«دوس تاپپاعان ەر ازار, باسشى باقپاعان ەل ازار», – دەگەن ەكەن مۇحتار اۋەزوۆ. دوس! ءۇش-اق ارىپتەن تۇراتىن قۇدىرەتتى ءسوز استارىندا قانداي ماعىنا, قانشا تاعدىر تۇر دەسەڭىزشى!
العاشقى تانىستىعىمىز ۋكرايناداعى دنەپرودزەرجينسك قالاسىنىڭ سول كەزدەگى №8 تەحنيكالىق ۋچيليششەسىندە باستالعان ەدى. وقۋعا كەلگەن 67 جاس نەگىزىنەن اۋىلدا دۇنيەگە كەلىپ, اۋىلدا ءوسىپ, اۋىل مەكتەبىندە ءبىلىم العاندارعا جاتامىز. شىنىن ايتسام, كوبىمىزدىڭ ورىس ءتىلىن ءبىلۋ دەڭگەيىمىز تومەن ەدى. ال نۇرسۇلتان بولسا, سول كەزدىڭ وزىندە ەكى تىلدە بىردەي سويلەيتىن. وسى ەرەكشەلىگىنىڭ ءوزى-اق سوناۋ ورىس ءتىلدى ورتادا باسقالارىمىزعا قاراعاندا, ونىڭ شوقتىعىن بيىكتەتىپ تۇراتىن.
ۋچيليششەدەگى ءبىرىنشى كۇننەن باستاپ نۇرسۇلتاننىڭ اشىق مىنەزى, ورتانى دەرەۋ يگەرىپ الاتىن شەشەندىگى مەن كورەگەندىگى, ۇيىمداستىرۋشىلىق قاسيەتى ايقىن بايقالىپ, ۇزاماي-اق توپ ستاروستاسى, كومسومول ۇيىمىنىڭ جەتەكشىسى سياقتى قوعامدىق لاۋازىمدارعا جەتكىزدى.
نۇرسۇلتاننىڭ ءبىر جاقسى قاسيەتى, ءبىر تىرلىكتى باستادى ما, تۇبىنە جەتپەي تىنبايتىن. ول كلاسسيكالىق كۇرەس سەكتسياسىنا قاتىسىپ, بەس-التى ايدىڭ ىشىندە وسى سپورت تۇرىنەن 1-رازريادتى سپورتشى ءنورماتيۆىن ورىنداپ, ءوزىنىڭ قايسار مىنەزىن تانىتتى. سول كەزدىڭ وزىندە-اق ونىڭ بىلىمىندەگى, مىنەزىندەگى قالىپتاسقان جاقسى جاقتارى مەن جاس تا بولسا ومىردەن كورگەنى كوپ بولعاندىعىنان با, ادامي تۇعىرى بىزگە قاراعاندا بيىكتەۋ كورىنىپ تۇراتىن.
نۇرەكەڭنىڭ حالىقپەن بولعان سۇحباتىندا ءبىر كورەرمەننىڭ دوستار تۋرالى قويعان سۇراعىنا, ول كىسى: «جاستىق شاقتان كەلە جاتقان ەكى-ءۇش دوسىم بار, ولاردان باسقا ناعىز شىندىقتى ماعان كىم ايتادى؟» – دەگەن ماعىنادا جاۋاپ قايتاردى. مەنىڭشە, مۇنداي ءسوز مەملەكەت باسشىسى لاۋازىمىنداعى ادامدار اراسىنان تەك دوستىققا ادالدىعى بەرىك ازاماتتان عانا شىعادى.
