جىل باسىنان بەرى مۇنداي مازمۇنداعى اكتسيالار قالانىڭ بارلىق اۋدانىندا ۇيىمداستىرىلىپ كەلەدى. جەرگىلىكتى پوليتسيا, ەرىكتىلەر, ۇكىمەتتىك ەمەس ۇيىم مۇشەلەرى بىرىگىپ, قوعامدىق ورىندارداعى ەسىرتكى جارنامالارىن بوياۋعا ءجيى شىعىپ تۇرادى. كوللەدج ستۋدەنتتەرىمەن دە بىرنەشە مارتە كەزدەسۋ ۇيىمداستىرىلعان. بۇگىندە استانا قالاسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ قىزمەتكەرلەرى قالاداعى 5 اۋداندىق اكىمدىكپەن بىرگە 40-تان اسا قابىرعانى ناشاقورلىققا قارسى گرافيتيمەن بوياعان. ۇيىمداستىرۋشىلار اكتسيا ماقساتىن تىيىم سالىنعان زاتتاردىڭ جارناماسىن جويۋ جانە سالاماتتى ءومىر سالتىن ناسيحاتتاۋمەن بايلانىستىردى. بۇل – جاستار اراسىندا ناشاقورلىقتىڭ الدىن الۋداعى ماڭىزدى قادام.
وسى جولى اكتسيانى استانا قالاسى «بايقوڭىر» اۋدانى اكىمدىگىنىڭ اپپاراتى, جەرگىلىكتى پوليتسيا قىزمەتى باسقارماسى, استانا قالاسى پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىمەن قوسا, «استانا جاستارى» جاستار رەسۋرستىق ورتالىعىنىڭ ۆولونتەرلەرى بىرگە وتكىزگەن. مىسالى, ەسىرتكى جارنامالارىن وشىرۋگە دوستارىمەن بىرگە كەلگەن ەرىكتى دانيال كەلگەنباەۆ ناشاقورلىققا قارسى اكتسيالارعا قالا جاستارىنىڭ اماندىعى, ساۋلىعى ءۇشىن ءجيى شىعىپ تۇراتىنىن ايتادى.
– ءوزىم – «استانا جاستارى» جاستار رەسۋرستىق ورتالىعىنىڭ ۆولونتەرىمىن. ۆولەنتەر بولعان سوڭ, قوعامدىق جۇمىستارعا ارالاسىپ, كوپشىلىككە قولعابىس ەتۋ – ءبىزدىڭ جۇمىسىمىزدىڭ ءبىر باعىتى. بۇگىن پوليتسيا باسقارماسىنىڭ قىزمەتكەرلەرىمەن بىرگە ەسىرتكى زاتتارىنىڭ جارنامالارى قالعان قابىرعالاردى بوياۋعا شىقتىق. ەلدىڭ ەرتەڭى – ءبىزدىڭ زامانداستار بولعان سوڭ, ولاردىڭ سالاماتتى ءومىر سالتىن ۇستانۋى جارقىن بولاشاق كەپىلى دەپ بىلەمىن. سوندىقتان مۇنداي اكتسيالارعا بىرنەشە مارتە شىقتىق. «استانا – ەسىرتكىسىز قالا». وسى ءسوزدى ءبىز سياقتى جاستار ۇران ەتسە, زياندى زاتتاردان اۋلاق بولسا, قالانى لاستاماسا, قابىرعالاردى بۇلدىرمەسە دەيمىز, – دەيدى د.كەلگەنباەۆ.
اكتسياعا ءبىر كىسىدەي ۇلەس قوسقان تاراپتار يگى باستامالاردى ۇزبەي جالعاستىرۋدى جوسپارلاپ وتىرعانىن ايتتى. وسىلايشا, اقپاراتتىق-اعارتۋشىلىق جۇمىستى كۇشەيتىپ, جاستاردى زياندى ادەتتەردەن اۋلاق بولۋعا شاقىرماق نيەتتە. بۇل رەتتە قوعام دەرتىنە اينالعان ناشاقورلىقپەن كۇرەس جۇمىستارى جان-جاقتى جۇرگىزىلەتىنىن ايتا كەتكەنىمىز ءجون. ەسىرتكى زاتتارىن تاراتاتىندار الەۋمەتتىك جەلىنىڭ كومەگىن ءجيى پايدالانعان سوڭ, پسيحولوگيالىق جانە قۇقىقتىق ساۋاتتىلىقتى ارتتىرۋ دا اسا ماڭىزدى باعىتتاردىڭ ءبىرى سانالادى. اقپارات ءۇشىن ايتار بولساق, جىل باسىنان بەرى استانادا ەسىرتكى اينالىمىنا قاتىستى 407 قىلمىستىق ءىس قوزعالسا, ونىڭ ىشىندە 285 جاعداي ەسىرتكى زاتىن ساتۋمەن بايلانىستى بولعان ەكەن.
