وسكەمەن. 4 اقپان. بيىل وسكەمەن قالاسىنىڭ گاگارين اتىنداعى بۋلۆارىندا قالا تۇرعىندارىنىڭ دەمالىسىنا ارنالعان الاڭقاي سالىنادى. شاھار باسشىسى تەمىربەك قاسىمجانوۆ تۇرعىندارمەن ەسەپتىك كەزدەسۋىندە وسىلاي دەدى. بۇل جونىندە egemen.kz ءتىلشىسى حابارلادى.
جيىندا وكتيابر اۋدانىندا «جاسىل ايماق» قۇرۋ تۋرالى وسكەمەندىكتەردىڭ ۇسىنىسىنا الاڭقاي قۇرىلىسىنىڭ جۇمىستارى باستالىپ كەتكەنى ايتىلدى.
«سىزدەردىڭ وتىنىشتەرىڭىز ورىندى. قالانىڭ بارلىق اۋدانىندا «جاسىل ايماق» بولۋى كەرەك. سوندا قالا تۇرعىندارى بالا-شاعاسىن كوتەرىپ, دەمالۋ ءۇشىن الىسقا بارمايدى. قازىر وسى باعىتتا جۇمىستار جۇرگىزىلىپ جاتىر. گاگارين بۋلۆارىندا بالالارعا ارنالعان ويىن الاڭى بار دەمالىس ءمۇيىسى بوي كوتەرەدى», – دەدى قالا اكىمى.
اعىمداعى جىلى پايدالانۋعا بەرىلەتىن الاڭقايدان وزگە, مەتاللۋرگتەر ساياباعى قالا اكىمدىگىنىڭ مەنشىگىنە الىنعانى ءمالىم بولدى. بارلىق ءتيىستى قۇجاتتار رەسىمدەلىپ بولعان سوڭ, اتالعان ساياباق جاڭا كەستەگە ساي جۇمىس ىستەمەك. ياعني, مەتاللۋرگتەر ساياباعى قالا تۇرعىندارى مەن قوناقتارى ءۇشىن جاز جانە قىس ماۋسىمدارىندا دا اشىق بولادى.
دۋمان اناش.
دەرەك: egemen.kz.
سۋرەت: وسكەمەن قالاسى اكىمدىگىنىڭ ءباسپاسوز قىزمەتى.