ءيا, تاۋەلسىزدىك جولىندا ەلىمىز از قيىنشىلىق كورگەن جوق. قازاق حالقى ءۇشىن تاۋەلسىزدىك اسپاننان تۇسكەن سىي ەمەس. حالقىمىز بوستاندىقتى اڭساپ, تاۋەلسىزدىككە زارىعىپ جەتتى. وسى كۇنگە دەيىن باستان كەشكەن وقيعالار – ەل بوستاندىعىن قورعاۋ سوعىستارى مەن ۇلت-ازاتتىق كوتەرىلىستەرىنىڭ تاريحىمىز-دا وشپەس ونەگە, ولمەس مۇرا رەتىندە ساقتالدى. ەلدىڭ بىرلىگى مەن تىنىشتىعىن ساقتاۋ جولىندا حان-سۇلتاندار, باتىرلار جاندارىن شۇبەرەككە ءتۇيىپ ءجۇرىپ, تالاي ەرلىك ىستەر جاسادى. ءدال سونداي حاس باتىرلاردىڭ, توپ باستاۋشىنىڭ ارەكەتىن جاساۋ جاڭا زاماندا نۇرسۇلتاننىڭ ماڭدايىنا جازىلىپتى. ونىڭ وسىعان لايىق ەكەنىنە ەشكىمنىڭ كۇمانى جوق. بىراق, ونىڭ ارعى جاعىنا تەرەڭىرەك ۇڭىلە قاراساق, نۇرسۇلتاننىڭ ەل سەنىمىن اقتاۋ جولىندا بويىنداعى بۇكىل كۇش-قۋاتىن پاش ەتىپ, كۇندىز كۇلكىدەن, تۇندە ۇيقىدان ايىرىلىپ, قانشاما اۋىر كۇندەردى باستان كەشكەنىن بىرەۋ بىلسە, بىرەۋ بىلمەس. بولاشاق ۇرپاققا, جاستارعا وسى ويدى سانالارىنا ۇلگى ەسەبىندە سىڭىرسە ەكەن دەگەن نيەتپەن ادەيى جازىپ وتىرمىن. ول قانداي وي؟
مەنىڭ پايىمداۋىمشا, تاريحي قيىن-قىستاۋ كەزدە ءبىر حالىقتىڭ تاعدىرى قولىندا تۇرعان ەلباسىنىڭ ارقاسىن كەڭگە سالۋى, اياعىن الشاق باسۋى, ۋايىمسىز ءجۇرۋى مۇمكىن ەمەس. «ۋايىم – ەر قورعانى» دەپ اباي سوندىقتان ايتقان. اللانىڭ وعان بەرگەن ەل باسقارۋ باقىتىنا قاراعاندا, الىس-جاقىن شەتەلدەردە باستارى دومالاپ, قىرىلىپ جاتقان, جۇمىسسىز قاڭعىرىپ جۇرگەن وزگە ەل ازاماتتارىن كورگەندە, ءدال بۇگىنگىدەي بەيبىت ومىردە «تاۋبە, شۇكىر» دەۋگە تولىق تاتيتىن تىرشىلىك ەتىپ جۇرگەن بىزدەر باقىتتى ەمەسپىز بە؟! نۇرسۇلتاننىڭ «ەل تىنىشتىعىن قالاي ساقتايمىن؟» دەگەن ىشكى ارمانىن سانالى ازامات قانا تۇسىنەر؟!
حالىق دانالىعىندا «قانشالىقتى ارتقا زەر سالساڭ, قازىرگىنى باعالاپ, بولاشاعىڭدى كورە الاسىڭ» دەگەن ءسوز بار. اركەز ءبىز تاريحىمىزدى ەسكە العان جاعدايدا عانا, بۇگىنگى كۇنمەن سالىستىرا وتىرىپ, قادىرىنە جەتەرمىز-اۋ دەيمىن. 1990-شى جىلدارى قازاقستان ءوندىرىس ورىندارى اۋىر جاعدايدا, تاريحى ءوشۋ الدىندا, ەڭ باستىسى, انا ءتىلى قۇرىپ بارا جاتقان رەسپۋبليكا ەدى. شەكارا شەڭبەرى دۇرىس سىزىلماعان, ءوز قارۋلى كۇشتەرىنىڭ جانە ۇلتتىق ۆاليۋتانىڭ بولماۋى, مەملەكەتتىك بيلىكتىڭ ب ۇلىڭعىرلىعى قازاق مەملەكەتىنىڭ اياعىنان نىق تۇرۋىنا كەرى اسەرىن بەرگەن ەدى. قىسقاشا ايتساق, ەگەمەندىك قولىمىزعا «سوۆەتتەر وداعى» دەپ اتالاتىن ۇلى دەرجاۆانىڭ قاڭقاسىندا تيگەن ەدى.
