سۋرەت: vk.com/baitenovs
ءا دەگەننەن «عاشىقتار» دەگەن تارتىمدى تاقىرىبىمەن باۋراپ الاتىن كىتاپ مۇقاباسىن اشقان ساتتەن-اق ءوزىنىڭ ىڭكار سەزىم سىر شەرتەتىن تىلسىم تۇڭعيىعىنا قاراي تارتىپ الا جونەلەدى. شىنايى سەزىم يىرىمدەرى شەبەر ورىلگەن سىرشىل شىعارما ءومىردىڭ وزىندەي ءمولدىر, ءومىردىڭ وزىندەي وتكىر ويلارىمەن عاشىقتىققا وزگەشە ورە بيىگىنەن كوز تىگۋگە ۇندەيدى. «ماحاببات – ادامنىڭ ۇلى قۋاتى, ۇلى سەنىمى» دەگەن اۆتور وسىناۋ عالامات كۇيدى ادام ءومىرىنىڭ بار ءمان-ماڭىزىنا بالاپ, ءوزى دە سول عاجاپ كۇيگە تاڭىرىدەي تابىنادى. وسىلايشا, مىناۋ عاجاپ عالامداعى تالماۋسىراپ بارا جاتقان ۇلى سەزىمنىڭ قۇدىرەتىنە وقىرمانىن باس يگىزەدى.
جانتاس ەسىمدى ءمۇسىنشى جىگىتتىڭ اينالاسىنان تارقاتىلا تالداناتىن تۋىندىدا ءومىر مەن ونەر بەدەرىندەگى قۇندىلىقتار سالىستىرا سۋرەتتەلە كەلە, عاشىقتىق كۇيدىڭ ءتۇرلى ۇلگى, سان الۋان جاعدايداعى جارقىلى مەن تاعدىرى پاراللەل الىنا وتىرىپ, وقىرمانىنا ماحابباتتى ءوز پاراسات بيىگىندە ساراپتاۋىنا جول اشادى.
ءيا, «عاشىقتاردا» سەزىمنىڭ ءتۇرلى كۇيى, ماحابباتتىڭ سان الۋان فورماسى شەبەر سۋرەتتەلەدى. ونداعى اجە مەن نەمەرە, اعا مەن قارىنداس, قىز بەن جىگىت, ەر مەن ايەل اراسىنداعى رياسىز كوڭىل كورىنىستەرىنەن باستاپ, ونەر مەن ورە, ماحاببات پەن قۇمارلىق, عاشىقتىق پەن عاداۋات, سىيلاستىق پەن سەزىم, سەنىم مەن ساتقىندىق سىندى سان ءتۇرلى قايشىلىقتار قاقتىعىسىنداعى پەندە قالىبىنىڭ الۋان-الۋان ارپالىس كۇيىن قالامگەر كەمەلىنە كەلتىرە كەسكىندەيدى. ارينە, ءبىر قاراعاندا, رومان بايانداۋ فورماسىندا جازىلىپ, ءبىر سىدىرعى جەلىدە سۋرەتتەلگەندەي اسەر سىيلاعانىمەن, كەيىپكەرلەرىنىڭ ىشكى جان دۇنيەسىنە ۇڭىلگەن سايىن ونداعى قايشىلىق قاتپارلارىنىڭ قالىڭداپ, ادام جانىنىڭ شەكسىز دە ءتۇپسىز پسيحولوگيالىق تەرەڭىنە بەينە ءبىر ادام جانىنىڭ ينجەنەرىندەي اسقان سەزىمتالدىق ءھام بايىپتىلىقپەن بويلاعان بارلاۋدىڭ ءوزى-اق جازۋشى الەمىنىڭ قانشالىقتى ءمولدىر ءھام مەيىربان, نازىك تە سىرشىل ەكەندىگىن اڭعارتسا كەرەك. اسىرەسە رومانداعى بەينەلەردىڭ سىرتقى سۋرەتتەۋلەرى مەن ىشكى سەزىم ارپالىستارىنىڭ ءساتتى قابىسۋى, جانتاس تاعدىرىندا جولىققان ءۇمىت, ۇلبولسىن, اياۋجان سىندى ارۋلاردىڭ ءبىر-بىرىنە مۇلدەم ۇقسامايتىن مىنەز مۇسىندەۋلەرىنىڭ ءوزى قالامگەردىڭ تۋىندىدا جانتاسپەن قاتار جەلە وتىرىپ, شىعارماداعى ءار كەيىپكەر بولمىسىن, ەرەكشەلىگىن بەينە ءبىر مۇسىنشىدەي شەبەر قاشاپ, ءمىنسىز مۇسىندەگەنىن سەزىندىرەدى. وسىلايشا, «عاشىقتارداعى» ءاربىر ماحاببات وقيعاسى وقىرمانىنا وزگەشە وي سالىپ, ءتۇرلى مىنەز بەدەرىندەگى بەينەلەردىڭ بولمىسى ارقىلى عاشىقتىق عالاماتىنا سان قىرىنان كوز تىگۋگە مۇمكىندىك سىيلايدى. اسىرەسە ادامنىڭ جان مەن ءتان كۇيزەلىسى قاتار سيپاتتالاتىن روماندا وكىندىرە وتىرىپ وكسىتەتىن, سۇيسىنتە وتىرىپ جيرەندىرەتىن, تاڭعالدىرا وتىرىپ تامسانتاتىن تۇستار مول. سونىسىمەن دە شىعارما جانعا جاقىن, جۇرەككە اياۋلى اسەر قالدىرادى.
كەيىنگى جىلدارى ءىلياس ەسەنبەرليننىڭ ادەبي مۇراسىنا تەاتر مەن كينو رەجيسسەرلەرىنىڭ كوڭىل قويۋى قۋانتادى. اسىرەسە وسى ءبىز تىلگە تيەك, تالداۋىمىزعا ارقاۋ ەتكەن «عاشىقتاردىڭ» تەك كىتاپ بەتىندە قالماي, ساحناعا كوشۋى دە تۋىندىنىڭ ومىرشەڭدىگىن, جىلدارمەن بىرگە وزەكتىلىگىن دە وتكىرلەندىرىپ كەلە جاتقاندىعىن اڭعارتسا كەرەك. ولاي بولۋى زاڭدى دا. سەبەبى ادام تۋرالى, ادامنىڭ ىشكى سەزىمدەرى مەن كوڭىل تۇكىپىرىندەگى اياۋلى ارماندارى ءسوز بولعان شىعارمالاردىڭ ەشقاشان ەسكىرمەيتىنى حاق. ويتكەنى ادامزات بار جەردە ادام تۋرالى تۋىندى دا ماڭگىلىك. مىنە, «عاشىقتار» – ءدال سونداي رومان.
