فوتو: ءماجىلىستىڭ ءباسپاسوز قىزمەتىنە سىلتەمە جاساپ.
كەزدەسۋ بارىسىندا سەرىكتەستىكتىڭ باس ديرەكتورى الەكساندر بۋزىكين زاۋىتتىڭ اۆتونومدى رەجيمدە جۇمىس ىستەپ, جىلىنا 44 ملن دانا كىرپىش شىعاراتىنىن ايتتى. سونىمەن قاتار كەرامزيتتى كىرپىشتەر باعاسىنىڭ نارىقتاعى باعامەن سايكەستىگىن جانە باسەكەگە قابىلەتتىلىگىن اتاپ ءوتتى. ەندىگى كەزەكتە ءوندىرىستى سۇرانىسقا قاراي ۇلعايتۋ جوسپارلانىپ وتىر.
مەملەكەت باسشىسىنىڭ جولداۋىندا ايتىلعانداي, قازىر وڭىردە ونەركاسىپ الەۋەتىن تولىق پايدالانۋ ءۇشىن جان-جاقتى شارالار قابىلدانۋدا. دەپۋتاتتار وتاندىق كاسىپورىنداردى قولداۋ, ءوندىرىستى دامىتۋ بويىنشا اتقارىلىپ جاتقان ىرگەلى ىستەر مەن قابىلدانىپ جاتقان زاڭدار تۋرالى ايتىپ بەردى.
«زاۋىت – قۇرىلىس ماتەريالدارىن وندىرۋگە ارنالعان تەحنولوگيالىق جابدىقتاردىڭ جەتەكشى ءوندىرۋشىسى. گەرمانيانىڭ يننوۆاتسيالىق تەحنولوگياسى مەن جابدىقتارى نەگىزىندە سالىنعان. مۇنداعى تەحنولوگيالار مىڭنان استام ءونىم اتاۋىن شىعارۋعا جانە ءوندىرىستى نارىق قاجەتتىلىكتەرىنە بەيىمدەۋگە مۇمكىندىك بەرەدى. كاسىپورىن ءوز ونىمدەرىمەن جەتىسۋ ءوڭىرىن عانا ەمەس, قازاقستان نارىعىن دا قامتاماسىز ەتىپ وتىر», دەدى بولات كەرىمبەك.
كىرپىش زاۋىتى وڭىردەگى قۇرىلىس سالاسىن قولداپ, ساپالى ونىممەن عانا ەمەس, جەرگىلىكتى تۇرعىنداردى تۇراقتى جۇمىسپەن قامتۋدا. مۇندا 100-دەن استام ادام قىزمەت ەتەدى. ءماجىلىس دەپۋتاتتارى جۇمىسشىلاردىڭ ەڭبەك جاعدايلارىنا نازار اۋداردى.
«سىزدەر مەملەكەتىمىزدىڭ دامۋى جولىندا ۇلكەن جۇمىس اتقارىپ كەلەسىزدەر. وسى جەردە ايتىلعان ماسەلەلەردىڭ بارلىعىن ءبىز ءتيىستى مەكەمەلەرگە جەتكىزەتىن بولامىز», دەدى رۋسلان قوجاسباەۆ.
وبلىس قۇرىلعان كۇننەن باستاپ 43 جاڭا ءوندىرىس ىسكە قوسىلىپ, جۇمىس ىستەپ تۇرعان 9 كاسىپورىن كەڭەيتىلگەن. ناتيجەسىندە مىڭنان استام ادام جاڭا جۇمىس ورنىمەن قامتىلدى. قازىر وبلىستا تسەمەنت, اككۋمۋلياتور باتارەيالارىن, كەراميكا پليتكالارىن شىعارۋ جولعا قويىلىپ, قۇراما جەم, كۇن پانەلدەرىنىڭ ءوندىرىسى دامۋدا. جالپى وڭىردە 549 ءوندىرىس ورنى تىركەلىپ, ولاردا 30 مىڭنان استام ادام جۇمىس ىستەيدى. ونەركاسىپتەگى وڭدەۋ سەكتورىنىڭ ۇلەسى 76,4 پايىزدى قۇرايدى.
سونىمەن قاتار ماجىلىستەگى «اق جول» فراكتسياسىنىڭ دەپۋتاتى قازىبەك يسا تۇركىستان وبلىسىنىڭ زيالى قاۋىم وكىلدەرىمەن كەزدەستى. اڭگىمەلەسۋ بارىسىندا قازىبەك يسا رۋحانياتتى قولداۋعا باعىتتالعان بىرقاتار باستامالارعا توقتالدى. سونىڭ ىشىندە جۋىردا عانا ماجىلىستە قابىلدانعان تۇركىستان قالاسىنا ەرەكشە مارتەبە بەرۋ تۋرالى زاڭى زيالى قاۋىم وكىلدەرى تاراپىنان ەرەكشە قولداۋ تاپتى.
«تۇركىستانعا ەرەكشە مارتەبە بەرۋ تۋرالى زاڭ قابىلداندى. ونى دايىنداۋعا وبلىسىمىزداعى بىرقاتار زيالىلار اتسالىستى. قانشاما تالقىلاۋ مەن ۇسىنىستار ايتىلدى. پارلامەنتتە قولداۋ تاپقانىنا قۋانىشتىمىز. تۇركىستان تاريحىنىڭ جاڭاشا تۇلەۋگە جول اشىلعانىنا شىنايى ريزامىز», دەدى تاريحشى حازرەتالى تۇرسىن.
ال قازىبەك يسانىڭ ايتۋىنشا, اتالعان زاڭ تۇركىستانعا ەرەكشە مارتەبە بەرىپ قانا قويماي, قالانىڭ قارىشتاپ دامۋىنا, وڭىرگە قوماقتى ينۆەستيتسيا تارتۋعا, مادەني-رۋحاني قۇندىلىقتاردىڭ ساقتاپ قالۋعا زور سەپتىگىن تيگىزبەك.
ءوز كەزەگىندە «Turkistan Media Holding» باسقارۋشى ديرەكتورى تەلمان بەيسەن تاريحي ورىندار سانالاتىن «قىزقورعان», «بالاقورعان» قامالدارىن مەملەكەتتىك قورعاۋعا الۋدى ۇسىندى. وسى كيەلى جەرلەرگە باراتىن جولدى جوندەپ, تۋريستەرگە قولايلى جاعداي جاساۋعا شاقىردى.
«كەشەگى ءبىزدىڭ قابىلداعان زاڭىمىز وسىنداي قۇندىلىقتارعا قىزمەت ەتۋى كەرەك. قاسيەتتى جەرلەردىڭ ماڭىزىن ساقتاۋىمىز قاجەت», دەدى قازىبەك يسا.
