جىل شەڭبەرىندە بارلىق اۋداندا «رۋحانيات ورتالىقتارىنىڭ» ىرگەسى قالانىپ, تاۋەلسىزدىك كۇنى قارساڭىندا قارماقشى اۋدانىندا وسى ورتالىقتىڭ اشىلۋ ءراسىمى ءوتتى. جۇرتشىلىقتى جاڭا نىساننىڭ اشىلۋىمەن قۇتتىقتاعان وبلىس اكىمى نۇرلىبەك نالىباەۆ الەۋمەتتىك-ەكونوميكالىق باعىتتاعى جەتىستىكتەرگە توقتالدى.
«بۇگىن – عاسىرلاردىڭ ءۇنىن جاڭعىرتىپ, حالقىمىزدىڭ قازىناسىن ەسەلەگەن سىر رۋحانياتى ءۇشىن ايتۋلى كۇن. ەڭ الدىمەن, بارشاڭىزدى مىڭجىلدىقتاردىڭ مۇراتى, الاشتىڭ اسقاق ارمانى بولعان تاۋەلسىزدىك كۇنىمەن شىن جۇرەكتەن قۇتتىقتايمىن!
بيىلعى «رۋحانيات جىلى» اياسىندا بارلىق 7 اۋداندا قۇنى 11 ملرد 500 ملن تەڭگە بولاتىن, ىشىندە نەكە قيۋ زالى, كىتاپحانا, مۋزەي, ارحيۆ, جاستار سارايى, ارداگەرلەر مەن انالار ءۇيى بار «رۋحانيات ورتالىقتارى» سالىنا باستاعانىن بىلەسىزدەر. وسى ارقىلى ءتۇرلى باعىتتا قىزمەت كورسەتەتىن مەكەمەلەردى ءبىر ورتالىققا بىرىكتىرىپ, بيۋدجەت قاراجاتىن ءتيىمدى باسقارۋ, اكىمشىلىك شىعىنداردى ازايتۋعا بولادى. جىل سوڭىنا دەيىن تاعى 5 اۋداندا «رۋحانيات ورتالىعى» جۇمىسىن باستايدى. قالعان 2 ورتالىق كەلەسى جىلدىڭ ناۋرىز ايىندا ەل يگىلىگىنە بەرىلەدى» , دەدى وبلىس باسشىسى.
جيىندا بەلگىلى اقىن شاكيزادا ابدىكارىموۆ ايماقتىڭ رۋحانيات سالاسىنداعى اۋقىمدى جۇمىستارعا توقتالسا, مەملەكەت جانە قوعام قايراتكەرى باقبەرگەن دوسمامبەتوۆ باتا بەردى. سالتاناتتى راسىمدە اۋداننىڭ ءوسىپ-وركەندەۋى جولىندا ەڭبەك ەتكەن ارداگەرلەر مەن ورتالىقتى سالعان قۇرىلىسشىلارعا كوپ الدىندا قۇرمەت كورسەتىلدى.
قىزىلوردا وبلىسى,
قارماقشى اۋدانى