بيلىك جوعارعى كەڭەستىڭ 360 دەپۋتاتىنىڭ قولىندا بولعان. جاستارى, ماماندىقتارى, الەۋمەتتىك-ساياسي باعىتتارى ءارتۇرلى ازاماتتار. نارىقتىق ەكونوميكانى ءتۇسىنۋ جانە مەملەكەت باسقارۋ تاجىريبەسى دە شامالى ەدى. اياعىن ەندى باسقان مەملەكەتكە ەلىم دەپ ەزىلەتىن ەردىڭ ەڭ قاجەتتى ءساتى تۋدى. ءسويتىپ, سونداي اۋىر كۇندەرى حالىقتىڭ قالاۋىمەن نۇرسۇلتان ءابىش ۇلىنىڭ كانديداتۋراسىن قولداۋ ەل ءۇشىن وڭىنان تۋدى. العىر ويىمەن, كورەگەندىلىگىمەن حالقىنىڭ قولداۋىمەن بولعان پرەزيدەنت «...بارلىق قيىنشىلىقتارعا توتەپ بەرۋ ءۇشىن قۇقىقتىق تۇرعىدا جاقسى جاساقتالعان ۇكىمەت پەن جەرگىلىكتى باسقارۋ ورىندارى بولماي, ەڭ باستىسى, ەگەمەندىگى ەندى عانا قولىنا تيگەن مەملەكەتتىڭ تۇراقتى دامۋى ءۇشىن كوپۇلتتى وتانىمىزدا ۇلتارالىق جانە دىنارالىق كەلىسىمدى ساقتاي الاتىن ۇيىمداستىرۋشىلىق تاسىلدەردى ومىرگە اكەلمەي, جەڭىس پەن جەتىستىكتەرگە جەتۋ مۇمكىن ەمەستىگىن» تولىق تۇسىنگەن ەدى. ۇزاق ويلانىپ جاتپاي, تاريحي از ۋاقىتتىڭ ىشىندە قىرۋار شارۋلاردى دا ىسكە اسىردى ەمەس پە؟!
كەيبىرەۋىن ەسكە تۇسىرەيىكشى: 1990 جىلى 25 قازاندا «قازاق سسر-ءنىڭ مەملەكەتتىك ەگەمەندىگى تۋرالى» دەكلاراتسيا قابىلدانۋى, 1991 جىلى 29 تامىزدا سەمەي يادرولىق پوليگونىنىڭ جابىلۋى, 1991 جىلى 10 جەلتوقساندا «قازسسر» اتاۋى «قازاقستان رەسپۋبليكاسى» بولىپ وزگەرتىلۋى, 1991 جىلى 16 جەلتوقساندا «قر مەملەكەتتىك تاۋەلسىزدىگى تۋرالى» كونستيتۋتسيالىق زاڭ قابىلدانۋى, 1992 جىلى 2 ناۋرىزدا قازاقستان بۇۇ-نا مۇشەلىككە قابىلدانۋى, 1992 جىلى 4 ماۋسىمدا ءوزىمىزدىڭ ءتول مەملەكەتتىك تۋىمىز, ەلتاڭبامىز جانە ءانۇرانىمىزدىڭ بەكىتىلۋى, 1992 جىلى 29 قىركۇيەكتە الماتىدا دۇنيەجۇزى قازاقتارىنىڭ قۇرىلتايى ءوتۋى, 1993 جىلى 28 قاڭتاردا العاشقى اتا زاڭنىڭ قابىلدانۋى, استانانى اقمولاعا كوشىرۋى, 1998 جىلى 10 ماۋسىمدا استانانىڭ حالىقارالىق تۇساۋكەسەرى بولۋى جانە تاعى باسقا تاريحتا ويىپ تۇرىپ ورىن الاتىن, اتقارىلعان شارۋالار نۇرسۇلتاننىڭ ەلىنە ايانباي ەتكەن ەڭبەگىنىڭ كورىنىسى دەر ەدىم.
