وسكەمەن. 4 اقپان. مەملەكەتتىك قىزمەت ىستەرى جانە سىبايلاس جەمقورلىققا قارسى كۇرەس اگەنتتىگىنىڭ شىعىس قازاقستان وبلىسى بويىنشا دەپارتامەنتىنىڭ جەتەكشىسى عالىمبەك دوسانوۆ شىعىس وڭىرىندەگى ءباسپاسوز وكىلدەرىمەن كەزدەستى. بۇل تۋرالى egemen.kz ءتىلشىسى حابارلادى.
«2015-2025 جىلدارعا ارنالعان سىبايلاس جەمقورلىقپەن كۇرەس ستراتەگياسى» تاقىرىبىندا وتكەن اشىق ديالوگقا وبلىستىق, قالالىق جانە اۋداندىق باق باسشىلارى قاتىستى.
ع.دوسانوۆ دەپارتامەنتتىڭ اتالعان ستراتەگيانىڭ جەمقورلىقتىڭ الدىن الۋ جۇمىستارىن نىعايتۋعا مۇمكىندىك بەرەتىنىن اتاپ ءوتتى.
«جۋىقتا قۇرىلعان دەپارتامەنتىمىزدىڭ ۇستانىمى – حالىققا قىزمەت ەتۋ. ءبىرىنشى كەزەكتە, ءتۇسىندىرۋ جۇمىستارى بالاباقشالاردان باستالۋى ءتيىس. قوعامدىق پىكىردىڭ نەگىزگى بولىگى جەمقورلىققا قارسى باعىتتالۋى قاجەت», – دەدى ع.دوسانوۆ.
دەپارتامەنت باسشىسى جەمقورلىقپەن كۇرەسۋدە وزگە مەكەمەلەردىڭ بىرىگۋى دە ۇلكەن ماڭىزعا يە ەكەنىن جەتكىزدى.
«جەمقورلىق – ەلدىڭ الەۋمەتتىك-ەكونوميكالىق دامۋىنا كەدەرگى كەلتىرەدى جانە ينۆەستيتسيالىق تارتىمدىلىعىنا نۇقسان كەلتىرەدى. وعان تويتارىس بەرۋ ءۇشىن نەگىزگى ۇكىمەتتىك مەكەمەلەر ءوز كۇشتەرىن بىرىكتىرۋى قاجەت. وسىعان وراي, دەپارتامەنت پەن باق-تىڭ نەگىزگى مىندەتى – حالىققا اقپاراتتى شىنايى جەتكىزۋ بولماق. سوندىقتان, بارشاڭىزدى سىبايلاس جەمقورلىقپەن كۇرەس شارالارىندا ارىپتەس بولۋعا شاقىرامىن», – دەدى ول.
دۋمان اناش.
دەرەك: egemen.kz.
سۋرەت: شىعىس قازاقستان وبلىسىنىڭ اقپاراتتىق ورتالىعى.
