ەلدىڭ دامۋى مەن وركەندەۋىندەگى كوشباسشى جوباعا اينالدى
كەشە پاۆلوداردا “قازاقستان ەلەكتروليز زاۋىتىنىڭ” ەكىنشى كەزەگى سالتاناتتى تۇردە ىسكە قوسىلدى. جاڭا قۇرىلىستىڭ اشىلۋ راسىمىنە پرەزيدەنت نۇرسۇلتان نازارباەۆ قاتىستى.
ماۋسىم ايىندا جولى ءتۇسىپ, وزدەرىنە كەلە جاتقان ەلباسىنىڭ ساپارىن ەستىگەلى بەرى كەرەكۋ ءوڭىرى تولقۋ ۇستىندە. ايتسا ايتقانداي, ءوندىرىسى وركەندەگەن وبلىسقا نۇرسۇلتان نازارباەۆتىڭ ءىلتيپاتى مەن نازارى ەرەكشە ەكەنى بەلگىلى. ال جۇرتشىلىق “قازاقستان ەلەكتروليز زاۋىتىنىڭ” ەكىنشى كەزەگى ىسكە قوسىلاتىنىن, وسىدان بەس-التى جىل بۇرىن ەلباسىنىڭ ءوزى كەلىپ, بوس جاتقان دالاعا قازىعىن قاعىپ كەتكەن جەردەن بۇگىندە الىپ قۇرىلىستىڭ بوي كوتەرگەنىن, زاۋىتتىڭ العاشقى كەزەگىن ىسكە قوسىپ, ءوندىرىس تەتىگىن باسقانىن, عاسىر جوباسىنىڭ ەل يگىلىگىنە اينالعانىن جاقسى ءبىلىپ, حاباردار بولىپ وتىر. از ۋاقىت ىشىندە يەن دالاعا جان بىتىرگەن الىپ قۇرىلىسقا تاڭدانا قارايدى, مەتاللۋرگتەر مەن وسى زاۋىتتى سالىپ جاتقان قۇرىلىسشىلار ەلىمىزدىڭ يندۋستريالىق كارتاسىنان بەلدى دە بەدەلدى ورىن العان ماڭىزدى جوبا دەپ ماقتانىش ەتەدى.
سوڭعى كۇندەرى كەرەكۋ ءوڭىرىنىڭ جۇرتشىلىعى اسپاننان شوكىمدەي بۇلت ىزدەپ تابا الماي, اپتاپ ىستىقتىڭ بەتى قايتپاي اۋا قارماپ وتىر ەدى. سول ەكى ارادا دالا مەن قالاعا جاڭبىر نوسەرلەتتى-اي كەلىپ. اينالا ەركىن تىنىستاپ, سالقىنداپ, سايابىر تاپقانداي. جاندارى جادىراپ قالعان جۇرتشىلىق مارتەبەلى قوناقتىڭ اۋە جولىمەن باستالاتىن بۇل ساپارىنىڭ سوناۋ كوكپەن جاقسىلىققا جاراسقان ءبىر بايلانىسى دا بار شىعار-اۋ دەپ وي تۇيگەندەي.
ەندى, مىنە, جۇرتشىلىق اسىعا كۇتكەن كۇن دە كەلىپ جەتىپ, استانادان ۇشىپ شىققان اقشاڭقان لاينەر وبلىس ورتالىعىنىڭ اۋەجايىنا كەلىپ قوندى. پرەزيدەنت وسى جەردەن “قازاقستان ەلەكتروليز زاۋىتىنا” قاراي بەت الدى. زاۋىت الاڭىنا جينالعان جۇمىسشىلار, قۇرىلىسشىلار, مەتاللۋرگتەر مەملەكەت باسشىسىن اسىعا كۇتىپ, شىنايى ماقتانىش پەن شاتتىق سەزىمىندە تۇر. ارقايسىسىنىڭ قولدارىندا كوك تۋ – جالاۋشالارى جەلبىرەيدى. “قازاقستان”, “نۇرسۇلتان” دەپ قوشەمەتتەپ قارسى الدى. بۇل ەلىمىزدىڭ باس مەتاللۋرگى اتانعان جوعارى مارتەبەگە يە ەلباسىن قۇرمەتپەن قارسى العان مەتاللۋرگتەردىڭ جالىندى اقجارما سالەمى ەدى. الدىمەن مەملەكەت باسشىسى سالتاناتتى ءراسىمدى ءجۇزەگە اسىردى. ەلەكتروليز زاۋىتىنىڭ ەكىنشى كەزەگىن ارنايى تەتىكتى – قىزىل نۇكتەنى باسۋ ارقىلى ىسكە قوستى.
