پەتروپاۆل. 1 مامىر.قازاقستان حالقىنىڭ بىرلىگى كۇنى قىزىلجار وڭىرىندە دە دوستىق پەن تاتۋلىقتىڭ, بەيبىتشىلىك پەن مىزعىماس تۇراقتىلىقتىڭ مەرەكەسى رەتىندە كوتەرىڭكى كوڭىلمەن, جارقىن جۇزبەن اسقاق رۋحتا اتالىپ ءوتتى. بۇل تۋرالى egemen ءتىلشىسى حابارلادى.
ادامدار ءبىر-بىرىنە اماندىق, ساۋلىق جولداپ, ەلىمىزدىڭ ايبارى اسقاقتاي بەرۋىن تىلەدى. قازاقستان حالقى اسسامبلەياسىنىڭ 20 جىلدىق مەرەيتويىمەن تۇسپا-تۇس كەلگەن مەرەكە ەل دامۋىنىڭ قارىشتى قادامى, بەدەل-ابىرويىمىزدىڭ اسقاقتاۋ, ءار شاڭىراقق ا شاتتىق قونعان, ۇلتتار مەن ۇلىستاردى ۇيىستىرعان مەيرام رەتىندە باعالانىپ, ۇلتتىق قۇندىلىقتارىمىزدىڭ قادىر-قاسيەتتەرى ۇلىقتالدى.
مەرەكە سالتاناتى تاۋەلسىزدىك ستەللاسى جانىنان باستالدى. وندا وبلىس اكىمى ەرىك سۇلتانوۆ تۇرعىندارعا جىلى لەبىزگە تولى قۇتتىقتاۋىن ارناپ, ەلباسى اتىنان 36 سولتۇستىكقازاقستاندىققا «قازاقستان حالقى اسسامبلەياسىنا–20» مەرەكەلىك مەدالىن تابىس ەتتى.
قالانىڭ بارلىق ىقشام اۋداندارىندا ۇيىمداستىرىلعان مەرەكەلىك باعدارلامالاردى قىزىقتاعان جۇرتشىلىق قاتارى قالىڭ بولدى. دوستىق ۇيىندە وتكەن «حالىقتاردىڭ اسىل قازىناسى» اتتى بايقاۋعا 19 ەتنوس كلۋب قىزىعۋشىلىق كورسەتىپ, ءوز نومىرلەرىندە ورتاق شاڭىراق استىندا ءبىر ءۇيدىڭ بالاسىنداي, ءبىر قولدىڭ سالاسىنداي تاتۋ-ءتاتتى ىنتىماقتا ءومىر ءسۇرىپ جاتقان ۇلىستاردىڭ باياندى تىرلىگىن, بەرىك بىرلىگىن ارقاۋ ەتتى. «قوعامدىق كەلىسىم» مەكەمەسى ۇيىمداستىرعان «ماڭگىلىك ەل: ءبىر حالىق, ءبىر تاعدىر» كونكۋرسى كوپشىلىك تالعامىنان شىقتى. وندا بالالار ءارتۇرلى تاقىرىپتار بويىنشا سۋرەت سالۋدان سىنعا ءتۇسىپ, شىعارماشىلىق قارىم-قابىلەتتەرىن تانىتتى. اباي مەن پۋشكين ەسكەرتكىشى قاسىندا «دوستىقتىڭ ساز الەمى» مۋزىكالىق-بي كومپوزيتسياسى قانات قاقسا, «اسسامبلەيا اۋرى» اتتى ءتۇرلى ەتنوستاردىڭ ادەمى ارۋلارى قاتىسقان بايقاۋ دا ءوز كورەرمەندەرىن ريزا ەتتى. دەمالىس جانە مادەنيەت ساياباعىندا ستۋدەنت-جاستار «دوستىق دارحانى» فلەش-موب, قىزىقتى كونكۋرستار ۇيىمداستىردى.
مەرەكەنىڭ ءسانىن قازاقستاندىقتاردىڭ تاتۋلىعى مەن كەلىسىمىن پاش ەتكەن كەشكى مەرەكەلىك كونتسەرت كەلتىردى. ول شىن مانىندەگى دوستىق ءان-جىر, بي ارقاۋىنا اينالىپ, قىر بەتىن قىزعالداققا تولتىرىپ جىبەرگەندەي اسەرگە بولەدى.
ءومىر ەسقالي.
دەرەك: egemen.kz
سۋرەت: تالعات تانىباەۆ.
