وسكەمەن. 4 اقپان. شىعىس قازاقستان وبلىسىنىڭ كاسىپكەرلەر پالاتاسى مەن قىتاي حالىق رەسپۋبليكاسى شۇار التاي ايماعىنىڭ حالىقارالىق ساۋدا پالاتاسى ءوزارا ىنتىماقتاستىق جونىندەگى مەموراندۋمعا قول قويدى. بۇل جونىندە egemen.kz ءتىلشىسى حابارلادى.
شىعىس قازاقستانعا قىتايدىڭ التاي ايماعىنان جۇمىس ساپارىمەن ارنايى دەلەگاتسيا كەلدى. ەكى جاقتى كەزدەسۋ بارىسىندا تاراپتار ءوزارا ىنتىماقتاستىق تۋرالى مەموراندۋمعا قول قويدى. اتالعان كەلىسىمنىڭ ماقساتى – ءوزارا ىنتىماقتاستىقتى كۇشەيتە وتىرىپ, ىسكەر سەرىكتەس تابۋ, سونداي-اق زاڭگەرلىك كەڭەس قىزمەتىن كورسەتۋ.
«شەكارالاس ايماق رەتىندە شىعىس قازاقستان ءۇشىن قىتايلىق ارىپتەستەرمەن سەرىكتەستىكتى كۇشەيتۋدىڭ ماڭىزى زور. ءبىز ينۆەستيتسيانىڭ قۇيىلۋىنا, جاڭا تەحنولوگيالاردىڭ ەنگىزىلۋىنە قىزىعۋشىلىق تانىتامىز. ەكى ەل اراسىنداعى تاۋار اينالىمى كولەمىنىڭ كورسەتكىشى جوعارى. سوندىقتان سەرىكتەستىكتى كۇشەيتۋگە كورشى ەل دە كۇش سالادى دەپ ويلايمىن», – دەدى وڭىردەگى كاسىپكەرلەر پالاتاسىنىڭ توراعاسى يگور شاتسكي.
قىتايدان كەلگەن وكىلدەر ي.شاتسكيمەن كەلىسەتىندىكتەرىن جەتكىزدى. وسىلايشا, قوس تاراپ كورمەلىك ءىس-شارالاردى ۇيىمداستىرۋ جانە اقپاراتتاندىرۋ بويىنشا قولداۋ, ماسەلە تۋىنداتاتىن ساۋالدار توڭىرەگىندە بىرلەسە جۇمىس جاساۋ, سونداي-اق كورمەلىك-جارمەڭكەلىك سالانى دامىتۋ بويىنشا كەلىسىم جاساستى.
دۋمان اناش.
دەرەك: egemen.kz.
سۋرەت: شىعىس قازاقستان وبلىسىنىڭ اقپاراتتىق ورتالىعى.
