«الەمدەگى جەتەكشى مەكتەپتەر بالالاردىڭ كرەاتيۆتىك پوتەنتسيالىن دامىتۋمەن اينالىسادى, تسيفرلىق تەحنولوگيالار مەن ناقتى عىلىمداردى وقىتادى. پەداگوگتەر وقىتۋ ادىستەمەسىن ويىن فورماتىنا اۋىستىرىپ, ۇنەمى جاڭا ماماندىقتار مەن داعدىلاردى ۇيرەنەدى. ءبارىمىز قازاقستاندى گۇلدەنگەن, دامىعان ەلگە اينالدىرۋعا ۇمتىلامىز. بۇعان جەتۋدىڭ كىلتى – ساپالى جانە قولجەتىمدى, قازىرگى زامانعى ءبىلىم. وسى سالاعا قۋاتتى كۇش بەرۋ ماڭىزدى بولىپ وتىر», دەدى مەملەكەت باسشىسى وتكەن جىلى تامىز كونفەرەنتسياسىندا. پرەزيدەنتتىڭ يگى باستامالارىن نەگىزگە العان جاستار بۇگىندە تىڭ يدەيالارىن ىسكە اسىرىپ, يننوۆاتسيالىق تەحنولوگيالارىن ۇسىنىپ وتىر. ناقتىلاي ايتساق, وتاندىق «Q-Vision» IT كومپانياسى نەگىزگى قىزمەتى ءبىلىم سالاسىندا وقۋ ۇدەرىسىنىڭ تيىمدىلىگىن ارتتىرۋعا جانە ءبىلىم رەسۋرستارىن تسيفرلاندىرۋعا باعىتتالعان يننوۆاتسيالىق ستەندتەر جاساپ شىعاردى. «ەگەمەننىڭ» تۇركىستان وبلىسىنداعى تىلشىلەر قوسىنىنا ارنايى كەلگەن جاڭاشىل جاستاردىڭ ماقساتى – يننوۆاتسيالىق ستەندتەرىن ەلگە كەڭىنەن تانىستىرۋ, ءبىلىم سالاسىنداعى باسشىلاردىڭ نازارىنا سالۋ, مۇعالىمدەردىڭ, وقۋشىلاردىڭ پىكىرىن ءبىلۋ.
– شەتەلدە ءوز قاراجاتىمەن ءبىلىم العان بيزنەس سەرىكتەسىم دارحان ەسماعۇلوۆ ەلگە كەلگەنىندە ءبىلىم بەرۋ سالاسىنداعى جاڭاشىل, زاماناۋي ءادىس-تاسىلدەر تۋرالى ايتىپ, ءبىزدىڭ ەلىمىزدە دە سونداي يننوۆاتسيالىق تەحنولوگيالاردى ەنگىزۋ قاجەتتىگى جونىندە وي تاستاعان ەدى. سول ماقساتتا ءبىز الەمدىك جانە وتاندىق ءبىلىم سالاسىن تولىق زەرتتەدىك. ءبىر جارىم جىلدىق ىزدەنىستىڭ ناتيجەسىندە وسىنداي جوبانى جاساپ شىقتىق. ءبىز جاساپ شىققان يننوۆاتسيالىق ستەندتەر مەكتەپتەردىڭ ىشكى كورىنىسىن ساندەپ قانا قويماي, زاماناۋي تەحنولوگيالاردىڭ كومەگىمەن وقۋ ساپاسىن جاڭا دەڭگەيگە كوتەرەدى. وقۋ ۇدەرىسىن جەتىلدىرۋ باعىتىندا ينتەراكتيۆتى 3D مودەل, وزەكتى ۇبت تەستىلەرى جانە كوپتەگەن بەينە-كونتەنت مەكتەپ باعدارلاماسىن تەرەڭىرەك تۇسىنۋگە, مەڭگەرۋگە ىقپال ەتەدى, ياعني وقۋشىلاردىڭ جالپى ءبىلىم دەڭگەيىن ارتتىرادى. وزدەرىڭىز بىلەسىزدەر, بۇگىنگىنىڭ بالاسى سمارتفون, گادجەتتەرگە قىزىعادى, كوپ ۋاقىتىن بولەدى. جوبانى جاساۋ بارىسىندا بۇل ءجايت تە ەسكەرىلدى, ياعني ستەندتەر ولاردىڭ وقۋعا قىزىعۋشىلىعىن ارتتىرادى, زاماناۋي تەحنولوگيالاردى قولدانۋ وقۋ ۇدەرىسىن تارتىمدى ەتىپ, پاندەردى تەرەڭىرەك مەڭگەرۋگە ىنتالاندىرادى. ءاربىر «Q-Vision» ستەندى QR-كودتار ارقىلى قولجەتىمدى كوپتەگەن مالىمەتتى قامتيدى, بۇل پايدالانۋشىلارعا اۋقىمدى ءبىلىم بازاسىنا قول جەتكىزۋگە مۇمكىندىك بەرەدى. قولدانۋعا ىڭعايلى, ياعني اقپارات سمارتفوندار ارقىلى قولجەتىمدى جانە سىنىپتاعى ۇلكەن ەكرانداردا كورسەتىلەدى. اقپاراتتار ۇزدىكسىز جاڭارتىلىپ وتىرادى. ستەندتەردى اۋىستىرماي-اق ماتەريالداردى تۇراقتى تۇردە جاڭارتىپ, اقپاراتتىڭ ءاردايىم وزەكتى جانە زاماناۋي بولۋى قامتاماسىز ەتىلەدى. «Q-Vision» ستەندتەرى جوعارى ساپالى اكريلدەن جاسالعان جانە كۇن ساۋلەسى مەن ىلعال سياقتى اسەرلەردەن قورعالعان. دايىن ماتەريالدار مۇعالىمدەرگە ۋاقىتتى ءتيىمدى پايدالانۋعا ءارى وقۋشىلارمەن جەكە جۇمىسقا كوبىرەك كوڭىل بولۋگە مۇمكىندىك بەرەدى. سونداي-اق ينتەراكتيۆتى ستەندتەر كوپتەگەن ءداستۇرلى وقۋ ماتەريالدارىن الماستىرىپ, مەملەكەتتىك قاراجاتتى ەداۋىر ۇنەمدەيدى. اۋىلداعى وقۋشىلار ۇبت-عا دايىندىق كەزىندە قالاعا كەلىپ, كۋرستارعا جازىلاتىنى جاسىرىن ەمەس. ءبىزدىڭ جوبا بويىنشا قالاعا بارىپ اۋرە بولماي, مەكتەپتە دايىندالا الادى, – دەيدى «Q-Vision» كومپانياسىنىڭ باس ديرەكتورى ىلەسبەك جاقىپبەك ۇلى.
قازىرگى تاڭدا يننوۆاتسيالىق ستەندتەر جامبىل, باتىس قازاقستان, اتىراۋ وبلىستارىندا جانە تۇركىستاننىڭ 1-2 مەكتەبىندە وپروباتسيادان, ياعني تاجىريبە جۇزىندە زەرتتەۋلەردەن ءوتىپ جاتىر ەكەن. الداعى ۋاقىتتا ەلىمىزدىڭ بارلىق مەكتەبىندەگى سىنىپ قابىرعالارىندا وسى ستەندتەردى كورەمىز دەگەن نيەتتەگى جاستار يننوۆاتسيالىق ءونىم مۇعالىمدەر مەن وقۋشىلارعا ەڭ ىڭعايلى جانە قولجەتىمدى فورماتتا – ەرەكشە اۆتورلىق ديزاينداعى ستەندتەر تۇرىندە ۇسىنىلعانىن