الماتى مەن مينسك اراسىنا قاتىنايتىن اۋە رەيسى اشىلدى

استانا.1 مامىر. بەلارۋستىڭ Belavia اۋە كومپانياسى الماتى مەن مينسك اراسىنا قاتىنايتىن تۇراقتى اۋە رەيسىن ىسكە قوستى. ەندى ەكى قالا ورتاسىندا «بوينگ» ۇشاعى جولاۋشىلار تاسىمالدايتىن بولادى. بۇل تۋرالى bonus-travel.by حابارلادى. اتالعان جاڭا رەيستىڭ ءبىر ارتىقشىلىعى, جولدا جانارماي قۇيۋ ءۇشىن وزگە اەروپورتتارعا توقتامايدى. Belavia اۋە كومپانياسى باسشىسىنىڭ ورىنباسارى يگور چەرگينەتس: «بۇل باعىتتاعى اۋە تاسىمالى كوپتەن بەرى حالىقتىڭ سۇرانىسىنا يە ەدى. جالپى, ءبىز الماتى-مينسك باعىتىنداعى اۋە كەمەسى جولاۋشىلارعا ساپالى قىزمەت كورسەتەتىنىنە سەنىمدىمىز. ازىرگە اۋە قاتىناسى اپتانىڭ ەكى كۇنىندە عانا جولاۋشىلار تاسىمالدايتىن بولادى»,–دەيدى. ال قازاقستاننىڭ بەلارۋستەگى توتەنشە جانە وكىلەتتى ەلشىسى ەرعالي بولەگەنوۆ: «اۋە قاتىناسى ەكى ەل ءۇشىن وتە ماڭىزدى ءرول اتقارادى. قازاقستان مەن بەلارۋستىڭ اراسىنداعى تاۋار اينالىمى 1 ملرد. دوللار. بۇل – ارينە از. سوندىقتان دا, ءبىز وسى اۋە قاتىناسى ارقىلى تاۋار اينالىمىن ۇلعايتۋدى كوزدەپ وتىرمىز. الداعى ۋاقىتتا الماتىعا اتالعان ەلدىڭ تۋريستەرىن كوپتەپ تارتۋدى قولعا الامىز», – دەدى. ايتا كەتەيىك, وسى جىلدىڭ جازىنان باستاپ Belavia اۋە كومپانياسى قازاقستاننىڭ – استانا, قاراعاندى, قوستاناي, پاۆلودار جانە الماتى قالالارىنا تۇراقتى تۇردە قاتىنايتىن اۋە رەيستەرىن ىسكە قوساتىن بولادى. تالعات رايىمبەك. دەرەك, سۋرەت: bonus-travel.by.