سەبەبى ول رەجيسسەر ءادىلحان ەرجانوۆپەن تاندەمدە تۇسىرگەن «قوجايىندار» فيلمىندەگى العاشقى وپەراتورلىق جۇمىسىمەن الەمنىڭ ەڭ ءىرى كينوفەستيۆالدەرىنىڭ ءبىرى – «كاننعا» جولداما الدى. كينو كەڭىستىگىندەگى اسا بەدەلدى ماراپات «ازيانىڭ وسكارى» اتالىمىنداعى جۇلدەگە يە بولدى. كينو الەمىندەگى ودان كەيىنگى ءىرىلى-ۇساقتى جەڭىستەرىنە ءتىپتى سان جەتپەيدى. ەندى, مىنە, بيىل ول تۇسىرگەن «دالا قاسقىرى» ءفيلمى «Fantasia Film Festival» اتتى كينوفەستيۆالدە جوعارى باعالانىپ, امەريكا كينو ونەرى جانە عىلىم اكادەمياسىنا مۇشەلىككە قابىلداندى. اتالعان اكادەميانىڭ مۇشەسى بولعان ەركىنبەك پىتىراليەۆ ەندى ۇيىم جىل سايىن تابىستايتىن «وسكار» سىيلىعىنىڭ لاۋرەاتتارىنا داۋىس بەرە الادى. بۇل تۋرالى تاسپاگەردىڭ ءوزى دە الەۋمەتتىك جەلىدەگى پاراقشاسىنا جازىپ, كورەرمەنىنەن ءسۇيىنشى سۇرادى.
«بۇل – مەن ءۇشىن ۇلكەن قۇرمەت جانە كينو الەمىنە قوسقان ۇلەسىمدى مويىنداۋ. كينويندۋستريانىڭ ەڭ ۇزدىك وكىلدەرىن بىرىكتىرەتىن وسىنداي بەدەلدى ۇيىمنىڭ ءبىر بولىگى بولۋدىڭ كەرەمەت مۇمكىندىگى تۋعانىنا ريزامىن. كينو ونەرىنىڭ بولاشاعىن قالىپتاستىراتىن ماڭىزدى شەشىمدەر مەن داۋىس بەرۋگە قاتىسۋدى اسىعا كۇتەمىن. وسى جولدا ماعان قولداۋ كورسەتىپ, سەنگەندەردىڭ بارلىعىنا راحمەت», دەپ جازدى كينووپەراتور جەلىدەگى پاراقشاسىندا.
ءيا, وتاندىق كينووپەراتوردىڭ ىزدەنىسكە تولى جۇمىسىن كينو ماماندارى «جارىق پەن كولەڭكەنى ۇتىمدى ويناتا الۋىمەن ەرەكشەلەنەدى» دەپ جوعارى باعالايدى. ال جارىقتى كورە ءبىلۋ, ءتۇستى سەزىنۋ – سۋرەتشى, وپەراتور ماماندار ءۇشىن ۇلكەن قاسيەت. كوپتىڭ بارىنە بۇيىرا بەرمەيتىن بىرەگەي قابىلەتتى بويىنا دارىتقان تاسپاگەر ءار جۇمىسىمەن جاڭا بەلەسكە شىعىپ, ىزدەنىسىمەن ۇلتتىق كينەماتوگرافيادا ىرگەلى ءىز قالدىرىپ كەلەدى. ايگىلى «وسكار» سىيلىعىنا ۇمىتكەرلەر ۇزدىگىن تاڭداۋعا اتسالىسۋ قۇقىعىنا يە بولۋىنىڭ ءوزى – قازاق وپەراتورىنىڭ شىن مانىندە مىقتىلىعىن مويىنداتسا كەرەك.
