ءوڭىردىڭ قاسيەتتى جەرلەرىن وقىرماندار اراسىندا كەڭىنەن ناسيحاتتاۋ ماقساتىندا ۇيىمداستىرىلعان بايقاۋعا 32 ۇمىتكەر قاتىسىپ, تۋىندىلارىن قازىلار القاسىنىڭ قاراۋىنا ۇسىندى. بەلگىلى قىلقالام شەبەرلەرى ۇسىنعان جۇمىستاردىڭ اراسىندا ءساتتى شىققان دۇنيەلەر جەتىپ- ارتىلادى. سوندىقتان دا قازىلار القاسىنا جەڭىمپازداردى انىقتاۋ وڭايعا سوققان جوق.
«كىتاپحانا ۇجىمىنىڭ ۇسىنىسىن قابىل العان كاسىبي مامانداردىڭ بايقاۋعا بەلسەندىلىكپەن قاتىسقانى ءۇشىن العىسىمىز زور. قازىلار القاسىنىڭ قاراۋىنا ۇسىنىلعان تۋىندىلاردىڭ بارلىعى دەرلىك ويداعىداي شىققان.
ءوز ءىسىن جەتىك مەڭگەرگەن ازاماتتاردىڭ قولىنان شىققان تۋىندىلار تاڭداي قاقتىرماي قويمايدى. ءبىر سوزبەن ايتقاندا, بايقاۋعا قاتىسقانداردىڭ اراسىندا مىقتى باسەكەلەستىك بولدى. ولار تۋىندىلارىن وقىرماندارىمىزعا تارتۋ ەتتى», دەيدى وبلىستىق كوزى كورمەيتىن جانە ءالسىز كورەتىن ازاماتتار كىتاپحاناسى ديرەكتورىنىڭ ورىنباسارى تولقىن كۇزەنوۆا.
بايقاۋ قورىتىندىسىندا «قولونەر» اتالىمى بويىنشا مارات ايدارقۇلوۆ ءى ورىنعا لايىق دەپ تانىلدى. ال جۇلدەلى ەكىنشى ورىن بەلگىلى سۋرەتشى قازىم امانقوسوۆقا بۇيىرسا, ارۋجان سۇلەيمەنوۆا ۇزدىك ۇشتىكتى قورىتىندىلادى. «ماكەت» اتالىمى بويىنشا جامبىل ەگىزەكوۆ جەڭىمپاز اتانسا, كاميلا سابيتقىزى مەن المات تىنىسبەك جۇلدەلى ءىى جانە ءىىى ورىنداردى ءوزارا ءبولىستى. جەڭىمپازدار مەن جۇلدەگەرلەردىڭ بارلىعى باعالى سىيلىقتارمەن ماراپاتتالدى.
تاراز قالاسى