ايتادى. ءاربىر «Q-Vision» ستەندى AR/QR-كودتار ارقىلى تەرابايتتار كولەمىندەگى مالىمەتتەرگە قولجەتىمدىلىك, پايدالانۋشىلارعا اۋقىمدى ءبىلىم قورىن ءبىر جەردەن الۋعا مۇمكىندىك بەرەدى ەكەن. «مىسالى, يننوۆاتسيالىق «ەۆوليۋتسيا» ستەندى جەردەگى ءومىردىڭ ەۆوليۋتسياسىنا ارنالعان جانە ءبىزدىڭ پلانەتامىزدىڭ تاريحىن 635 000 000 جىل بۇرىن ءومىردىڭ پايدا بولۋىنان باستاپ «Homo sapiens»-كە دەيىنگى اسەرلى كورنەكى نۇسقاۋلىق رەتىندە ۇسىنادى. ستەندتە ءارتۇرلى ورگانيزمدەردىڭ, جانۋارلار مەن وسىمدىكتەردىڭ شامامەن 200 يلليۋستراتسياسى, سونداي-اق ءاربىر ەۆوليۋتسيالىق كەزەڭدەرىن جانە ءبىزدىڭ پلانەتامىزداعى بيولوگيالىق ارتۇرلىلىكتىڭ دامۋىن كورنەكتى تۇردە كورسەتەدى. مەندەلەەۆتىڭ 118 ەلەمەنتىن نەگىزگى ءپان تاقىرىپتارى بويىنشا ءوزىمىز تاجىريبە جاساپ, ۆيدەوعا تولىقتاي ءتۇسىندىرىپ, وقۋشىلارعا قاراپايىم تۇسىنىكتى تىلمەن جەتكىزدىك. ول جەردەگى, ياعني ءبىزدىڭ كونتەنتتەگىدەي اقپارات ينتەرنەتتە, YouTube نەمەسە باسقا الەۋمەتتىك جەلىلەردە جوق. ءتىپتى جاساندى ينتەللەكتىگە سالسا دا ونداي اقپارات شىقپايدى. ويتكەنى ونى ءوز ماماندارىمىز جاساپ شىقتى. كوماندامىزدا 40-قا جۋىق قىزمەتكەر بار. جوبانى جاساۋ بارىسىندا ءىت-ماماندارىن, نزم مۇعالىمدەرىن, عالىمداردى تارتتىق. ەلىمىزدىڭ ايگىلى پروفەسسورلارى, ءبىلىمىن جەتىلدىرۋ ماقساتىندا شەتەلدە جۇرگەن وتانداستارىمىز كومەككە كەلدى. حيميا, بيولوگيا, فيزيكا بويىنشا زەرتحانالىق جۇمىستار جۇرگىزىلدى. وقۋشىلارعا ۇدەرىستەردى كورسەتۋ ماقساتىندا زەرتحانالىق زەرتتەۋلەر جاسالدى. كىتاپتان وقىعان بولەك, ارينە كوزبەن كورگەننىڭ ءجونى باسقا. يننوۆاتسيالىق ستەندتەردەگى بارلىق اقپارات مەمستاندارتقا سايكەس, سىرتتان الىنعان جوق. بارلىعى مەكتەپ باعدارلامالارى شەڭبەرىندە. ءبىز ونى 3D فورماتىندا وزگەرتتىك, دامىتىپ, جان بەردىك دەسەك تە بولادى. وتاندىق ءونىم, بارلىق اقپارات قورعالعان, بالاماسى جوق, باسقا جاققا كوشىرە المايدى. بەينەماتەريالداردىڭ سەرتيفيكاتى, ءوزىمىز تۇسىردىك دەگەن قۇجاتى بار», دەيدى باس ديرەكتور.
