فوتو: respublika.kz.media
ءبىز حالىقارالىق زاڭدارعا, حالىقارالىق ەرەجەلەرگە سۇيەنىپ سىرتقى ساياساتتا شەشىم قابىلدايمىز. بۇل زاڭدى سىيلاۋ, قۇقىقتى تاپتاماۋدى بىلدىرەدى. مۇنداي قادامدى وزگە مەملەكەتتەر وتە قاتتى باعالايدى. اسىرەسە, باتىس مەملەكەتتەرى, جاپونيا ءتىپتى اقش ءبىزدى مويىنداپ وتىر.
ەلىمىز ەكى ۇلكەن ساياسي اكتورلار – رەسەي مەن قىتايدىڭ ورتاسىندا ورنالاسقان. ەكى ەلمەن دە تاتۋ كورشىلىكتى ساقتاۋ ماڭىزدى. بىراق قازاقستان ءوزىنىڭ ۇستانعان ساياساتىنا وراي رەسەيدى دە, قىتايدى دا ستراتەگيالىق ارىپتەسى رەتىندە كورسەتىپ وتىر. ەكەۋى دە تەڭ, وسى ماقساتتى الدىمىزعا قويىپ قويعانبىز. بۇرىنعىداي ەكونوميكالىق جاعىنان بولسىن, الەۋمەتتىك جاعىنان بولسىن, ساياسي جاعىنان بولسىن رەسەيگە الاڭدامايمىز. ويتكەنى ارىپتەسپىز. ءوزىمىزدىڭ قۇقىمىز, ۇستانىمىمىز بار. دامىعان ەلدەر مۇنى كورىپ وتىر. ءوزىمىزدىڭ مۇددەمىزدى ەڭ ءبىرىنشى ورىنعا شىعاردىق. ءارى قاراي دا كۇشەيە تۇسسە, قازاقستاننىڭ ورنى حالىقارالىق ارەنادا مۇلدەم وزگەرەدى.
قازىر ادام قۇقىعى ماسەلەسىن دە العا قويىپ وتىرمىز. دەموكراتيا, ساياسي دەموكراتيا ينستيتۋتتارىن دامىتىپ, ەرەجەلەرىن بەكىتىپ الۋعا تالپىنىپ كەلەمىز. جەمقورلىقتىڭ دا تامىرىنا بالتا شاۋىپ, ەلدىڭ زاڭسىز اكەتىلگەن قارجىسى قازىناعا قايتارىلىپ جاتىر. بۇل – ءبىزدىڭ سىرتقى ساياساتىمىزعا, حالىقارالىق ارەناداعى ورىنىمىزدى شەگەلەپ الۋعا باستايتىن ىزگى قادامدار.
قازاقستان ورتا ازيانىڭ بەس مەملەكەتىمەن دە كەلىسىم ورناتىپ, كوشباسشىلىق تانىتا ءبىلدى. وداقتاس ەلدەرمەن بىرگە دامۋىمىز جاقسى قادام, بەس ەل بەس جاقتا ورنالاسقانىمەن بىرىككەنىمىز ءجون. وسىنداي كىشكەنتاي قادامدارمەن ۇلكەن جەتىستىكتەرگە جەتىپ كەلەمىز. بۇل – ارينە, سىرتقى ساياساتتىڭ ناتيجەسى.
ىشكى ساياساتىمىزدى دامىتۋعا دا بەت بۇردىق, قۇقىقتىق زايىرلى مەملەكەت اتىنا ساي بولۋ ماڭىزدى. بۇل ءبىر بيلىكتىڭ مىندەتى عانا ەمەس, حالىقتىڭ ىشكى مادەنيەتىنە دە بايلانىستى. مەملەكەت دەگەن – ساياسي كۇش. سوندىقتان ادام قۇقىعى قورعالىپ, بيلىك پەن حالىقتىڭ مۇددەسى ساي كەلۋى كەرەك. ەلىمىز وسىعان تالپىنىپ, كوپتەگەن ءىس اتقارىپ جاتىر. ماڭىزدىسى بيلىك تە, حالىق تا مۇنى ءتۇسىندى. حالىقتىڭ قۇقىعى مەن مەملەكەتتىڭ قۇقىعى بىردەي بولىپ, تەپە-تەڭدىك قۇرىلسا, زاڭدارىمىز دا, قۇقىقتارىمىز دا سىرتقى ساياساتىمىزدىڭ دامۋىنا وتە كوپ ۇلەس قوساتىنى ءسوزسىز.
تولعاناي ۇمبەتاليەۆا,
ساياساتتانۋشى