– ارداقتى اعايىن, قۇرمەتتى پاۆلودارلىقتار! – دەدى ەلباسى وسى ءبىر تاريحي ساتتە الاڭعا جينالىپ تۇرعان كوپشىلىكتىڭ الدىندا ءسوز باستاپ. – ءبارىمىز ءۇشىن بۇگىن وتە باقىتتى كۇن, سەبەبى, ەلىمىزدە “قازاقستان ەلەكتروليز” زاۋىتىنىڭ ەكىنشى كەزەگى ىسكە قوسىلىپ وتىر. مۇنداي مەتاللۋرگيا زاۋىتىن بۇرىنعى كەڭەستىك كەزەڭدە دە, ەۋروپانىڭ كەڭىستىگىندە دە ەشكىم سالعان جوق. تەك قانا ءبىزدىڭ ەلىمىزدە سالىنىپ وتىر. ءبىز تاۋەلسىزدىك العالى 20 جىلداي ۋاقىت بولدى, سول از عانا ۋاقىت ىشىندە كوپتەگەن تابىستارعا قولىمىز جەتتى. ال الدىمىزدا تۇرعان ونجىلدىقتاعى ەڭ ۇلكەن ماقسات – ەلىمىزدى يندۋستريالاندىرۋ. ول ءۇشىن ارنايى باعدارلاما جاسادىق. سونىڭ اياسىندا ەلىمىزدە ون جىلدىڭ ىشىندە 237 ءىرى ءوندىرىس سالاتىن بولامىز. بيىل ەلىمىزدە 144 ءوندىرىس ىسكە قوسىلادى. ال, 72 ءوندىرىستىڭ اشىلۋىن الداعى دۇيسەنبى كۇنى تىكەلەي بايلانىس ارقىلى جالپى حالىققا جاريالاپ كورسەتەتىن بولامىز. ءوندىرىستى ءوڭىر – پاۆلوداردىڭ ەل ەكونوميكاسىنا قوساتىن ۇلەسى وتە زور. بيىلدىڭ ىشىندە 42 وندىرىستىك جوبانى ىسكە قوسۋ كەرەك بولسا, ونىڭ 12-ءسى وسى ماۋسىم ايىنان باستاپ, قالعانى ەكىنشى جارتىجىلدىقتا ىسكە قوسىلايىن دەپ وتىر. سوندىقتان يندۋستريالىق وركەندەۋ جولىنا تۇسكەن ەلىمىز يندۋسترياسىنىڭ ەڭ بيىگى بولىپ سانالاتىن ءوندىرىستى ءوڭىردىڭ بۇگىنگى تابىسى قوماقتى. سىزدەردىڭ بارشالارىڭىزدى زاۋىتتىڭ ەكىنشى كەزەگىنىڭ ىسكە قوسىلۋىمەن قۇتتىقتايمىن. بۇگىن وتە ۇلكەن ءوندىرىس ىسكە قوسىلدى. وسى جەردە 2,5 مىڭ ادام جۇمىسقا تۇرادى, حالىقتىڭ جاعدايى ودان ءارى دە تۇزەلە بەرەدى. بۇدان ارتىق مەملەكەت ءۇشىن قانداي قۋانىش كەرەك, قۇتتى بولسىن!