«Q-Vision» كومپانياسى 6 ءپان بويىنشا ستەندتەردىڭ 18 ءتۇرىن جاساپ شىعارعان. ولاردىڭ ىشىندە 200-دەن استام جوعارى ساپالى بەينە-لابوراتوريالىق جۇمىستار, قازاق ادەبيەتى جانە ورىس ادەبيەتى بويىنشا انيماتسيالانعان بەينەشىعارمالار, جىل سايىن جاڭارتىلىپ وتىراتىن ۇبت-عا دايىندالۋعا ارنالعان 30 000 وزەكتى تەست بار. بارلىق اقپارات ءۇش تىلدە, ياعني قازاق, ورىس, اعىلشىن تىلىندە دايىندالعان. كەرى بايلانىس تا قامتىلعان. ياعني مەكتەپ ديرەكتورىنان باستاپ وقۋشىعا دەيىن كومپانيانىڭ «قولداۋ قىزمەتىنە» حابارلاسىپ, ۇسىنىس-پىكىرىن ايتا الادى. ول قىزمەت تاۋلىك بويى جانە دەمالىسسىز جۇمىس ىستەيدى. «مەملەكەت باسشىسى قاسىم-جومارت توقاەۆتىڭ ءبىلىم ساپاسىن جاقسارتۋعا قاتىستى ايتقان باستامالارى جوبانى جۇزەگە اسىرۋىمىزعا ىقپال ەتتى, جىگەر بەرىپ ىنتالاندىردى. پرەزيدەنت الماتىداعى عىلىم ورداسىندا جاس عالىمدارمەن كەزدەسۋىندە بۇگىندە وراسان زور كاپيتال نەمەسە قىزمەتكەرلەردىڭ كوپتىگى ەمەس, بىرەگەي يدەيالاردى تۋدىرىپ, ولاردى جۇزەگە اسىرا ءبىلۋ قابىلەتى باستى ارتىقشىلىق سانالاتىنىن, ال ول جاستاردىڭ, وزگەرىستەردەن قورىقپايتىن تاباندى ءارى باتىل ادامداردىڭ, سونىڭ ىشىندە عالىمداردىڭ قولىنان كەلەتىنىن ايتتى. «الەمدەگى «Google», «Microsoft», «Apple» سياقتى كوپتەگەن تەحنولوگيالىق الپاۋىتتاردىڭ نەگىزىن ستۋدەنتتەر قالاعان. ءبىزدىڭ ەلىمىزدە دە تالانتتى كوماندالار پايدا بولادى جانە ولار جاھاندىق نارىقتا كوش باستايتىن IT-كومپانيالار قۇرادى دەپ سەنەمىن. ءوز مۇمكىندىگىمىزدى ءمۇلت جىبەرمەي, الەمدىك تەحنولوگيالىق باسەكەدەگى پوزيتسيامىزدى نىقتاي ءتۇسۋ قاجەت», دەدى مەملەكەت باسشىسى. وسى ورايدا وقۋ-اعارتۋ مينيسترلىگى, جەرگىلىكتى جەرلەردەگى ءبىلىم باسقارمالارى ءبىزدىڭ جوبامىزدى قولدايتىنىنان ءۇمىتتىمىز. ەگەر قارجىلاي قولداۋ كورسەتىلسە, ەلىمىزدىڭ بۇكىل مەكتەبىن قامتۋ نيەتىمىز بار. وسى تاراپتا ءبىز جاساعان وتاندىق ءونىم جان-جاقتى قولداۋدى قاجەت ەتەدى», دەيدى كومپانيانىڭ باس ديرەكتورى ىلەسبەك جاقىپبەك ۇلى.
جوبا اۆتورلارى بۇگىنگى دەڭگەيدە توقتاپ قالماي, زامان تالابىنا ساي يننوۆاتسيالىق ستەندتەردى جاڭارتىپ, وقۋشىلاردى قىزىقتىرۋ ماقساتىندا تەحنولوگيانى دامىتۋدى كوزدەپ وتىر. ماماندار وقىتۋدىڭ باسىمدىعى وقۋشىلاردىڭ بەلگىلى ءبىر ءبىلىم, بىلىك جانە داعدىلاردى يگەرۋى ەمەس, ولاردىڭ ءوز بەتىنشە ءبىلىم الىپ, ونى وڭدەي الۋ, قاجەت نارسەنى تاڭداۋ, ونى مىقتى ەستە ساقتاۋ جانە باسقالارمەن بايلانىستىرۋ قابىلەتى بولۋى كەرەكتىگىن ايتادى. بۇل ورايدا جوبانى جۇزەگە اسىرۋشى جاستار ۇسىنىلىپ وتىرعان يننوۆاتسيالىق تەحنولوگيالاردى كەڭىنەن ەنگىزۋ مەكتەپ وقۋشىلارىنىڭ ءبىلىم ساپاسىن, تانىمدىق بەلسەندىلىگى مەن وقۋ ىنتاسىن جاقسارتۋعا جاعداي جاسايتىنىنا سەنىمدى.
تۇركىستان وبلىسى
