دراماعا الەۋمەتكە ورتاق پروبلەما, قوعامنىڭ دەرتى – ناشاقورلىق تاقىرىبى ارقاۋ بولعان. ءيا, تاعدىر تالكەگىنە ءتۇسۋ ءاپ-ساتتە ەكەن. عاسىرىمىزدىڭ بۇگىنگى دەرتى – ناشاقورلىق, ادامزات تاريحىنداعى قاسىرەتتەردى كوبەيتۋشى, ز ۇلىمدىقتاردى تۋدىرۋشى اپيىن ەكەنىن بىلسە دە, وڭ-سولىن تاني الماعان جاس وسكىن نەگە اداستى؟ دۇرىسى, ونى اداستىرعان كىم؟ ءومىرىن تاس-تالقان ەتكەن جاۋىزداردىڭ جازاسىن كىم بەرەدى؟ كىنالىنى كىم تابادى؟ «S.O.S.» دراماسى ءدال وسى سۇراقتارعا تەاتر تىلىندە جاۋاپ ىزدەۋگە ۇمتىلدى.
«قويىلىمدا ءبىر وتباسىنىڭ باسىنان وتكەن جاعداي باياندالادى. باستى رولدەگى كەيىپكەر ايبار جۇمىس تابا الماي, قينالىپ جۇرگەن شاعىندا ەسىرتكى ساتاتىن جىگىتتەرگە جولىعىپ, جەڭىل اقشانىڭ سوڭىنان كەتەدى. سوڭىندا ۇيىپ وتىرعان ءبىر وتباسىنىڭ شاڭىراعى ورتاسىنا تۇسەدى. جالپى, مۇنداي تاقىرىپ قازىرگى قوعامدا, اسىرەسە, جاسوسپىرىمدەر ءۇشىن وتە وزەكتى دەپ ويلايمىن. جەڭىل اقشا ادامعا ەشقاشان ابىروي اپەرمەيدى. ونىڭ سوڭى, ءتىپتى, تاعدىرلاردى وشپەيتىن وكىنىش, اداسۋعا اكەلىپ, جاس عۇمىرىن وكسىتۋى مۇمكىن. بۇگىنگى كورەرمەندەرىمىزدىڭ كوپشىلىگى جاستار ەكەن. سپەكتاكلىمىز ارقىلى قولىمىزدان كەلگەنشە سولاردىڭ ساناسىنا ءسال دە بولسىن ساۋلە شاشىپ, وي سالا الساق – ماقساتىمىزدىڭ ورىندالعانى», دەيدى رەجيسسەردىڭ ءوزى.
كوستيۋم سۋرەتشىسى ايدانا ەڭگەباي, جارىق قويۋ سۋرەتشىسى ەرمەك مۇحتار ۇلى, دىبىس رەجيسسەرى اسىلجان اسقاروۆ كوركەمدىك دەڭگەيىنە تەر توككەن قويىلىمدا باس كەيىپكەر ايبار ءرولىن قوس قۇرامدا بيبول بايعاراەۆ پەن ابزال اراپوۆ ويناسا, ايبارشانى ارۋجان باعزات پەن ارەلانا امانگەلديەۆا كەيىپتەدى. انا ءرولىن «قۇرمەت» وردەنىنىڭ يەگەرى مايرا ومار مەن اقنيەت زامزات, ديانانى مەرەيىم تالعات پەن نارقىز جانۇزاقوۆا ورىندادى.
«بۇگىنگى سپەكتاكلدە ماعان ايبارشا ءرولى بەرىلدى. ول – باستى كەيىپكەر ايباردىڭ قارىنداسى. ايبارشا اعاسىنىڭ جاساعان قاتەلىگىن جۋىپ-شايۋ ءۇشىن ەسىرتكى قابىلداۋعا ءماجبۇر بولادى. جالپى, ءبىزدىڭ باعىت مۋزىكالىق جاس كورەرمەن تەاترى بولعاندىقتان, قويىلىمدارىمىزدى تاماشالاۋعا كوبىنەسە مەكتەپ وقۋشىلارى مەن ستۋدەنتتەر كەلەدى. سوندىقتان جاستار اراسىنداعى لۋدومانيا, ەسىرتكىگە قارسى قويىلعان ايتۋلى درامادا زياندى ادەتتەردىڭ زاردابىن بارىنشا جان-جاقتى قىرىنان اشىپ كورسەتۋگە تىرىستىق», دەدى اكتريسا ارۋجان باعزات.
پرەمەراعا استانا قالاسى مادەنيەت باسقارماسىنىڭ باسشىسى جاڭاباي مەيىرمانقۇلوۆ, مۋزىكالىق جاس كورەرمەن تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى اسحات ماەميروۆ, كومپوزيتور, پروديۋسەر رينات گايسين, سونداي-اق مەكتەپ وقۋشىلارى جانە ستۋدەنتتەر قاتىستى.
قويىلىم سوڭىندا سپەكتاكلدەن اسەرلەنىپ شىققان جاس كورەرمەندەردى سوزگە تارتقان ەدىك, كوپ ىشىنەن سۋىرىلىپ شىققان مەكتەپ وقۋشىسى قالدىباي نۇرعيسا: «ماعان پرەمەرا ۇلكەن وي سالدى. قازىردەن باستاپ زياندى ادەتتەردەن اۋلاق بولۋ كەرەك ەكەنىن تەرەڭ ۇعىندىم. قويىلىمدى كورە وتىرىپ, اكەنىڭ, انانىڭ, جالپى ادامزاتتىڭ قادىرىن ءتۇسىندىم», دەدى تەبىرەنە ءۇن قاتىپ.
ەكى كۇن قاتارىنان قويىلعان سپەكتاكلگە كورەرمەن كوپ جينالدى. جاستار مەن جاسوسپىرىمدەردىڭ تاعدىرىنا قاشاندا بەيجاي قارامايتىن تەاتر ۇجىمى «S.O.S» قويىلىمى ارقىلى تاعدىر تالكەگىنە ءتۇسۋ ءاپ-ساتتە, ادامزات تاريحىنداعى قاسىرەتتەردى كوبەيتۋشى, ز ۇلىمدىقتاردى تۋدىرۋشى, ادامدى ازدىرۋشى اپيىن ەكەندىگىن كورەرمەنگە نانىمدى جەتكىزە ءبىلدى.