بۇدان ءارى قاراي ەلباسى كەڭەستىك كەزەڭدەگى جىلدارى دا پاۆلودارعا كەلگەن سايىن قاناتتى مەتالل – اليۋميني ءوندىرۋدى ارمانداعانىن, ول كەزدە ونى وندىرۋگە ەلدە كۇش-قۋاتتىڭ بولماعانىن, قازىر ەلىمىزدىڭ تاۋەلسىزدىك العانىنىڭ ارقاسىندا وسى ارمانعا دا قول جەتىپ وتىرعانىن, وسى ورايدا ينۆەستورلارعا جاعداي جاسالعانىن, بۇرىنعى كەزدە مۇنداي زاۋىتتاردىڭ جيىرما جىل بويى سالىناتىنىن اتاپ كورسەتتى. ال جاڭا زامان قۇرىلىستارىنا بۇگىندە ەكى-ەكى جارىم جىلداي عانا ۋاقىت كەرەك. ءبىز قازاقستاندى الەمگە تانىمال ەتتىك, سىزدەرمەن بىرگە قيىندىقتاردان وتتىك. قازىر ءبىز ەقىۇ-عا توراعالىق ەتۋدەمىز. كوپ ۇلتتى ەلىمىزدىڭ مويىندالعانىنىڭ ارقاسىندا, بىرلىك پەن ىنتىماقتاستىقتىڭ ارقاسىندا وسىنداي جەتىستىكتەرگە جەتتىك. زاۋىت باسشىلىعى الدارىنا قويعان مەنىڭ تاپسىرمالارىمدى, العان مىندەتتەرىن ورىنداپ شىقتى. ال بۇل دەگەنىمىز بارلىق قۇرىلىسشىلار مەن جۇمىسشىلاردىڭ, مەتاللۋرگتەردىڭ بىرلەسكەن ەڭبەكتەرىنىڭ جەمىسى. راحمەت, سىزدەرگە! وسىنداي زاۋىتتىڭ ەكىنشى كەزەگىن ىسكە قوسۋ سالتاناتىنا قاتىسقانىما قۋانىشتىمىن! بۇل ءبىزدىڭ ەلىمىزگە دەگەن ۇلكەن سىيلىق, دەدى تولقي سويلەگەن مەملەكەت باسشىسى.
بۇدان كەيىن زاۋىت جۇمىسشىلارى سەرگەي رۋدچەنكو, باۋىرجان سمايىلوۆ ءسوز سويلەپ, ەلباسىنا: ء“بىز ءسىزدىڭ جولىڭىزدى قۋىپ مەتاللۋرگ بولۋدى ارماندادىق, ەندى, مىنە, وسى زاۋىتتا جۇمىس جاساپ جۇرگەنىمىزدى ماقتان ەتەمىز, بارلىق جاس ماماندار اتىنان سىزگە العىس ايتامىز”, دەسە, ليۋدميلا كۋزنەتسوۆا ءوز سوزىندە: “سىزگە ارقاشان جەڭىس تىلەيمىز, ءسىزدىڭ ساياساتىڭىزدىڭ ارقاسىندا ەلىمىزدە تىنىشتىق, تاتۋلىق سالتانات قۇرۋدا, راحمەت سىزگە! ءبىز ءسىزدى جاقسى كورەمىز, ءبىز ءسىز سياقتى ادەمى, اقىلدى پرەزيدەنتىمىز بولعانىنا ماقتانامىز, امان بولىڭىز!” – دەدى.
اتى ايگىلى ENRC – تابيعي رەسۋرستار كورپوراتسياسى قۇرامىنا ەنەتىن “قازاقستان ەلەكتروليز زاۋىتى” اكتسيونەرلىك قوعامى – جوعارى ساپالى ءونىم وندىرۋگە ءمۇمكىندىك بەرەتىن, ەلىمىزدە باستاپقى اليۋميني وندىرە الاتىن قازىرگى زامانعى تەحنولوگيالارمەن جابدىقتالعان الىپ ءوندىرىس ورنى. وسىدان ءۇش جىل بۇرىن, 2007 جىلعى جەلتوقساندا 250 مىڭ توننا باستاپقى اليۋميني وندىرەتىن جوعارى قۋاتى بار الىپ زاۋىتتىڭ العاشقى كەزەگى ىسكە قوسىلدى. قۇرىلىسقا جالپى كولەمى 800 ميلليون اقش دوللارى جۇمسالادى. الىپ زاۋىت قۇرىلىسىنا الەمنىڭ 12 ەلىنەن كەلگەن 18 كومپانيا قاتىستى. ەڭ باستىسى – عاسىر جوباسى اتالعان بۇل قۇرىلىسقا تەك الدىڭعى قاتارلى وزىق تەحنولوگيالار قولدانىلدى. زاۋىتتا ەندى 4 مىڭداي ادام ەڭبەك ەتەتىن بولادى. العاشقى كەزەگى ىسكە قوسىلعان زاۋىت بۇگىنگە دەيىن جىلدىق قۋاتى 125 مىڭ توننا تازا اليۋميني شىعارىپ كەلدى. ياعني, سالماعى 20 كيلو تارتاتىن اليۋميني قۇيمالارى – زاۋىت ءونىمى بولىپ تابىلادى. قازاق جەرىنىڭ ءاليۋمينيى قازىر ەۋروپا ەلدەرىنە تانىلا باستادى. بىلتىر لوندون بيرجاسى قازاقستاندىق قاناتتى مەتالدىڭ ساپاسىن باعالاپ, ونى وزدەرىنىڭ ساۋدا-ساتتىق رىنوگىنىڭ تىزىمىنە تىركەۋگە الدى. بۇل قازاق جەرىنىڭ ءاليۋمينيىن شەتەلدەرگە وتكىزۋگە بايلانىستى كەدەرگىلەر جوقتىعىن بايقاتادى. ءوندىرىستىڭ قورشاعان ورتاعا زالالى جوق, زاۋىت جىل سايىن تابيعاتتى قورعاۋ شارالارىنا 700 ميلليون تەڭگەدەي قاراجات ءبولىپ كەلەدى. ەلباسى ءوز ءسوزىندە ايتىپ وتكەنىندەي, ءبىزدىڭ جەرىمىزدە گلينوزەم دە, ەلەكتر قۋاتى دا جەتكىلىكتى, ەندىگى جەردە باستاپقى تازا اليۋمينيدەن كۇندەلىكتى تۇرمىسقا قاجەتتى بۇيىمدار, كولىكتەردىڭ قوسىمشا بولشەكتەرىن جاسايتىن كاسىپورىندار قۇرۋ جوسپارلانۋدا. وتكەن جىلعى داعدارىسقا قاراماستان, نەگىزگى كورسەتكىشتەر بويىنشا دامۋ قارقىنى باسەڭدەگەن جوق. جوسپارلانعان ىستەر جۇزەگە استى. جۇمىسشىلار داعدارىس سالقىنىن سەزىنبەدى. بۇل كۇندەرى وندىرىستە ورتاشا ەڭبەكاقى 96 568 تەڭگەنى قۇرايدى. وندىرىستە 2190 ادام جۇمىس ىستەيدى. جۋىردا عانا زاۋىت جۇمىسشىلارىنىڭ بالالارىنا ارناپ 240 ورىندىق بالاباقشا جانە 125 پاتەرلىك ون قاباتتى تۇرعىن ءۇي پايدالانۋعا بەرىلدى.
ءسويتىپ, زاۋىتتىڭ العاشقى كەزەگى 2007 جىلعى جەلتوقسان ايىندا بەلگىلەنگەن مەرزىمىنەن 27 اي بۇرىن اياقتالسا, ەكىنشى كەزەگىنىڭ قۇرىلىسى دا, مىنە, بەلگىلەنگەن ۋاقىتىنان بۇرىن ىسكە قوسىلىپ وتىر. زاۋىت جىلىنا 250 مىڭ توننالىق باستاپقى اليۋميني وڭدىرەتىن قۋاتقا قول جەتكىزدى. قازىرگى ۋاقىتتا زاۋىتتا زامان تالاپتارىنا ساي ەكولوگيالىق قاۋىپسىز جانە ەڭ سوڭعى تەحنولوگيالاردى پايدالانۋ ارقىلى پروگرەسسيۆتى اليۋميني ءوندىرۋ تەحنولوگيالارى قولدانىلۋدا. تەحنولوگيالىق وپەراتسيالاردىڭ تيىمدىلىگىن ارتتىرۋعا, ەلەكتروليزدەردىڭ جۇمىستارىنا جۇيەلى مونيتورينگ جۇرگىزۋگە, گاز تازالاعىش قۇرىلعىلاردى, قۇيۋ تسەحى مەن كومەكشى نىسانداردى دەر كەزىندە رەتتەۋگە مۇمكىندىك بەرەتىن جاڭا زاۋىتتىڭ بارلىق تەحنولوگيالىق ۇدەرىستەرى اۆتوماتتاندىرىلعان باسقارۋ جۇيەلەرىمەن باقىلانادى.
اكتسيونەرلىك قوعامنىڭ پرەزيدەنتى الماس يبراگيموۆ: ء“بىز بۇگىن بارشا قازاقستان ەلەكتروليز زاۋىتى ۇجىمىنىڭ جەڭىسى مەن جەتىستىكتەرىن اتاپ جاتىرمىز. زاۋىتتىڭ تولىق جوبالىق قۋاتتىلىعىنىڭ ىسكە قوسىلعانىنا قۋانىشتىمىز. الىپ كورپوراتسيا قابىلداعان 2023 جىلعا دەيىنگى الەۋمەتتىك باعدارلامالار اياسىندا بالاباقشالار, تۇرعىن ۇيلەر, باسقا دا الەۋمەتتىك-تۇرمىستىق نىساندار سالۋ جۇيەسى قاتارلاسىپ ارى قاراي جۇزەگە اسا بەرەدى. بۇل ماقساتقا كورپوراتسيا جالپى قۇنى 45 ميلليون اقش دوللارىن جۇمساماقشى”, – دەدى.
ۇكىمەت قاۋلىسىمەن بارلىعى جۇزدەن استام جوبالار بەكىتىلگەن ەلىمىزدى يندۋستريالاندىرۋدىڭ كارتاسى جاسالعانى بەلگىلى. ولاردىڭ قاتارىنا پاۆلودار وبلىسىنان 2014 جىلعا دەيىن قۇنى 722,2 ملرد. تەڭگەنى قۇرايتىن 42 يننوۆاتسيالىق جوبا بار بولسا, ونىڭ 26-سى بيىل, ال 12-ءسى وسى ماۋسىم ايىندا ىسكە قوسىلادى. جوعارىدا اتالعان 12 جوبانىڭ جۋىردا تورتەۋى, ەكەۋى ەكىباستۇزدا ىسكە قوسىلدى. ولاردىڭ ءبىرى – “ەۋرازيالىق ەنەرگەتيكالىق كورپوراتسياسى” اكتسيونەرلىك قوعامىنىڭ “ۆوستوچنىي” رازرەزىنىڭ جاڭا تەحنولوگيالار ارقىلى كومىر وندىرەتىن كەشەنى. بۇل تەحنولوگيا كومىر ءوندىرۋ قارقىنىن جىلىنا 10 ميلليون تەكشە مەترگە ارتتىرادى. ەكىنشىسى – “ەنەرگيا كاپيتال-1” كاسىپورنى. ول تاۋلىگىنە 30 مىڭ توننا نان-توقاش ونىمدەرىن ءپىسىرەتىن جانە وسى جەردەگى ازىق-ت ۇلىك بەلدەۋىنە ساي قالانى جانە ونىڭ اۋماعىنا قاراستى اۋىلدىق ايماقتاردى بىردەي قامتاماسىز ەتە الاتىن كاسىپورىن. جالپى, اتالمىش جوبالاردىڭ بارلىعى ىسكە قوسىلعاندا, ۋاقىتشا 12 مىڭ جۇمىس ورنى اشىلسا, سونىڭ 8 مىڭ جۇمىس ورنى تۇراقتى كۇيىندە ساقتالاتىن بولادى. اقسۋ فەرروقورىتپا زاۋىتىندا شيكىزاتتى وڭدەۋگە باعىتتالعان اگلومەراتسيالىق تسەح پەن جوعارى ماركالى بولات جانە مۇناي قۇبىرلارىن شىعارۋعا مۇمكىندىك بەرەتىن “KSP Steel” جشس ءوندىرىستى ءوڭىردىڭ ەكونوميكاسىنا جاڭا سەرپىن بەرەرى ءسوزسىز. سونىمەن قاتار, وبلىس ورتالىعىندا حلور جانە كاۋستيكالىق سودانى مەمبراندىق ادىسپەن شىعاراتىن ءوندىرىس ورنى – “كاۋستيك” اكتسيونەرلىك قوعامى, “رومات” فارماتسەۆتيكالىق كومپانياسى بازاسىندا فارماتسەۆتيكالىق جانە مەديتسينالىق ءدارى-دارمەكتەر شىعاراتىن زاۋىتتار سالۋ سياقتى جوبالار كۇن تارتىبىندە تۇر. قايسىسى بولسا دا حالىق يگىلىگى ءۇشىن, تۇراقتى جۇمىس ورىندارىنىڭ بولۋىن قامتاماسىز ەتەتىن جاڭا ءوندىرىستەر رەتىندە ومىرگە كەلەدى. بۇل جوبالاردىڭ كوشباسشىسى قاتارىندا “قازاقمىس” كورپوراتسياسى قولعا الاتىن ەكىباستۇز وڭىرىنە قاراستى جەردەگى “بوزشاكول” تاۋ-كەن بايىتۋ كومبيناتىن سالۋ مىندەتى تۇر. وسى ارقىلى ءوندىرىستى وڭىردەگى ءتۇستى مەتاللۋرگيا سالاسىن وركەندەتۋگە, ءارى وبلىستىڭ الەۋمەتتىك-ەكونوميكالىق دامۋىنا ۇلكەن ۇلەس قوسىلادى. بۇل جەردەگى