وتاندىق ءونىمدى ناقتى قولداۋ

ۇكىمەت مۇشەلەرى ايماقتاردى ارالاپ ءجۇر. ماقسات – وتاندىق بيزنەستى قولداۋ, ءوزىمىز وندىرگەن ءونىمدى دەمەۋ. مىنا قيىن كەزەڭدە مەملەكەت كاسىپكەرلەرگە جان-جاقتى قولداۋ كورسەتپەك. بۇل جۇمىس ورىندارىنىڭ جابىلىپ, ادامداردىڭ جۇمىسسىز قالماۋى ءۇشىن جاسالىپ جاتقان ناقتى قادام. سوندىقتان ۇلتتىق كومپانيالار جەرگىلىكتى كاسىپكەرلەرمەن مەموراندۋمعا وتىرىپ, ءبىر-بىرىنە سەپتەسىپ جۇمىس ىستەمەك. كەشە پرەمەر-مي­نيس­تر­دىڭ ءبىرىنشى ورىنباسارى با­قىت­­جان ساعىنتاەۆ جۇمىس سا­پا­رى­­مەن قىزىلوردا وبلى­سىن­دا بولدى. الدىمەن وبلىس اكىمدىگىندە ورنالاسقان سيتۋاتسيالىق ورتا­لىقتىڭ جۇمىسىمەن تانىس­تى. مۇنان سوڭ ءبىرىنشى ۆيتسە-پرە­مەر ورتالىق مەملەكەتتىك ور­گاندار, ۇلتتىق كومپانيا­لار باسشىلارىنىڭ جانە بيزنەس قاۋىمداستىق وكىلدەرىنىڭ قاتىسۋىمەن وتاندىق تاۋار ءون­دى­رۋشىلەردى قولداۋ ماسەلەلەرى بويىنشا كەڭەس وتكىزدى. قازىرگى داعدارىس كەزىندە ماڭىزدى مىندەتتەردىڭ ءبىرى شەتەل­دىك ينۆەستيتسيالاردى تارتۋ. ەلباسى «نۇرلى جول» – بولا­شاققا باستار جول» اتتى بيىلعى جولداۋىندا شەتەلدىك قارجى ۇيىمدارىمەن تىعىز قارىم-قاتىناستا جۇمىس ىستەۋدى تاپسىردى. وسى ورايدا ەۋروپا قايتا قۇرۋ جانە دامۋ بانكىمەن جالپى قۇنى 63 ميلليارد تەڭگە بولاتىن 8 جوباعا قول قويعان قىزىلوردا وبلىسىنىڭ تاجىريبەسى باسقا ايماقتارعا ۇلگى بولارلىقتاي, دەپ اتاپ ءوتتى ب.ساعىنتاەۆ. – الەمدىك نارىققا شىعۋ ءۇشىن باسەكەگە قابىلەتتى ءونىم شىعارۋ كەرەك. مەملەكەت جان-جاقتى قولداۋ كورسەتەتىن بولادى, دەگەنمەن سىزدەر دە ساپالى ءونىم ءوندىرىپ, باسەكەگە توتەپ بەرە الۋلارىڭىز شارت, – دەدى ءبىرىنشى ۆيتسە-پرەمەر. كەڭەس قورىتىندىسى بويىنشا قىزىلوردا وبلىسى اكىمدىگى, ۇلتتىق كومپانيالار مەن جەرگىلىكتى تاۋار وندىرۋشىلەر اراسىندا جالپى قۇنى 39 ميلليارد تەڭگە بولاتىن بىرقاتار مەموراندۋمدارعا وتىردى. كەلىسىمگە «قاز­اتوم­پروم», «قازمۇنايگاز» جانە «قازاقتەلەكوم» اكتسيونەرلىك قوعامدارى قول قويدى. سونداي-اق, قىزىلوردا وبلى­­سى­نىڭ اكىمدىگى مەن جۇيە قۇ­رايتىن كاسىپ­ورىندار جۇمىس ورىندارىن ساقتاۋ جانە وندىرىستىك ۇدەرىستەردى تۇ­راق­تاندىرۋ بويىنشا مەموران­دۋمدار جاساستى. ۇشجاقتى كەلىسىمگە قىزىلوردا وبلىسى اكىمدىگى, وبلىستىق كاسىپوداق جانە «پەترو قازاقستان قۇمكول رەسورسيز» اق, «قازگەرمۇناي» جشس, «ارالتۇز» اق, «ابزال جانە ك» جشس, «جانروس دريللينگ», «سيبۋ» جاۋاپكەرشىلىگى شەكتەۋلى سەرىكتەستىكتەرى قول قويدى. بۇدان كەيىن, پرەمەر-مي­نيستردىڭ ءبىرىنشى ورىنباسارى ما­مان­دان­دىرىلعان حالىققا قىزمەت كورسەتۋ ورتالىعىندا بولدى. ەرجان بايتىلەس, «ەگەمەن قازاقستان». قىزىلوردا.