ەكولوگيالىق اكتسيا شەڭبەرىندە وبلىس اكىمى دارحان ساتىبالدىنىڭ تاپسىرماسىمەن وڭىردەگى اۋىلداردىڭ تىرشىلىگىن جاقسارتىپ, تۇرعىنداردىڭ قولايلى ءومىر ءسۇرۋ ورتاسىن قالىپتاستىرۋدى ىنتالاندىرۋ ماقساتىندا «ۇلگىلى اۋىل» بايقاۋى وتكىزىلدى. بايقاۋ قورىتىندىسى بويىنشا قازىعۇرت اۋدانى شاربۇلاق اۋىلى باس جۇلدەنى جەڭىپ الدى. جۇلدەلى ءى ورىندى شاردارا اۋدانى كوكسۋ اۋىلى يەلەنسە, ءىى ورىن سارىاعاش اۋدانى مادەنيەت اۋىلىنا, ءىىى ورىن سوزاق اۋدانى جارتىتوبە اۋىلىنا بۇيىردى. بايقاۋ ەرەجەسىنە سايكەس باس جۇلدە يەگەرىنە, شاربۇلاق اۋىلىنا قاجەتتى الەۋمەتتىك نىسان انىقتالىپ, 2025 جىلعا اتالعان نىساننىڭ قۇرىلىسىنا وبلىستىق بيۋدجەتتەن ءتيىستى قاراجات بولىنەدى. ەكى كەزەڭدە وتكىزىلگەن بايقاۋدىڭ اۋداندىق كەزەڭىنە 16 اۋدان, قالادان جالپى 75 اۋىل قاتىسقان. ناتيجەسىندە, وبلىستىق كەزەڭگە 16 اۋىل جولداما الىپ, باق سىنادى.
اكتسيا بارىسىندا ءبىلىم بەرۋ, دەنساۋلىق ساقتاۋ سالالارىنىڭ قىزمەتكەرلەرى دە بەلسەندىلىك تانىتتى. وبلىستاعى 2 500-دەن استام ءبىلىم بەرۋ ۇيىمدارىندا ەكولوگيالىق مادەنيەتتى قالىپتاستىرا وتىرىپ, وتانسۇيگىشتىككە, تابيعاتتى قورعاۋعا, حالىقتى قورشاعان ورتانى لاستاماۋعا ۇيرەتۋ ماقساتىندا ءتۇرلى ءىس-شارالار ۇيىمداستىرىلدى. بالالاردى تابيعاتقا ۇقىپتى قاراۋعا تاربيەلەيتىن 2000-عا جۋىق اشىق ساباق, 650 كەزدەسۋ, 960 دوڭگەلەك ۇستەل وتكىزىلدى. مەديتسينالىق نىسانداردىڭ اۋماعىندا 11 مىڭنان استام اعاش وتىرعىزىلىپ, 62 مىڭداي اعاش تۇپتەرى اكتەلدى. سونداي-اق تۋريستىك نىساندار اۋماعىندا سانيتارلىق تازالاۋ جۇمىستارىن ۇيىمداستىرۋ بويىنشا ازىرلەنگەن جول كارتاسىنا سايكەس, قوجا احمەت ياساۋي كەسەنەسى, وتىرار قالاشىعى, «شاعا» تۋريستىك-رەكراتسيالىق ورتالىعى, «اقمەشىت» جەراستى ۇڭگىرى, «دومالاق انا» كەسەنەسى مەن بۇلاعى, ءبيبى ءماريام, شاحان اتا, ۇكاشا اتا, گاۋحار انا كەسەنەلەرى, ارىس مۋزەي عيماراتى, شاممات يشان مۋزەيى, ەرۋباەۆ مۋزەيى سىندى كيەلى, تاريحي ورىنداردا تازالاۋ جۇمىستارى جۇرگىزىلدى. ۆولونتەرلىك ۇيىمداردىڭ باستاماسىمەن «جاس تۇركىستان» ەرىكتىلەر قاۋىمداستىعى قۇرىلىپ, «بۇل سەنىڭ ءوڭىرىڭ» اكتسياسى نەگىزىندە تيمبيلدينگ ءوتتى. جاستار «Taza Alem» ۇلتتىق جوباسى بويىنشا «قورشاعان ورتانى تازا ۇستاۋ – ءاربىر ازاماتتىڭ بورىشى» تاقىرىبى اياسىندا وزەن, كول ماڭدارىن تازالادى. ەرىكتى جاستار اراسىندا «ەكو ۆولونتەر» اتتى كيەلى ولكەلەر مەن وزەن, تاۋلاردا قوقىس ىزدەۋ سايىسى ءوتتى.
