سولتۇستىك قازاقستاندا كوكتەمدە سۋ باسىپ قالۋ قاۋپى بار

پەتروپاۆل. 4 اقپان. قاردىڭ كوپ تۇسۋىنە بايلانىستى بيىل سولتۇستىك قازاقستان وبلىسى اۋماعىندا كوكتەمگى سۋ تاسقىنى جىلدىق ورتاشا كورسەتكىشتەن جوعارى بولۋى مۇمكىن. تۇرعىنداردى, نىسانداردى جانە اۋماقتاردى ماۋسىمدىق سۋ تاسقىنىنان قورعاۋعا ارنالعان توتەنشە جاعدايلاردىڭ الدىن الۋ جانە جويۋ جونىندەگى كوميسسيا ماجىلىسىندە وسىنداي بولجام جاسالدى. بۇل تۋرالى وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى حابارلادى. وبلىس اكىمىنىڭ ورىنباسارى ۆلاديمير بۋبەنكو كوكتەمگى سۋ تاسقىنى كەزىندە ويپاڭداعى 18 ەلدى مەكەندى, 302 شاقىرىم اۆتوموبيل جولى مەن 20 شاقىرىم تەمىر جولدى سۋ باسۋ مۇمكىندىگىن جوققا شىعارمادى. وبلىس اۋماعىندا 25 گيدروتەحنيكالىق قۇرىلىس بار. ولاردى كۇردەلى جوندەۋگە رەسپۋبليكالىق جانە جەرگىلىكتى قازىنادانن 347,388 ميلليون تەڭگە ءبولىندى. بىرقاتار سۋ قويمالارىنا, ەسىل وزەنىنە, گيدروتەحنيكالىق قۇرىلىستارعا تۇراقتى تۇردە مونيتورينگ جۇرگىزىلەدى. ماۋسىمدىق سۋ تاسقىنى شارالارىنا جەرگىلىكتى اتقارۋشى ورگانداردىڭ بيۋدجەتىنەن 349,408 ميلليون تەڭگە قاراستىرىلعان. ايماق باسشىسى ەرىك سۇلتانوۆ كوكتەمگى سۋ تاسقىنىنا بايلانىستى كەشەندى شارالاردى جۇزەگە اسىرۋ, ەلدى مەكەندەردى سۋ باسۋ سالدارىنىڭ شىعىندارىن بارىنشا ازايتۋ, اعىندى سۋ وتەتىن قۇبىرلاردى, وتكەلدەردى, جىرالاردى قاردان, كوڭ-قوقىستان تازارتۋ, توتەنشە جاعدايلاردى جويۋ ءۇشىن ينجەنەرلىك جانە جول-قۇرىلىسى تەحنيكالارىن ازىرلەۋ, سۋ قويمالارىنا باقىلاۋ جاساۋ, اۆتوموبيل جانە تەمىر جولداردىڭ بۇزىلۋىنا جول بەرمەۋ, ينەرتتى ماتەريالداردىڭ قاجەتتى قورىن جاساۋ جونىندە ناقتى تاپسىرمالار بەردى. ءومىر ەسقالي. دەرەك: سولتۇستىك قازاقستان وبلىستىق توتەنشە جاعدايلار جونىندەگى دەپارتامەنتتىڭ ءباسپاسوز قىزمەتى. سۋرەت: bnews.kz.