كەلەر جىلى ءان اتاسى – امىرەنىڭ پاريجدە ءان شىرقاپ, كۇللى فرانتسۋز حالقىن ۇنىمەن ۇيىتقان تاريحي ساتكە عاسىر تولادى. اتاۋلى داتاعا وراي ەرتەرەك قامدانعان ەلوردالىق تەاتر ۇجىمى ءانى مەن ءسانى, ءمانى مەن مازمۇنى كەلىسكەن كوركەمدىك دەڭگەيى جوعارى ۇزدىك تۋىندىنى ومىرگە اكەلىپتى. باستى ءارى نەگىزگى ءرولدى ايتۋلى تەاتردىڭ تالانتتى اكتەرى ورازالى يگىلىك ءوز دەڭگەيىندە كەمەلىنە كەلتىرە ويناپ شىقتى.
جالپى, مونوسپەكتاكل – قويىلىم تۇرلەرىنىڭ ىشىندەگى ەڭ اۋىرى ءھام قيىنى. كەزىندەگى كاسىبي تەاتر نەگىزىن قالاعان قاليبەك قۋانىشباەۆ, ەلۋباي ومىرزاقوۆ, سەركە قوجامقۇلوۆ سىندى ساڭلاقتار سالعان ساحناداعى سارا جول سونىڭ ايعاعى بولسا كەرەك. دەمەك, مونوسپەكتاكلگە بارا الاتىن اكتەردىڭ دە شەبەرلىك ءھام شىعارماشىلىق قۋاتى مىقتى بولعانى ابزال. ولاي بولماعان جاعدايدا, مونوسپەكتاكلىڭىز دە ءوز دىتتەگەنىنە جەتپەي جىعىلادى. بۇل تۇرعىدان كەلگەندە, امىرە ءرولىن وينايتىن اكتەرگە رەجيسسەر تاڭداۋى ءدوپ تۇسكەن. ءانى دە, ءسانى دە, ءۇنى دە, ۇعىمى دا ءبىر بويىندا ۇتىمدى ۇيلەسكەن تالانتتى ءارتىس, شىن مانىندە, كورەرمەنىن امىرە الەمىنە جاقىنداتقانداي بولدى.
راس, بۇعان دەيىن كينو تىلىندە دە, ساحنا تورىندە دە ءتۇرلى امىرەلەر قويىلىپ كەلدى عوي. بىراق كەيدە سول قويىلىمداردان امىرەنى تابا الماي ءجيى پۇشايمان كۇي كەشەتىنىمىز ۇمىتىلا قويعان جوق. سەبەبى بىردە رەجيسسەر اڭىز ءانشىنىڭ ءتىلىن قازاقشاعا شورقاق, كوركىن كۇن قاقپاعان تىم جىلتىراق اسفالت بالاسى دەپ كورسە, كەلەسىدە باس كەيىپكەر ەكىنشى ورىنعا سىرعىپ, باستى پلانعا 1925 جىلعى پاريجدەگى جارمەڭكە اتموسفەراسى شىعىپ كەتىپ, كوڭىل كۇمىلجيتىن. ال ءتىپتى, ەندى بىرىندە ءان سالا المايتىن اكتەرلەر ساحنادا امىرە بولىپ جۇرگەنىن كورىپ كوڭىل قالعان تۇستار دا ءجيى ۇشىراستى شىعارماشىلىق تاجىريبەمىزدە. ال بۇل امىرەنى بىردەن قابىلداۋىمىزدىڭ سىرى – قازاقتىڭ يەن دالاسىندا وسكەن قارا بالانىڭ رۋحى, شىڭىلتىر ءۇنى باستى ءرولدى سومداعان اكتەر ورازالى يگىلىكتىڭ بويىنان تابىلدى, ونىسى مونوسپەكتاكل تابيعاتىندا ءساتتى اشىلدى. كەسكىندەيتىن بەينەسىن, كەيىپكەرىن ىشىنە سىڭىرگەنى سونشالىق, اكتەردىڭ امىرە رۋحىمەن بىتەقايناسىپ كەتكەندەي اسەر قالدىردى.
شىعارماشىلىق توپتىڭ وسى ەڭبەگىن جوعارى باعالاعان «تەاتر سىنشىلارى بىرلەستىگى» استانا قالاسى اكىمدىگى مۋزىكالىق جاس كورەرمەن تەاترىنىڭ «امىرە» قويىلىمىن «جىلدىڭ ۇزدىك مونوسپەكتاكلى» دەپ تانىدى.
