كۇمىس كۇلكى كومكەرگەن كەندىرلى

جاڭاوزەن قالاسىنان 70 شاقىرىم قاشىقتىقتاعى كەندىرلى جەرى بۇگىندە جۇرتشىلىققا جاقسى تانىس. تەڭىز مۇيىسىندەگى جاعالاۋى ادام شومىلىپ, دەمالۋعا قولايلى ءوڭىر ماڭعىستاۋ وبلىسىندا تۋريزم سالاسىن دامىتۋعا قاتىستى تاڭداۋعا يە. قازىرگى تاڭدا مۇندا «وزەنمۇنايگاز» اق-قا قاراستى دەمالىس ۇيلەرى مەن «اقبوبەك» بالالار دەمالىس ورتالىعى ورنالاسقان. بالالاردىڭ تەڭىز سۋىنا شومىلىپ, اق قۇمدى جاعالاۋدا دەمالىپ سەرگۋى ءۇشىن كەندىرلى تاپتىرماس ورىن. وسىلاي بولعاندىقتان «وزەنمۇنايگاز» اق جىل سايىن مۇنايشىلار مەن ەنشىلەس كاسىپورىندار قىزمەتكەرلەرىنىڭ بالالارىن «اقبوبەكتە» دەمالتۋدى جولعا قويعان. بىراق, بالالار دەمالىسىن ءماندى دە مازمۇندى وتكىزۋ وڭاي جۇمىس ەمەس, ول ءۇشىن جان-جاقتى دا تياناقتى باعدارلاما, تالانتتى دا ىزدەنىمپاز تالىمگەرلەر, ۇشقىر ۇيىمداستىرۋشىلىق ورتا قاجەت. سوندىقتان كومپانيا باسشىلىعى وتكەن جىلدان باستاپ «اقبوبەك» بالالار دەما­لىس ورتالىعىنىڭ جۇمىسىنا كوكشە­دەگى «بالداۋرەن» رەسپۋبليكالىق وقۋ-ساۋىق­تىرۋ ورتالىعىن تارتتى. رەسپۋب­ليكاداعى بەتكە ۇستار ورتالىق, بىرنەشە جىلداردان بەرى ەلىمىزدىڭ مىڭداعان ورەن­دەرىن دەمالتۋدى جوعارى دەڭگەيدە ۇيىم­داستىرۋمەن تانىلعان «بالداۋرەن» وتكەن جىلى «اقبوبەكتە» العاش رەت جۇمىس جۇرگىزىپ, سەنىم بيىگىنەن كورىنە بىلگەن ەدى. بيىل دا بالالارعا بازارلىعى وسال ەمەس ەكەن. «جاز قاشان باستالار ەكەن, بالالاردىڭ دەمالىسىن ۇيىمداس­تىرا­تىن», دەپ جىلدىڭ قالعان ءۇش مەزگىلىندە قاراپ جاتپاعانى كورىنىپ تۇر. الدىمەن «اقبوبەك» دەمالىس ورتالىعىن كۇردەلى جوندەۋدەن وتكىزىپتى, ءىشى ءبىراز جاڭارىپ قالعان. ال ورتالىق ماڭايىنا رەتپەن وتىرعىزىلعان شىبىقتار كۇنى ەرتەڭ-اق ءزاۋلىم تالدارعا اينالىپ, ورتالىق كوركىنە, بالالاردىڭ ساياسىنا اينالاتىنى ايان. قىزىلدى-جاسىلدى ساحنانىڭ ءسانى ناعىز بالالىق بالداۋرەننىڭ قايعىسىز-قامسىز كۇندەرىن ەلەستەتەدى. بالالار – بولاشاعىمىز دەسەك, ولار ءۇشىن جاسالاتىن جۇمىستاردا اۋىزبىرلىك قاجەت-اق, جوندەۋ جۇمىستارىن جۇرگىزگەن «بالداۋرەنگە» «وزەنمۇنايگاز» اق تەحنيكالارمەن كومەك بەرگەنىن ەستىپ ريزا بولدىق. بيىلعى جىلعى جاڭا ماۋسىم دا سالتاناتتى جاعدايدا اشىلدى. «وزەنمۇنايگاز» اق باس ديرەكتورى ماقسات