فوتو: اشىق دەرەككوز
«2024 جىلعى 18 جەلتوقساندا ساعات 23:30-دا اياگوز اۋدانىنىڭ 101 سەرۆيستىك پۋلتىنە «بىرىككەن ەنەرگەتيكالىق سەرۆيستىك كومپانيا» اق قوسالقى ستانساسىندا ءورت شىققانى تۋرالى حابارلاما كەلىپ ءتۇستى. ءورتتى سوندىرۋگە 4 ءورت ءسوندىرۋ ماشيناسى مەن 15 قىزمەتكەر جۇمىلدىرىلدى», دەلىنگەن اكىمدىك حابارلاماسىندا.
ءورت سالدارىنان زارداپ شەككەندەر جوق. قازىرگى تاڭدا ءورتتىڭ شىعۋ سەبەبىن انىقتاۋ جۇمىستارى جۇرگىزىلىپ جاتىر.
قالپىنا كەلتىرۋ جۇمىستارى ناتيجەسىندە مامىرسۋ اۋىلدىق وكرۋگى جانە اياگوز قالاسىنان باسقا بارلىق اۋىلدىق وكرۋگ ەلەكتر ەنەرگياسىمەن قامتاماسىز ەتىلگەنى حابارلاندى.
اكىمدىكتىڭ حابارلاۋىنشا, قالادا ءبىرىنشى كەزەكتە 6 ورتالىقتاندىرىلعان جىلۋ قازاندىعىن ىسكە قوسۋ جۇمىستارى باستالىپ, ونىڭ 5-ەۋى ىسكە قوسىلعان.
سونىمەن قاتار «بەسك» اق ءۇرجار, جارما اۋداندارى مەن وسكەمەن جانە سەمەي قالالارىنان كەلگەن 7, سونداي-اق اياگوزدىك 3 بريگادا جوندەۋ جۇمىستارىن جۇرگىزىپ جاتىر. قالپىنا كەلتىرۋ جۇمىستارىنا بارلىعى 30-عا جۋىق مامان جۇمىلدىرىلعان.