كەنىشتەن مىس قوسپاسىمەن قاتار, التىن دا وندىرىلەدى. كورپوراتسيا وسى جەردەگى كەن كوزىن اشىپ, كەن-بايىتۋ كومبيناتىن سالۋعا 225 ملرد. تەڭگە كولەمىندە قارجى جۇمسايدى. جوسپار بويىنشا قۇرىلىس بيىلعى جىلدىڭ 2-ءشى جارتىسىندا باستالىپ, 2014 جىلى اياقتالادى. ەكىباستۇز گرەس-1 ستانساسىن كەڭەيتۋ جانە قايتا جاڭعىرتۋ جۇمىستارى دا وسى كارتاعا ەندى. ەكىباستۇز گرەس-2-ءنىڭ №3 ەنەرگيا بلوگىنىڭ قۇرىلىسى باستالادى. ەلىمىز بۇل كۇندەرى “قازاقستان-2030” ستراتەگياسىنىڭ اياسىندا يندۋستريالىق-يننوۆاتسيالىق جەدەل دامۋ بەسجىلدىعىن باستاپ كەتتى. ەلباسىنىڭ جارلىعىمەن 2010-2014 جىلدارعا ارنالعان ۇدە-مەلى يندۋستريالىق-يننوۆاتسيالىق دامۋ جونىندەگى مەملەكەتتىك باعدارلاما بەكىتىلدى.
جالپى, ءوندىرىستى ءوڭىردىڭ تىنىس-تىرشىلىگىنىڭ ءوسۋ دەڭگەيىن ەلىمىزدىڭ دامۋىنا قوسقان ۇلەسىنەن دە باعامداۋعا بولادى. بيىلعى جىلدىڭ ءبىرىنشى توقسانىندا وبلىستاعى ونەركاسىپ ورىندارى جالپى قۇنى 191,4 ملرد. تەڭگەنىڭ ونىمدەرىن ءوندىردى. وتكەن جىلى جاھاندىق ەكونوميكالىق جانە قارجىلىق داعدارىسقا قاراماستان, نەگىزگى كورسەتكىشتەر بويىنشا دامۋ قارقىنى باسەڭدەگەن جوق. جوسپارلانعان ىستەر وسىلايشا جۇزەگە اسۋدا. ەندىگى باستى ماقسات – ەلباسىنىڭ “جاڭا ونجىلدىق – جاڭا ەكونوميكالىق ءورلەۋ – قازاقستاننىڭ جاڭا مۇمكىندىكتەرى” اتتى بيىلعى جولداۋىنان باستاۋ العان ماڭىزدى مىندەتتەردىڭ ءبىرى – ەلدى ۇدەمەلى يندۋستريالىق-يننوۆاتسيالىق دامىتۋدىڭ 2010-2014 جىلدارعا ارنالعان باعدارلاماسىن لايىقتى تۇردە جۇزەگە اسىرۋ. ەكونوميكانى جاڭعىرتۋدىڭ جارقىن جولىنا ءتۇسۋدىڭ كىلتى بولىپ تابىلاتىن, ەلدى دامۋعا باستايتىن وسىنداي سەرپىندى جوبالاردى ىسكە اسىرۋ ناتيجەسىندە, ارينە, الەمنىڭ باسەكەگە قابىلەتتى ەلۋ ەلىنىڭ قاتارىنا ەنۋ مۇمكىندىگىمىز بار. كەلەر ونجىلدىقتاعى اسقارالى اسۋلاردىڭ كورىگىنە اينالعان سەرپىندى جوبالاردىڭ الدى قازىر ىسكە قوسىلىپ, حالىق يگىلىگى ءۇشىن جۇمىس جاساي باستادى. ەلباسىنىڭ يدەياسىمەن جۇزەگە اسىرىلعان ەگەمەن ەلدىڭ العاشقى ءىرى جوبالارىنىڭ ءبىرى تىڭ جەردەن تىنىس تاۋىپ, وسىلاي جۇزەگە استى. ەلباسىنىڭ ساپارى ەرتەڭ ارى قاراي جالعاسادى.
فاريدا بىقاي, سۋرەتتەردى تۇسىرگەندەر س.بوندارەنكو, ب.وتارباەۆ. پاۆلودار.
