پرەمەر-ءمينيستردىڭ ورىنباسارى سولتۇستىك قازاقستانعا كەلدى

پەتروپاۆل. 4 اقپان. پرەمەر-ءمينيستردىڭ ورىنباسارى بەردىبەك ساپارباەۆتىڭ جۇمىس ساپارى بۇگىن سولتۇستىك قازاقستان وبلىسىندا جالعاستى. بۇل تۋرالى وبلىستىق اكىمدىكتىڭ ءباسپاسوز قىزمەتى حابارلادى. ب.ساپارباەۆتىڭ قاتىسۋىمەن پەتروپاۆل قالاسىندا وتكەن القالى باس قوسۋعا مينيسترلىكتەر مەن ۇلتتىق كومپانيالاردىڭ وكىلدەرى, جەرگىلىكتى ءىرى كاسىپورىندار, اگروقۇرىلىمدار, ۆەدوموستۆولار, سالالىق كاسىپوداق ۇيىمدارىنىڭ جەتەكشىلەرى قاتىسىپ, الەمدە ورىن الىپ وتىرعان قارجى داعدارىسىنا قارسى پارمەندى كۇرەس جۇرگىزۋ جولدارىن تالقىعا سالدى. جيىندى ايماق باسشىسى ەرىك سۇلتانوۆ كىرىسپە سوزبەن اشىپ, وبلىستىڭ الەۋمەتتىك-ەكونوميكالىق دامۋ جايىنان حاباردار ەتتى. بەردىبەك ماشبەك ۇلى ەلباسى ۇكىمەت پەن اتقارۋشى بيلىك ورىندارى الدىنا حالىقتىڭ ءومىر ساپاسىن جاقسارتۋ, الەۋمەتتىك مىندەتتەمەلەردى مۇلتىكسىز ورىنداۋ مىندەتتەرىن قويعانىن, بۇل جولدا بارلىق ۇيىمداستىرۋشىلىق, تاباندى جۇمىس شارالارىن بارىنشا جۇمىلدىرۋ قاجەتتىگىن, جولداۋ تاپسىرمالارىن ورىنداۋدىڭ مىندەتتىلىگىن اتاپ كورسەتتى. وبلىس اكىمىنىڭ ورىنباسارى مۇرات اۋكەنوۆ, پەتروپاۆل اۋىر ماشينا جاساۋ زاۋىتىنىڭ باس ديرەكتورى قۋانىش ءبيشىموۆ, اۋىل شارۋاشىلىعى كەشەنى كاسىپوداق كوميتەتىنىڭ توراعاسى الفرەد ماۆليۋتوۆ قارجىلىق قيىندىقتاردى ەڭسەرۋ, الدىن الۋ شارالارىنا قاتىستى وي-ۇسىنىستارىن ورتاعا سالدى. جيىن سوڭىندا وبلىستىق اكىمدىك, كاسىپوداق جانە ءىرى كاسىپورىندار مەن ۇلتتىق كومپانيالار اراسىنداعى تىعىز قارىم-قاتىناسقا نەگىزدەلگەن جاڭا جۇمىس ورىندارىن اشۋ, جۇمىسسىزدىق دەڭگەيىن كەمىتۋ, ادامداردىڭ قۇقىقتىق كەپىلدەمەلەرىن قامتاماسىز ەتۋ, ەڭبەك قاتىناستارىنداعى تۇراقتىلىقتى ساقتاۋ مۇددەلەرىن كوزدەيتىن 14 مەموراندۋمعا قول قويىلدى. ولاردىڭ قۇنى 18 ميلليارد تەڭگەنى قۇرايدى. ءومىر ەسقالي.                   دەرەك: سولتۇستىك قازاقستان وبلىستىق اكىمدىگىنىڭ ءباسپاسوز قىزمەتى. سۋرەت: «قازاقپارات».