بۇگىندەرى قازاقستان ازاماتىنىڭ بوستاندىعى مەن قۇقىعى ونىڭ ۇلتىنا, دىنىنە, قوعامداعى جاعدايىنا قاراماستان, جاڭارتىلعان زاڭدار اياسىندا ەلىمىزدىڭ بارلىق ازاماتتارىنا بىردەي سانالىپ, قورعالادى ەمەس پە؟ مۇنداي جاعداي ادىلدىك تۇراقتىلىعى مەن ۇلتتىڭ رۋحاني دامۋىنا كەپىل بولا الادى. ارينە, مەملەكەت پەن ۇلت ەگىز ۇعىم. بۇنىڭ ساياسي-قۇقىلى ماعىنا جانە ءپىشىن ەكەنى دە راس. سوندىقتان ازاماتتاردىڭ تاتۋلىعىن تۇراقتى ساقتاپ وتىرعان ول تۇسىنىك ءبىزدىڭ ەلىمىزدە «بىرلىك» دەگەن سوزبەن تۇراقتاندى.
نۇرەكەڭدى جارتى عاسىردان ارتىق بىلەتىنىمە ماقتانامىن. سوندىقتان دا شىعار, ونىڭ بەت العان باعىتىنداعى ماقساتىنا جەتپەي توقتامايتىن قاسيەتىن سەنىممەن ايتا الامىن. حالقى ءۇشىن ارمانداعان ارماندارىن, ءوزى ارنايى قۇرعان جانە تىكەلەي باسقارعان كونستيتۋتسيالىق كوميسسيانىڭ ايانباي اتقارعان جۇمىسىنىڭ ناتيجەسىندە ومىرگە كەلگەن اتا زاڭىمىزدان كورۋگە بولادى. بىردە: «ەلىمىز 20 جىلدان اسا ەگەمەندىك پەن ساياسي تۇراقتىلىقتى ساقتاۋ ءۇشىن ايانباي ەڭبەك ەتتى. 20 جىل وتكەن سوڭ ماقساتىمىزعا جەتتىك. ال وسى جىلداردا قانشاما جۇمىس جاسالدى. ءسويتىپ, باسقان قادام ءساتتى بولدى. «2030» ستراتەگياسىندا كورسەتىلگەن باستى تاپسىرمالار ورىندالدى, ال باسقالارى ورىندالۋ ۇستىندە», دەپ ەدى ەلباسى.
باعالاي بىلسەك, «2030» ستراتەگياسىنىڭ ءوزى عانا باعا جەتپەس جەتىستىك جانە تاجىريبە ەمەس پە؟ بىراق وسى قول جەتكىزگەن ماقساتىمىزدىڭ» ءارى قاراي جەمىسىن كورۋ, ءدامىن تاتۋ 2050 ستراتەگياسىن ىسكە اسىرۋعا تىكەلەي بايلانىستى بولادى. ەلىنىڭ بولاشاعىنا جانى اشىعان ءاربىر ازامات وسىنى ءتۇسىنۋى ءتيىس. 2050 ستراتەگياسىنىڭ كىرپىشىن قالاۋعا اتسالىسۋ – قازىرگى كەزدەگى قوعامداعى جاعدايدىڭ بايىبىنا بارا ءبىلۋ. مەملەكەتىمىز بولاشاققا بارلاي قاراپ, دامۋدى بۇلجىماس داستۇرگە اينالدىرعانىن نۇرسۇلتاننىڭ جىل سايىنعى جولداۋلارى ايقىنداي تۇسەدى. پرەزيدەنت ءسىز بەن ءبىزدى ءاردايىم جىل سايىنعى جولداۋ مازمۇنىنا دەن قويۋعا شاقىرادى. بۇل جولى دا «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋىن ەلباسى ەڭ الدىمەن مەملەكەتىمىزدىڭ بولاشاق يەسى – جاستارعا ارناپ وتىر. پرەزيدەنت ءوز سوزىندە: «مەن سىزدەرگە – جاڭا بۋىن قازاقستاندىقتارعا سەنىم ارتامىن. سىزدەر جاڭا باعىتتىڭ قوزعاۋشى كۇشىنە اينالۋعا تيىسسىزدەر», – دەگەن ەدى.
