اۋىل تۇرعىندارىنا ءوز ونىمدەرىن وڭدەۋگە جانە ساتۋعا مۇمكىندىك بەرەتىن ينفراقۇرىلىم قۇرۋ ماڭىزدى ەكەنىن پرەزيدەنت قاسىم-جومارت توقاەۆ بىلتىرعى جولداۋىندا اتاپ ايتتى. مەملەكەت باسشىسى بۇل ورايدا مەركى اۋدانىندا اشىلعان ورتالىق تاجىريبەسىن ۇلگى ەتكەن ەدى. بىلتىر اشىلعان «اگرو ساۋات» وقۋ-ادىستەمەلىك ورتالىعىنىڭ قىزمەتكەرلەرى از ۋاقىتتا ءبىرشاما جۇمىس اتقارعان.
جىل بۇرىن ىرگەتاسى قالانعان ورتالىق باسشىسى ايمان اقىنبەكوۆانىڭ ايتۋىنشا, «اگرو ساۋاتتىڭ» ماماندارى قارىزى بار تۇرعىنداردىڭ ماسەلەسىن شەشۋگە ىقپال ەتۋ, ولاردىڭ تابىسىن ارتتىرۋ ماقساتىندا اشىلعان ەكەن. تاجىريبەلىك داعدىلارعا ارقا سۇيەگەن ماماندار ازاماتتاردىڭ وندىرىستىك كووپەراتيۆتەرگە بىرىگۋىنە جانە تۇراقتى تۇردە تابىس تابۋىنا كومەكتەسەدى. 30 ادامعا دەيىن قامتىلعان توپتاردا بىلىكتى ساراپشى-پراكتيكتەر ءتالىم بەرەدى. ولاردىڭ قاتارىندا اگرونوم جانە زووتەحنيك سەكىلدى ماماندار بار.
ء«بىزدىڭ ورتالىقتا سكرينينگ جانە ناقتى ماماندىقتار بويىنشا پراكتيكالىق ساباقتار وتكىزۋگە ارنالعان وقۋ الاڭدارى بار. سونداي-اق تىڭداۋشىلار ءۇشىن ارنايى وقۋ-ادىستەمەلىك قۇرالدار, تەحنولوگيالىق كارتالار ازىرلەنگەن. بۇل قۇرالداردى بىلىكتى ماماندار كوپشىلىك ءۇشىن تۇسىنىكتى تىلدە جازعان. ازاماتتاردى وقىتۋ بارىسىندا قۇلپىناي, تاڭقۋراي, الما, قانت قىزىلشاسىن ءوسىرۋ, ءسۇت جانە ەت باعىتىنداعى ءىرى قارا مالدى بورداقىلاۋ, قۇس جانە قوي شارۋاشىلىعى سەكىلدى باعىتتار قامتىلادى», دەيدى ايمان اقىنبەكوۆا.
ورتالىقتا وسى كۇنگە دەيىن مەركى اۋدانىنىڭ 130-دان استام تۇرعىنى وقۋدان ءوتىپتى. كوبىنە ورتالىققا نەسيەسى بار, كەپىلگە قوياتىن مۇلكى جوق, 90 كۇننەن استام ۋاقىت بويى بەرەشەگىن وتەي الماعان ازاماتتار تابىس كوزىن ىزدەپ كەلەدى ەكەن. ءبىلىم جەتىلدىرگەننەن كەيىن تاۋارلى نەسيە راسىمدەۋگە مۇمكىندىك الادى. ماماندار تەك تاجىريبەگە ارقا سۇيەمەي, شارۋالاردى تەوريالىق باعىتتا دا وقىتادى.
«باۋىرجان ارىستانباەۆ دەگەن ازامات 2024 جىلدىڭ ءساۋىر ايىندا 20 گەكتار جەرگە قۇلپىناي وسىرەتىن قوسالقى شارۋاشىلىقتى باستادى. ول تاپقان تابىسىنىڭ 50 پايىزىن كەشىككەن نەسيەسىن جابۋعا جۇمساسا, 25 پايىزىمەن تاۋارلى نەسيەنىڭ قارىزىن تولەيدى. ارتىلعان 25 پايىز تابىسى وزىنە قالادى. جاڭا ءىس باستاۋعا نيەت ەتكەن باۋىرجانعا تاۋارلى نەسيە تۇرىندە 10 000 كوشەت بەرىلگەن. بۇعان دەيىن ەكى جىل ەگىن شارۋاشىلىعىمەن اينالىسىپتى. الايدا ءبىلىم مەن تاجىريبەنىڭ جەتىسپەۋشىلىگى سالدارىنان ايتارلىقتاي تابىسقا قول جەتكىزە الماعان. قازىر ولقىلىقتىڭ ورنىن تولتىرىپ, جاڭا ءىس باستاۋ ارقىلى تابىستىڭ كوزىن تابۋعا بەكىنىپ وتىر», دەيدى ورتالىق باسشىسى.
اۋداندا جىل سايىن تەك شارۋاقوجالىق يەلەرى 3 مىڭ توننادان استام الما الادى ەكەن. بابىن كەلتىرىپ وسىرگەنمەن, كوڭىل كونشىتەرلىكتەي تابىس تابا المايدى – ءونىمدى قايتا وتكىزەرىن بىلمەي دال بولادى. امالىن تاپپاعان سوڭ ارزانعا جىبەرەدى. ال جاڭادان اشىلعان ورتالىق قىزمەتكەرلەرىنىڭ ۇيىتقى بولۋىمەن وندىرىستىك تسەح ۇيىمداستىرىلعان. ياعني ماماندار دايىن ونىمگە دە تولىققاندى قولداۋ كورسەتەدى.
«ماقساتىمىز – اۋىل تۇرعىندارىنىڭ تابىسىن ارتتىرىپ, قارجىلىق ساۋاتىن اشۋ جانە ولاردى قارىزسىز بولاشاققا باستاۋ. ەگىن شارۋاشىلىعى بويىنشا تاجىريبەلىك ءبىلىم بەرۋگە ارنالعان, جالپى كولەمى 77 شارشى مەتر بولاتىن وقۋ اۋديتورياسى جابدىقتالعان. مۇنداي اۋديتوريا مال شارۋاشىلىعى بويىنشا ءبىلىم الۋعا كەلگەن ازاماتتارعا دا قاراستىرىلعان. تىعىرىققا تىرەلگەن شارۋالارمەن بىرلەسىپ جۇمىس ىستەۋگە قاشاندا دايىنبىز», دەيدى ا.اقىنبەكوۆا.
«اگرو ساۋات» وقۋ-ادىستەمەلىك ورتالىعى قىزمەتكەرلەرىنىڭ ايتۋىنشا, قولعا الىنعان بۇل يگىلىكتى باستاما الداعى بىرنەشە جىل بەدەرىندە ايتارلىقتاي ناتيجە بەرمەك.
جامبىل وبلىسى,
مەركى اۋدانى