قازاقستان حالقى اسسامبلەياسىنىڭ وبلىستىق 11 ەتنو مادەني بىرلەستىكتەر مۇشەلەرى دە اۋماقتىق سەنبىلىكتەرگە بەلسەنە قاتىستى. ەتنوستار كوپ ورنالاسقان سايرام, ساۋران, جەتىساي, ماقتاارال, كەلەس, تولەبي اۋداندارىندا اسسامبلەيا جاستارى «بىرلىگىمىز جاراسقان» تاقىرىبىنداعى پلوگينگ سايىستارى ارقىلى اينالانى تازارتۋ اكتسيالارىن وتكىزدى. سايرام اۋدانىندا «قوقىستان قۇندى زاتتار جاساۋ يدەيالارى» جۇزەگە اسىرىلىپ كەلەدى. بۇل ورايدا «Generation» قوعامدىق بىرلەستىگى اۋدانداعى ءبىلىم بەرۋ ۇيىمدارىمەن بىرلەسە وتكىزگەن ەكولوگيالىق اكتسيالار كەزىندە 15 تونناعا جۋىق قايتالاما شيكىزات ساتىپ الىنىپ, قايتا وڭدەۋگە جىبەرىلدى. تابيعي جولمەن ەنەرگيا كوزىن اشىپ, ءوڭىردىڭ ەكولوگيالىق جاعدايىن جاقسارتۋ جونىندە دە بىرقاتار ءىس-شارا اتقارىلدى. مىسالى, «وگەم», «ەكو-اتامەكەن» قوعامدىق بىرلەستىكتەرى سايرام-وگەم, قاراتاۋ قورىقتارىندا تابيعاتتى قورعاۋ ماقساتىندا بىرنەشە ەكواكتسيا وتكىزىپ, جەرگىلىكتى تۇرعىندار مەن تۋريستەردىڭ ەكولوگيالىق مادەنيەتىن قالىپتاستىرۋعا ۇلەس قوستى.
«Amanat» پارتياسىنىڭ «تازا قازاقستان» اكتسياسى شەڭبەرىندەگى «تازا بەيسەنبى» اپتالىعىندا ساياسي ۇيىمنىڭ وبلىستاعى مۇشەلەرى بەلسەندىلىك تانىتتى. ماۋسىم ايىنان بەرى تۇراقتى نەگىزدە ۇيىمداستىرىلعان اپتالىق وبلىستىڭ بارلىق اۋدانىندا ءوتىپ, وزەن, كولدەر جاعالاۋلارىنان, تاۋ بوكتەرىنەن, تاريحي, كيەلى ورىنداردان, كوپشىلىكتىڭ دەمالىس ورىندارى بولىپ بەلگىلەنگەن ايماقتاردان 300 تونناعا جۋىق قوقىس شىعارىلدى. كۇزگى مەزگىلدە قارقىندى جۇرگەن تال ەگۋ جۇمىستارىنا پارتيا وكىلدەرى ەلەۋلى ۇلەس قوستى. اپتالىقتىڭ ماڭىزىن ارتتىرۋ ماقساتىندا ەكولوگيالىق تازالىق جۇمىستارىن كوپشىلىك قادىر تۇتاتىن, كيەلى جەر دەپ بايىپتاپ, قاسيەتتى ورىنعا بالايتىن اۋماقتاردا وتكىزۋ داستۇرگە اينالدى.
جەتىساي قالاسىندا ۇيىمداستىرىلعان جالپىحالىقتىق سەنبىلىكتە رەسپۋبليكالىق, وبلىستىق ماڭىزى بار اۆتوجولدار مەن ىشكى كوشەلەردىڭ بويى, سونىمەن قاتار, ارىق-اتىزدار قاتتى تۇرمىستىق قالدىقتاردان تازارتىلدى. سەنبىلىككە 13 تەحنيكا مەن مىڭنان استام ادام جۇمىلدىرىلىپ, 10 توننادان استام قوقىس شىعارىلدى. جالپى ەكولوگيالىق اكتسيا باستالعاننان بەرى وبلىستاعى سەنبىلىكتەر مەن تازالىق جۇمىستارىنا 1500-دەن استام تەحنيكا جۇمىلدىرىلىپ, ميلليونعا جۋىق اعاش وتىرعىزىلدى, 3 400 تونناعا جۋىق قوقىس شىعارىلدى. سونداي-اق «تازا قازاقستان» اكتسياسى اياسىندا ءساۋىر ايىنان باستاپ جۇرگىزىلگەن مونيتورينگ جۇمىستارىنىڭ ناتيجەسىندە 2 880 قوقىس ءۇيىندىسى انىقتالىپ, تولىق رەتكە كەلتىرىلدى. قىس مەزگىلىندە رەسپۋبليكالىق, وبلىستىق ماڭىزى بار جولدار مەن اياقجولداردى قاردان تازارتۋ جۇمىستارىنىڭ ورىندالۋ بارىسى قاتاڭ باقىلاۋعا الىنعان.
تۇركىستان وبلىسى