مەملەكەت ءوز تاراپىنان جاستاردىڭ ساپالى ءبىلىم مەن سانالى تاربيە الۋىنا, قالاعان ماماندىعىن يگەرۋگە, العا قويعان ارمان-ماقساتتارىن ىسكە اسىرۋ ءۇشىن بار جاعدايدى جاساپ وتىر. ءسوزىم دالەلدى بولۋ ءۇشىن الەمدىك دەڭگەيدەگى نازارباەۆ ۋنيۆەرسيتەتتى, نازارباەۆ زياتكەرلىك مەكتەپتەرىن, «بولاشاق», «بالاپان» باعدارلامالارىن ايتا الامىن.
نۇرسۇلتان – ۇلى وتان سوعىسى باستالار الدىندا دۇنيەگە كەلگەن, اۋىلدان شىققان قازاقتىڭ قاراپايىم بالاسى. ونىڭ قانداي قيىندىقتاردى باستان كەشكەنىن «ەلباسى جولى» كينوەپوپەياسىنان-اق كوز جەتكىزۋگە بولادى. تاپ سول ونەر تۋىندىلارىندا ونىڭ ءسابي كەزىنەن-اق, وزگە ۇلت وكىلدەرىمەن باۋىرمالدىلىعى سۋرەتتەلگەن. مۇمكىن بالالىق شاقتاعى «باۋىرىم» دەگەن وشپەس سەزىمى بولار, مۇمكىن ەلىنىڭ تىنىشتىعىن ويلاعان بولار, نۇرسۇلتان وزگە ۇلت وكىلدەرىنە دەگەن قۇرمەتىن بولەكشە قادىرلەيدى.
اۋىل دەپ سوققان جۇرەگى ەشقاشان ونداعى اعايىنداردى ۇمىتپاي, اۋىل شارۋاشىلىعىنىڭ وركەندەۋى اركەز نازارىندا تۇردى. قوماقتى قاراجات بولىنۋىنە زەر سالدى. وسىعان بايلانىستى جاقىندا عانا, ءساۋىر ايىندا «ەڭبەك ەتكىسى كەلەتىندەر ءۇشىن قالادا دا, اۋىلدا دا بارلىق جاعداي جاسالعان. رەسپۋبليكانىڭ بارلىق وبلىس ورتالىقتارى تۇرلەنە ءتۇستى, اۋدان ورتالىقتارى جۇيەلى دامىپ كەلەدى. بۇل سالادا وندىرىلەتىن ءونىم كولەمىن ۇلعايتۋعا, سايكەسىنشە, اۋىل تۇرعىندارىنىڭ ءال-اۋقاتىن ارتتىرۋعا مۇمكىندىك بەرەدى», – دەدى ول.
تاۋەلسىز ەلدىڭ ءتىلى دە تاۋەلسىز بولعانى دۇرىس. قازاق ءتىلىنىڭ تاۋەلسىزدىگى – ەل بولاشاعى. وسىنى ەشقاشان ەسىنەن شىعارىپ كورمەگەن ەلباسى انا ءتىلىمىزدىڭ ستراتەگيالىق ماڭىزعا يە ەكەنىن ءاردايىم تىلىنە تيەك ەتتى.