يباعاروۆ, رەسپۋبليكالىق «بالداۋرەن» وقۋ-ساۋىقتىرۋ ورتالىعى باس ديرەكتورىنىڭ وقۋ-تاربيە ءىسى جونىندەگى ورىنباسارى بىرلىك بارجاقسىنوۆ قاتىسىپ, بالالار دەمالىسىنا ساتتىلىك تىلەدى. بيىل ورتالىق جاز بويى بالالاردى التى اۋىسىممەن قابىلداماق. ءار اۋىسىمدا 8-13 جاس ارالىعىنداعى 200-دەن استام بالا دەمالسا, جاز بويى 1300 بالانى قامتيمىز دەپ وتىر بالداۋرەندىكتەر. بالالارمەن بىرگە ويناپ, ولاردى ونەر مەن ويىندارعا ۇيرەتەتىن 25 تالىمگەر جۇمىسقا قابىلدانعان. تالىمگەرلەردى جۇمىسقا قابىلداۋدا جەرگىلىكتى, ياعني جاڭاوزەن قالاسىنىڭ جاستارىنا باسىمدىق بەرىلگەن, قازىر مۇنداعى تالىمگەرلەردىڭ 90 پايىزى – جاڭاوزەندىكتەر. – بيىل ورتالىقتا تاربيە جۇمىستارىن پاتريوتتىق, سپورتتىق جانە زياتكەرلىك باعىتتا جۇرگىزەمىز دەپ وتىرمىز, – دەيدى «اقبوبەك» بالالار دەمالىس ورتالى­عىنىڭ ديرەكتورى جانگەلدى امىرعاليەۆ. وتكەن جىلى «بالداۋرەن» باسشىلىعى «اقبوبەكتەگى» بالالارمەن جۇمىستى تەك جاز مەزگىلىندەگى دەمالىستارمەن شەكتەمەي, قىس مەزگىلىندە دە الەۋمەتتىك از قامتىلعان وتباسىلاردىڭ بالالارىمەن جۇمىس جۇرگىزۋ, مۇگەدەك بالالاردى وڭالتۋعا ارنالعان ەمدەۋ-ساۋىقتىرۋ جۇمىستارىمەن جالعاستىرۋ جوسپارى بار ەكەندىگىن ايتقان بولاتىن. الايدا, بيىل قىس جوندەۋ جۇمىستارىنا ارنالىپتى. بالالاردىڭ دەمالىسىن ۇيىمداستىرۋعا بەل شەشە كىرىسكەن ەكى تاراپ – «وزەنمۇناي­گاز» اق پەن رەسپۋبليكالىق «بالداۋرەن» وقۋ-ساۋىق­تىرۋ ورتالىعى بۇل جوسپاردى اياقسىز قالدىرمايتىنعا ۇقسايدى. كەي­بىر ماسەلەلەرگە قاتىستى بيىل جۇزە­گە اسپاعان جوبا الداعى كۇندەردىڭ ەنشى­سىندە, دەيدى ولار. مۇگەدەك بالالارىن وڭالتۋ-ساۋىق­تىرۋ ءۇشىن ەلىمىزدىڭ ءبىر قيىرىن­داعى كوكشەگە, بۋرابايعا ارتىنىپ-تارتىنىپ جولعا شىقپاي, ول مۇمكىن­دىك­كە كاسپيدىڭ جاعالاۋىنداعى كەن­دىر­لىدە قول جەتكىزسە, مۇگەدەك بالاسى بار ماڭعىستاۋلىقتار ءۇشىن دە وڭايعا تۇسەيىن دەپ تۇر. «وزەنمۇنايگاز» اق تاراپىنان سەنىم بىلدىرىلگەن رەسپۋبليكالىق «بالداۋرەن» وقۋ-ساۋىقتىرۋ ورتالىعى «اقبوبەكتە» كەزەك­تى جازعى دەمالىستىڭ العاشقى ماۋىسىمىن باستاپ كەتتى. كەندىرلى قازىر بالالاردىڭ جارقىن ۇنىنە شومىلىپ, كۇمىس كۇلكىسىنە كومكەرىلىپ تۇر. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى. سۋرەتتى تۇسىرگەن اۆتور.