پاۆلوداردا ماڭىزدى قۇجاتتارعا قول قويىلدى

پاۆلودار. 3 قاڭتار. پرەمەر-ءمينيستردىڭ ءبىرىنشى ورىنباسارى باقىتجان ساعىنتاەۆ پاۆلودارداعى وندىرىستىك كاسىپورىندار باسشىلارىمەن كەزدەستى. بۇل تۋرالى egemen.kz ءتىلشىسى حابارلادى. شارا بارىسىندا پاۆلودار وبلىسى اكىمدىگى, ەلىمىزدىڭ ۇلتتىق كومپانيالارى جانە وتاندىق تاۋار وندىرۋشىلەرى اراسىندا تاۋار, قىزمەت كورسەتۋ جانە جۇمىس ساتىپ الۋ بويىنشا مەموراندۋمدارعا قول قويىلدى. جەرگىلىكتى قامتۋدى دامىتۋ بويىنشا مەموراندۋمدارعا «قازاقستان تەمىر جولى» ۇك» اق, «قازمۇنايگاز» ۇك» اق, «ەۋرازيالىق توپ» جشس, «كەگوك» اق, «قازاقتەلەكوم» اق جانە باسقالارى قول قويدى. كەلىسىمنىڭ جالپى قۇنى 128 ملرد. تەڭگەدەن اسادى. جۇمىس ورىندارىن ساقتاۋ جانە وندىرىستىك ۇدەرىستەردى تۇراقتاندىرۋ بويىنشا مەموراندۋمداردى «قازاقستان ءاليۋمينيى» اق, «قازاقستان ەلەكتروليز زاۋىتى» اق, «KSP Steel» جشس, «بوگاتىر كومىر» جشس جانە ءوڭىردىڭ باسقا كاسىپورىندارى دا جاسادى. وبلىس اكىمدىگى, جۇمىس بەرۋشىلەر مەن كاسىپوداق ۇيىمدارى اراسىنداعى مەموراندۋمدار نەگىزىندە جۇمىس ورىندارىن جانە وندىرىستىك تۇراقتىلىقتىق ساقتاۋعا كەلىسىلدى. باقىتجان ساعىنتاەۆتىڭ ايتۋىنشا, الەمدىك ەكونوميكاداعى داعدارىستىڭ سالقىنى جەرگىلىكتى ءوندىرىس ورىندارىنىڭ جۇمىسىنا اسەر ەتپەۋى ءۇشىن مەملەكەت تاراپىنان قولداۋ شارالارى جۇزەگە اسىرىلۋدا. وتاندىق ءوندىرۋشىنى قولداۋ داعدارىسقا قارسى ساياساتتىڭ نەگىزگى باعىتتارىنىڭ ءبىرى ەكەنىن ايتتى. «ۇكىمەت ەلىمىزدىڭ 80-نەن استام ءىرى كاسىپورنىنىڭ ماسەلەلەرىن قاراپ, جەرگىلىكتى قامتۋدى ارتتىرۋ ارقىلى ولاردى قولداۋ بويىنشا ءىس-شارالار جوسپارىن قابىلدادى. بۇل باعىتتا مەملەكەتتىك تاپسىرىستاردى, سونداي-اق ءىرى ۇلتتىق كومپانيالاردىڭ تاپسىرىستارىن قازاقستاندىق وندىرۋشىلەرگە باسىمدىقتى ۇلەستىرۋ جوسپارلانعان», – دەدى ب. ساعىنتاەۆ. «الەمدىك ەكونوميكا نارىعىنداعى جاعداي ءوڭىرىمىزدىڭ وندىرىستىك كاسىپورىندارىنىڭ جۇمىسىنا اسەر ەتۋدە. جەرگىلىكتى ءوندىرىس وشاقتارىنىڭ ونىمدەرىنىڭ 65 پايىزى رەسەيلىك نارىققا ەكسپورتالاتىندىقتان, ناقتى ءىس-شارالار جوسپارى قاجەت. مەموراندۋمدار ناتيجە بەرەدى دەگەن ويدامىن. وڭىردەگى كاسىپورىندار الەۋمەتتىك جاۋاپكەرشىلىكتەرىن ورىنداپ, ونىمدىلىك كورسەتكىشتەرىنىڭ تومەندەۋىنە جول بەرمەۋى قاجەت», – دەدى پاۆلودار وبلىسىنىڭ اكىمى قانات بوزىمباەۆ. فاريدا بىقاي. دەرەك: egemen.kz. سۋرەت: ۆالەري بۋگاەۆ.