نۇرسۇلتان مەملەكەتىمىزدىڭ ەڭ قيىن كەزەڭدەرىندە دە ەلدى ۇيىتا ءبىلدى, ەرتەڭىنە كۇدىكتەنە قاراۋدان ارىلتتى. اشىعىن ايتقاندا, ءوز سوزىندە تۇرىپ, حالىقتى قيىن-قىستاۋ كەزدەردەن الىپ شىقتى. ەلدە تىنىشتىق بار. وزگە ۇلتتارعا جاعداي جاسالىنعان. كۇننەن-كۇنگە تاۋەلسىز قازاق ەلى ءوزىنىڭ ەكونوميكاسىن, الەۋمەتتىك سالاسىن وركەندەتۋدە. مادەنيەتى, ءبىلىمى, عىلىمى دامۋ ۇستىندە. وعان مەملەكەتتىك قولداۋ دا جاساپ جاتىر. بۇل – ۇلكەن قامقورلىق. جاي انشەيىن عانا ايتىلا سالعان ادەمى ءسوز ەمەس! جوعارىدا ءبىراز دايەكتەر كەلتىردىم. ەلدى باسقارۋدا باي تاجىريبەگە يە. جالعىز ءبىزدىڭ عانا ەمەس, وزگە ەلدە جالپى الەمدە ابىرويى, بەدەلى جوعارى ەكەنىن ءبارىمىز دە كورىپ ءجۇرمىز. قازاق ەلىنىڭ جارقىن بولاشاققا دەگەن تاڭداۋىن تاستاي بەكىتۋ جولىندا حالىقارالىق قاتىناس تۇرعىسىندا دا قىرۋار ىستەر اتقارىلدى. اتاپ ايتقاندا, العاش تاۋەلسىزدىگىمىزدى مويىنداعان تۇركيا ەلى, ۆاشينگتون, ماسكەۋ, بريۋسسەل, لوندون, بەيجىڭ, كاير, تەگەران, تاشكەنت, بىشكەك جانە تاعى دا باسقا مەملەكەتتەردىڭ استانالارىنا رەسمي ساپارلارعا بارعان قورىتىندىلارىنان جانە ايماقتاردا اتقارىلىپ جاتقان يگى ىستەردەن كورۋگە بولادى. ءسويتىپ, نۇرسۇلتان قازاق ەلىنىڭ الەمنىڭ جەتەكشى دەرجاۆالارى, كورشىلەس تمد مەملەكەتتەرى اراسىنداعى ستراتەگيالىق سەرىكتەستىكتى جاڭا دەڭگەيگە كوتەردى دەۋگە بولادى.
جاقىندا وتكەن ساياسي ناۋقاننىڭ دا ەلىمىز ءۇشىن ورنى ەرەكشە. «نۇرسۇلتان!» دەپ, سايلاۋعا داۋىس بەرۋگە بالا-شاعاسىمەن كەلگەن حالىقتىڭ وعان دەگەن قۇرمەتىن بايقاۋعا بولادى. سايلاۋ قورىتىندىسىنان كەيىن حالىقتىڭ وعان دەگەن كىرشىكسىز سەنىمىنە ءبارىمىز كۋا بولدىق. بۇعان قاتىستى: «قازاق ەلى ءبىر ورىندا تابانداپ تۇرىپ قالماي, العا جىلجۋى كەرەك. توقتاپ قالۋعا بولمايدى. توقتاپ قالعان سۋ بۇزىلادى, ءبىر ورىندا تابانداساق, ارتتاعىلار وزىپ كەتەدى. قازاقستان حالقى اسسامبلەياسىنىڭ كەزەكتەن تىس پرەزيدەنت سايلاۋىن وتكىزۋ تۋرالى باستاماسى حالىق تاراپىنان قىزۋ قولداۋ تاپقانىن ءبىلىپ وتىرسىزدار. ساناۋلى كۇندە ماعان وسى ماسەلە جونىندە مىڭداعان حاتتار كەلىپ ءتۇستى. قۇزىرلى ورگاندار بۇل باستامانى ەل زاڭناماسىنا سايكەس دەپ تاپتى. سونىمەن, 26 ساۋىردە كەزەكتەن تىس پرەزيدەنت سايلاۋىن وتكىزۋ تۋرالى جارلىعىم وسىعان جاۋاپ بولدى. بۇنى وتانىمىزدا بەيبىتشىلىك پەن كەلىسىمدى نىعايتۋعا, ءبىزدىڭ باعىتىمىزدى جالعاستىرۋعا دەگەن جالپىحالىقتىق ۇمتىلىس پەن دالەل دەپ ءبىلۋىمىز كەرەك», – دەدى قانشاما سىناقتاردان ابىرويمەن وتكەن ەلباسى.
