زاۋىت ديرەكتورى پاۆەل ساەنكونىڭ ايتۋىنشا, ءوندىرىستىڭ اياقتان تۇرۋىنا «دامۋ» كاسىپكەرلىكتى دامىتۋ قورىنىڭ وڭىرلىك فيليالى ارقىلى بەرىلگەن 2,7 ملرد تەڭگە قولداۋ بولعان.
«وسى قاراجاتتى ءوندىرىس الاڭدارىن كەڭەيتۋگە جۇمسادىق. وعان كاسىپورىن قارجىسىنان 1 ملرد تەڭگە قوسىپ, يتاليادان زاماناۋي قوندىرعىلار ساتىپ الىپ, №2 تسەحتى تۇگەل جابدىقتادىق. جابدىقتار جەتكىزگەن كومپانيا جۇمىسشىلارىمىزدى وقىتىپ بەردى. زاماناۋي جابدىقتار مەن جۇمىسشىلار بىلىكتىلىگىنىڭ ارتۋى ەڭبەك ونىمدىلىگىن ارتتىردى. زاۋىتتا 100 جۇمىسشى ەكى اۋىسىممەن جۇمىس ىستەيدى الداعى جىلى 20 مىڭ توننا مەتالل قۇبىر مەن بۇيىمدار شىعارۋ جوسپارىمىزدا بار», دەيدى پاۆەل پاۆلوۆيچ.
جابدىقتار مەن قوندىرعىلار تۇركيا مەن قىتايدان اكەلىنگەن. ءوندىرىس الاڭدارى تولىق جابدىقتالىپ, جاڭا تسەحتىڭ №4 جانە №5-جەلىلەرى ىسكە قوسىلعان سوڭ, 3 اۋىسىمدىق جۇمىس تاسىلىنە كوشىپ, تاعى 200 ادامدى جۇمىسقا قابىلدايدى.
«قۇبىرلارىمىزدى نەگىزىنەن وتاندىق كومپانيالار ساتىپ الادى. سوڭعى كەزدە وزبەكستاننان كوپ تاپسىرىس ءتۇسىپ, سول جاققا جونەلتىپ جاتىرمىز. كوپ سۇرانىسقا يە ءونىمىمىز – جىلىجاي قاڭقاسىن تۇرعىزۋعا قاجەتتى يىلگىش تەمىرلەر. كوپپاتەرلى ۇيلەردىڭ جەرتولەسىنە سۋ جانە گاز وتكىزگەندە مىندەتتى تۇردە مەتالل قۇبىرلار سالىنادى. اپاتتى جاعدايلاردىڭ الدىن الۋ ءۇشىن ادام تىعىز قونىستاناتىن تۇرعىن ۇيلەردىڭ سۋ نە گاز قۇبىرىن ورتاق تاراتۋ جەلىسىنە پلاستيك نەمەسە مەتالل پلاستيك قۇبىرلار سالۋعا بولمايدى. بۇلار ۇلكەن قىسىمعا شىداماي, جارىلىپ كەتۋى مۇمكىن. سوندىقتان ەڭ سەنىمدىسى – وتكىزۋ قابىلەتى جوعارى ءارى بەرىك مەتالل قۇبىرلار», دەيدى پ. ساەنكو.
مەتالل قۇيمالارى تۇرىندەگى شيكىزات «ارسەلور ميتتال تەمىرتاۋ» كومپانياسىنان جەتكىزىلەدى. مەتالل قۇيمالارى تسەحتا ءتۇرلى قالىپپەن, ءتۇرلى ولشەممەن كەسىلىپ, تسەحتارعا جونەلتىلەدى. قازىر ءوندىرىس ورنىندا شارۋاشىلىقتا كوپ قولدانىلاتىن ديامەترى 120 مم, 159 مم-لىك, 10ح10 سم-لىك قۇبىرلار كوپتەپ دايىندالادى. تاعى ءبىر تسەحتا وندىرىسكە, عيمارات قۇرىلىسىنا پايدالانىلاتىن ديامەترى 120ح120 سم ولشەمدەگى تىكبۇرىشتى قۇبىرلار دا ازىرلەنەدى.
«زاۋىتتان اكەلىنگەن ءارتۇرلى قالىڭدىقتاعى قۇيمانى قالىپقا سالىپ, ءتۇرلى ولشەمدە كەسەمىز. ءبىز كەسىپ بەرگەن ماتەريالدان ءارتۇرلى پىشىندە قۇبىرلار شىعارىلادى. جابدىقتار اۆتوماتتاندىرىلعان. ادام تەك جۇمىس بارىسىن ۇزدىكسىز قاداعالايدى. وتە سيرەك جاعدايدا عانا قولمەن جوندەيمىز. قازىر ءتورتبۇرىشتى, دوڭگەلەك پىشىندەگى قۇبىرلار دايىنداپ جاتىرمىز. جۇمىس بارىسىندا ەڭبەك قاۋىپسىزدىگى تولىق ساقتالادى. ارناۋلى كيىم, كاسكالارىمىز بار. جۇمىسىم تاڭعى ساعات 8-دە باستالىپ, كەشكى 8-گە دەيىن سوزىلادى. تۇنگى اۋىسىمعا باسقا توپ كەلەدى», دەيدى جابدىقتاردى رەتتەۋشى نۇرجان تاجبەنوۆ.
«دامۋ» كاسىپكەرلىكتى قولداۋ قورى اق-نىڭ وڭىرلىك فيليالىنىڭ ديرەكتورى ايناگۇل بايداۋلەتوۆانىڭ ايتۋىنشا, وسى جىلى اقتوبە وبلىسى بويىنشا 1 930 جوبا مەملەكەتتىك قولداۋعا يە بولعان. سونىڭ ءبىرى – وسى اقتوبە مەتالل قۇبىرلار زاۋىتى.
اقتوبە وبلىسى
