وسكەمەن. 4 اقپان. وسكەمەن قالاسىنىڭ اكىمى تەمىربەك قاسىمجانوۆ وبلىس ورتالىعىنىڭ ابلاكەتكا جانە وكتيابر اۋداندارىنىڭ تۇرعىندارىمەن ەسەپتىك كەزدەسۋ وتكىزدى. بۇل تۋرالى egemen.kz ءتىلشىسى حابارلادى.
قالا اكىمى اتاپ وتكەندەي, وتكەن جىلى اتالعان اۋدانداردا اسفالت جابىندىلارى توسەلىپ, 18 شاعىن ساۋلەتتىك مۇسىندەر ورناتىلدى.
تۇرعىن ءۇي-كوممۋنالدىق شارۋاشىلىعىن جاڭعىرتۋ باعدارلاماسى شەڭبەرىندە اۋەزوۆ داڭعىلى مەن قازاقستان, قايسەنوۆ, پروتوزانوۆ, كرىلوۆ, پراۆدا, وستروۆسكي كوشەلەرىندەگى 11 ءۇيدىڭ جىلۋ جانە سۋ جۇيەلەرى اۋىستىرىلىپ, كارىز قۇبىرلارى, سامالدىقتارى مەن شاتىرلارى جوندەلدى. ۇيلەردىڭ توزىعى جەتكەن قاسبەتى قالپىنا كەلتىرىلدى.
كراسينا مەن لوگ شمەلەۆ شاعىن اۋداندارىن ساپالى سۋ قۇبىرىمەن قامتاماسىز ەتۋ ءۇشىن جوبالىق-سمەتالىق قۇجاتتار جاسالۋدا. اعىمداعى جىلى №3 قازاندىقتان «پرومبازا» تۇرعىن ءۇي اۋدانىنا دەيىن جىلۋ تراسساسىنىڭ قۇرىلىسى باستالادى.
وبلىس ورتالىعىنىڭ كورىكتەندىرىلۋىن جاقسارتۋ جانە تۇرعىنداردىڭ قاۋىپسىزدىگىن قامتاماسىز ەتۋ ماقساتىندا مىزا كوشەسىنىڭ بويىنداعى زاڭسىز ساۋدا نۇكتەلەرى جويىلدى. ءدال وسىنداي جۇمىستار بۋروۆ كوشەسى مەن «بەرەزكا» دۇكەنىنىڭ اۋماعىندا جۇرگىزىلۋدە. رۇقسات ەتىلمەگەن قوقىس ورىندارى دا جويىلدى.
قالا تۇرعىندارىنىڭ ءبىرى ەلەنا پوگودينا وسكەمەننىڭ جىل وتكەن سايىن ءوڭى كىرىپ, جاڭارىپ, جاسارىپ كەلە جاتقانىن تۇرعىندار عانا ەمەس, قوناقتار دا بايقاپ جۇرگەنىن ايتا كەلىپ, ءوزى تۇراتىن كوپقاباتتى ۇيدە جەدەلساتىنىڭ پايدالانۋ مەرزىمى ءوتىپ كەتكەنىن, ونىڭ قاشان اۋىستىرىلاتىنىن سۇرادى.
قالا باسشىسىنىڭ ايتۋىنشا, وسكەمەندە 560 جەدەلساتى قىزمەت كورسەتەدى. بۇگىندە 130 جەدەلساتى كوممۋنالدىق مەنشىككە الىنعان. ونىڭ 71-ءى جوندەۋدەن ءوتتى.
«بۇل ماسەلەنى شەشۋدىڭ ەكى جولى بار. جەدەلساتىنى بيۋدجەت ەسەبىنەن جوندەۋدى كۇتۋ كەرەك نەمەسە تۇكش جاڭعىرتۋ باعدارلاماسى اياسىندا تەزىرەك جوندەۋدەن وتكىزىپ, يگىلىگىن كورۋگە بولادى», – دەدى تەمىربەك قاسىمجانوۆ.
دۋمان اناش.
دەرەك: egemen.kz.
سۋرەت: وسكەمەن قالاسى اكىمدىگىنىڭ ءباسپاسوز قىزمەتى.
