بىرىككەن اراب امىرلىكتەرى قازاقستاننىڭ ساياساتىن قولدايدى

استانا. 4 قاڭتار. مەملەكەت باسشىسىنىڭ 2017-2018 جىلدارداعى كەزەڭدە بىرىككەن ۇلتتار ۇيىمى قاۋىپسىزدىك كەڭەسىنىڭ تۇراقتى ەمەس مۇشەلىگىنە ەلىمىزدىڭ كانديداتۋراسىن ىلگەرىلەتۋ شارالارى بويىنشا جولداۋى ءباا پرەزيدەنتى شەيح حاليفا بەن زايد ءال ناحايانعا تابىس ەتىلدى. بۇل تۋرالى strategy2050.kz حابارلادى. «جولداۋدى قازاقستان پرەزيدەنتىنىڭ ارنايى وكىلى, سىرتقى ىستەر ءمينيسترىنىڭ ورىنباسارى اسقار مۋسينوۆ ابۋ ءدابيدىڭ مۇراگەر حانزاداسى شەيح مۇحامەد بەن زايد ءال ناحايانمەن وتكەن كەزدەسۋدە قولما-قول تابىستادى», – دەلىنگەن مينيسترلىكتىڭ حابارلاماسىندا. كەزدەسۋدە بۇۇ قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋ ەلىمىزدىڭ سىرتقى ساياساتىنداعى ماڭىزدى باسىمدىق ەكەنى جانە قازاقستاننىڭ جاھاندىق بەيبىتشىلىك پەن قاۋىپسىزدىككە ۇلكەن ۇلەس قوسۋعا نيەتتى ەكەندىگى اتاپ ءوتىلدى. ا.مۋسينوۆ ەلىمىزدىڭ قاۋىپسىزدىكتىڭ جالپىعا ورتاق تۇجىرىمداماسىنا بەكەمدىگىن اتاپ ءوتتى. بۇل قاۋىپسىزدىكتىڭ, ادام قۇقىقتارىنىڭ جانە تۇراقتى دامۋ ماسەلەلەرىنىڭ ءوزارا بايلانىسى مەن ءوزارا تاۋەلدىلىگىن مەڭزەيدى. ابۋ ءدابيدىڭ مۇراگەر حانزاداسى امىرلىكتەردىڭ قازاقستاننىڭ سىرتقى ساياسي باستامالارىنا قولداۋ كورسەتەتىنىن اتاپ ءوتتى. ايدار ورىسباەۆ. دەرەك: strategy2050.kz. سۋرەت: titus.kz.