قوستاناي. 1 مامىر. قوستاناي قالاسىنىڭ ورتالىق الاڭىندا 1 مامىر مەرەكەسىنە وراي ءتۇرلى ۇلتتار مۋزىكالىق اسپاپتارىنىڭ كورمەسى ءوتتى. بۇل تۋرالى egemen.kz ءتىلشىسى حابارلادى.
كورمەگە قوستاناي وبلىسىنداعى 18 ەتنومادەني بىرلەستىكتەرى ءوز ۇلتىنىڭ مۋزىكالىق اسپاپتارىن قويدى. وندا قازاقتىڭ دومبىراسى مەن قوبىزى, شاڭقوبىزى, سىبىزعىسى, ورىستىڭ بالالايكاسى مەن دامبراسى, سىرنايى, تاتاردىڭ سىرنايى, باشقۇرتتىڭ سىبىزعىسى سەكىلدى كوپتەگەن اسپاپتاردى تاماشالاۋعا بولادى.
ءازىربايجان ەتنومادەني بىرلەستىگى جاستار قاناتىنىڭ ءتورايىمى ءزۇلفيا نابيەۆا: «وبلىستىق دوستىق ءۇيىنىڭ 1 مامىر مەرەكەسىنە وراي ءتۇرلى ۇلتتار مۋزىكالىق اسپابىنىڭ كورمەسىن ۇيىمداستىرۋى دۇرىس شەشىم بولدى. قوستانايلىقتار ءار اساپاپتى قىزىقتاپ عانا قويماي ونىڭ ءۇنىن ەستىگىسى كەلەدى. مۇنىڭ بارلىعىنىڭ تانىمدىق جاعى دا ماڭىزدى» دەدى. ورتالىق الاڭدا ورىس, قازاق حالىق اسپاپتار انسامبلدەرى ءتۇرلى ۇلتتاردىڭ شىعارمالارىن ورىندادى.
قوستاناي قالاسىنىڭ تۇرعىنى كۇلايشا جۋاسپاەۆا: «ءتۇرلى ۇلتتاردىڭ مۋزىكالىق اسپاپتارىن تاماشالادىم. مەن كورمەگەن اسپاپتار دا بار ەكەن. قىرعىزدىڭ قومىزىن قىرعىز بالاعا ويناتىپ, ءبىراز تىڭدادىم. كورەي حالقىنىڭ سامۋلنوري اسپابىن قوستانايلىق قىزدار ارنايى استاناعا بارىپ ۇيرەنىپ كەلىپتى. وتە ادەمى وينادى. دوستىعىمىز, وسىنداي بىرلىگىمىز جاراسا بەرسىن» دەدى.
ادامدار ءبىرىن ءبىرى بىلگەن سايىن ولاردىڭ دوستىعى, بىرلىگى ارتادى. ۇلتتاردىڭ مۋزىكالىق اسپاپتارى كورمەسى سوعان قىزمەت ەتەدى. مۇنى مەرەكەنى ۇيىمداستىرۋدىڭ باسىندا جۇرگەن وبلىستىق مادەنيەت باسقارماسىنىڭ باسشىسى لاريسا سەروۋس تا قوستادى.
لاريسا سەروۋس: «بيىلعى مەرەكە قازقستان حالقى اسسامبلەياسىنىڭ 20, ۇلى وتان سوعىسىنداعى جەڭىستىڭ 70, قازاق حاندىعىنىڭ 550 جىلدىعىمەن تۇستاس كەلدى. سوندىقتان ءبىز كوشەدە تەك تاماق, ساۋدا ۇيىمداستىرماي, مەرەكەنىڭ تانىمدىق جاعىنا كوپ كوڭىل بولدىك. قازاقستاندا تۇراتىن ەتنوستاردىڭ ۇلتتىق مۋزىكالىق اسپاپتارىنىڭ كورمەسى سونىڭ ايعاعى. مەرەكەگە كەلگەندەر ءار اسپاپتىڭ تابيعي داۋىسىن ەستۋدى قالايتىنىن ايتادى. ەتنومادەني بىرلەستىكتەر مۇشەلەرى قولىنان كەلگەنشە اسپاپتاردا ويناپ بەردى. مۇنىڭ بارلىعى ۇلتتار دوستىعىن نىعايتادى» دەدى.
ءنازيرا جارىمبەتوۆا.
دەرەك, سۋرەت: egemen.kz