جالعىز نۇرسۇلتاننىڭ عانا ەمەس, بۇكىل ەل-جۇرت بولىپ, قانشاما قيىنشىلىقتارعا توتەپ بەرە العان, بىرلىگىن ساقتاي بىلگەن دانا قازاق حالقىنىڭ دا قايسارلىعىن اتاپ وتپەسكە بولماس. مىنە, «جۇمىلا كوتەرگەن جۇك جەڭىل» دەمەكشى, ەل جانە ەلباسى بولىپ وسىنداي شۋاقتى كۇنگە دە جەتتىك. نۇرەكەڭنىڭ باسشىلىعىمەن قازاق ەلى تالاي اسۋلاردان استى. بۇل جول بابالار بۇرىن جۇرمەگەن سوقپاعى كوپ جول ەدى. بىراق ەلباسى وسىنىڭ بارىنەن جول تاۋىپ, قازىرگى قيىندىقتاردى دەر كەزىندە سەزە دە, كورە دە ءبىلدى. ونىڭ ايعاعى – «نۇرلى جول – بولاشاققا باستار جول» جاڭا ەكونوميكالىق ساياساتى. بايتاق ەلدى مەكەندەرىمىزدىڭ ءبىر-بىرىمەن بايلانىسىن نىعايتىپ, حالقىمىزعا جاڭا تىنىس-تىرشىلىك اكەلەتىن ساياسات. جۇمىسسىزدىقپەن كۇرەسۋگە ارنالعان ساياسات. ءبىز ەندى تەك مۇنايعا عانا سۇيەنبەي, ەكونوميكانىڭ جاڭا قىرلارى مەن مۇمكىندىكتەرىنە باسىمدىق بەرە باستادىق. وسىنى ورىنداۋ – ماقساتىمىز. جاي ءسوز رەتىندە عانا ەمەس, ناقتى ءىستى جۇزەگە اسىرساق. جەمىستى قورىتىندىسىن ەرتەڭ ەل كورسە, بۇل دا ءبىر «نۇرلى جول» ساياساتىنىڭ ىسكە اسقانى, نۇرسۇلتاننىڭ ءبىر ارمانى ورىندالعانى دەپ تۇسىنەمىن.
ارينە, ەلباسىنىڭ قازاق ەلى ءۇشىن اتقارىپ جاتقان قىزمەتى قىرۋار. ونى جازىپ, گازەت بەتىنە سىيدىرا الماسپىز. سوندا دا بولسا, «بۇگىنگى كۇن – ەرتەڭگى تاريح» دەگەن قاناتتى ءسوز بار. سول ءبىر ادەمى قاناتتى ءسوز جاستارعا, بولاشاق ۇرپاققا نۇرسۇلتاننىڭ جاساعان ەڭبەكتەرى بولاشاق ۇرپاقتىڭ ساناسىنا ساۋلە بولىپ تۇسسە دەگەن ويىم ەدى.
ماقسۇت نارىكباەۆ,
قازاقستاننىڭ ەڭبەك سىڭىرگەن
قايراتكەرى, زاڭ عىلىمدارىنىڭ دوكتورى, پروفەسسور.
