامدى» جۇزەگە اسىرۋدىڭ بىردەن-ءبىر شارتى بولىپ تابى­لا­تىندىعى ايتىلدى. ەلباسى نۇرسۇلتان نازار­باەۆ­تىڭ وتكەن جىلعى 26 جەلتوقسانداعى جارلىعىمەن بەكىتىلگەن 2015-2025 جىلدارعا ارنالعان سىبايلاس جەمقورلىققا قارسى ستراتەگياسىندا كۆازيمەملەكەتتىك سەكتورداعى سىبايلاس جەمقورلىققا قارسى ءىس-قيمىل باسىم باعىتتاردىڭ ءبىرى بولىپ بەلگىلەنگەندىگىن اتاي وتىرىپ, مەملەكەتتىك حاتشى قولدانىستاعى ۇيىمداستىرۋشىلىق-قۇقىقتىق تە­تىكتەر وسى سەكتوردىڭ ەسەپتىلىگىن, باعىنىستىلىعىن جانە شەشىم قابىلداۋ راسىمدەرىنىڭ اشىقتىعىن قامتاماسىز ەتۋى قاجەتتىگىنە توق­تالدى. ونىڭ ايتۋى بويىنشا, بۇل كەزدەيسوق ەمەس, سەبەبى, مەم­لە­كەتتىك حولدينگتەر مەن ۇلتتىق كوم­پانيالاردىڭ ساتىپ الۋلار كولەمى بيۋدجەتتىك قۇرىلىمداردىڭ ساتىپ الۋلار كولەمىنەن اسىپ تۇسەدى. سونىمەن قاتار, تابيعي مونوپوليالاردى رەتتەۋ جانە باسەكەلەستىكتى قورعاۋ سالاسىندا سىبايلاس جەمقورلىق تۋدىراتىن تاۋاشالاردى جويۋ دا ماڭىزدى باعىتتاردىڭ ءبىرى, دەدى گۇلشارا ابدىقالىقوۆا. ول اتاپ وتكەندەي, بىرلەسكەن كۇش-جىگەرمەن وسى جەردەگى كوكەيكەستى پروبلەمالاردى شەشۋ, مۇددەلى ورگاندار مەن تابيعي مونوپوليالار سۋبەكتىلەرى قىزمەتىنىڭ, سونىڭ ىشىندە ءتاريفتى بەلگىلەۋ ماسەلەلەرىنىڭ اشىقتىعىن قامتاماسىز ەتۋ قاجەت. اتىراۋ جانە وڭتۇستىك قا­زاق­ستان وبلىستارى اكىمدەرىنىڭ جۇمىس قورىتىندىلارىن قاراۋ بارىسىندا جەرگىلىكتى اتقارۋ­شى ورگانداردىڭ نازارى بيۋدجەت قاراجاتىن جۇمساۋدى باقى­لاۋ بويىنشا پارمەندى شارالار قابىلداۋعا, حالىققا مەملە­كەت­تىك قىزمەت كورسەتۋدىڭ ەلەك­ترون­دىق ءپىشىمىن مەيلىنشە كەڭىنەن قول­دانۋعا جانە ازاماتتىق سەكتور­دىڭ مۇمكىندىكتەرىن ءتيىمدى پايدالانۋعا اۋدارىلدى. سونداي-اق, وتىرىس بارى­سىندا باس پروكۋرور اسحات داۋىل­باەۆتىڭ, مەملەكەتتىك قىزمەت ىستەرى جانە سىبايلاس جەم­قورلىققا قارسى ءىس-قيمىل اگەنت­تىگىنىڭ توراعاسى قايرات قوجام­جاروۆتىڭ, اتىراۋ وبلىسىنىڭ اكىمى باقتىقوجا ىزمۇحامبەتوۆتىڭ, وڭتۇستىك قازاقستان وبلىسىنىڭ اكىمى اسقار مىرزاحمەتوۆتىڭ جا­نە دە باسقا لاۋازىم يەلەرىنىڭ بايان­دامالارى تىڭدالىپ, جيىن قورى­تىندىسى بويىنشا كوميسسيا مەملەكەتتىك ورگاندار مەن ۇيىم­دارعا قولدانىستاعى سىبايلاس جەمقورلىققا قارسى تەتىك­تەردى جەتىلدىرۋگە بايلانىس­تى ۇسىنىمدار ازىرلەدى. ەلميرا ماتىباەۆا, «ەگەمەن قازاقستان».