مىس ءوندىرىسىنىڭ باس كەن بايىتۋشىسى اينۇر جۇماعۇلقىزى بيجانوۆا جاقىندا وندىرىستە تسيفرلىق باسقارۋ داعدىلارىن ەنگىزۋدەگى جاڭاشىلدىعى, قىزمەتكەرلەردىڭ كاسىبي بىلىكتىلىكتەرىن كوتەرۋدەگى ۇيىمداستىرۋشىلىق قابىلەتى مەن جاۋاپكەرشىلىگى جوعارى باعالانىپ, «جاۋىنگەرلىك ەرلىگى ءۇشىن» مەدالىمەن ماراپاتتالدى.
قىرىق جاستاعى كەن بايىتۋشىنىڭ ەڭبەك ءوتىلى – 16 جىل. ول اقتوبە قالاسىنداعى №30 قازاق ورتا مەكتەبىن بىتىرگەن سوڭ, رەسەيدەگى ەڭ تانىمال تەحنيكالىق جوعارى وقۋ ورىندارىنىڭ ءبىرى – ماسكەۋ بولات جانە قورىتپالار ينستيتۋتىنا ءتۇسىپ, ونى ۇزدىك اياقتاپ, 2008 جىلى اقتوبە مىس كومپانياسىنا فلوتاتور بولىپ ورنالاستى. جەر استىنان الىنعان كەن ۇساقتالىپ, سۇرىپتالىپ, قاجەتتى مولشەردە ۇنتاققا اينالادى. بولشەكتەردىڭ مينەرالداردان ءبولىنۋىن جەڭىلدەتەتىن جۇمىستى فلوتاتور باسقارادى. ول كەننەن پايدالى قازبالاردى ايىراتىن جابدىقتاردى ىسكە قوسىپ, ونداعى قىسىم, تەمپەراتۋرا, رەاگەنتتەر مولشەرى, كوبىكتىڭ بيىكتىگىن انىقتايدى. سوندىقتان دا ءتۇستى مەتالدار وندىرىسىندە حيميالىق زاتتارمەن جۇمىس ىستەيتىن فلوتاتور قىزمەتى ەرەكشە جاۋاپكەرشىلىكتى قاجەت ەتەدى. مامان حيميالىق رەاگەنتتەردىڭ مولشەرىن دۇرىس تاڭداي بىلۋمەن قاتار, ولاردىڭ قوسپاداعى مولشەرىن ءدال تەڭدەستىرۋگە دە جاۋاپتى. ەكىنشى جاعىنان, كەن ايىراتىن تەحنيكالىق جابدىقتاردى باسقاراتىن بولعان سوڭ, وندىرىستەگى قاۋىپسىزدىك ەرەجەلەرىن دە قاتاڭ ساقتاۋعا مىندەتتى.
24 جاسىندا جاڭادان اشىلعان كومپانياداعى اسا قيىن جۇمىستىڭ تىزگىنىن قولعا العان اينۇر قارا جۇمىستان قايمىقپاي, تاباندىلىقپەن ەڭبەك ەتتى. ءبىر قاراعاندا قىز بالاعا الىستاعى كەنىشتە بەس كۇندىك ۆاحتالىق جۇمىسپەن قاتىناپ ىستەۋ, فابريكاداعى شاڭ-توزاڭدى جۇتۋ وڭاي ەمەس. سوعان قاراماستان, تاڭداعان ماماندىعىنا دەگەن قۇرمەتى اينۇردى وندىرىستەگى قيىندىقتاردى جەڭە بىلۋگە ۇيرەتتى. بىرەر جىلدان سوڭ, وسى كومپانيانىڭ №2 كەن بايىتۋ فابريكاسىنا تەحنولوگ, ودان باس تەحنولوگ بولىپ اۋىستى. ءتۇستى مەتالدار وندىرىسىندەگى جاۋاپتى جۇمىس تىزگىنىندەگى جاس مامانعا باسقا كومپانيالاردان دا ۇسىنىس تۇسە باستادى.
اينۇر جۇماعۇلقىزى 2015 جىلى ەلىمىزدەگى ءىرى تاۋ-كەن كومپانيالارىنىڭ ءبىرى – «Kaz Minerals PLC» كورپوراتسياسىنىڭ قۇرامىنا كىرەتىن «قازمينەرالس بورشاكول» كومپانياسىنا اۋىستى. بورشاكول كەن ورنى – پاۆلودار وبلىسىنىڭ اقسۋ قالاسىنان 60 شاقىرىم جەردە ورنالاسقان ەلىمىزدەگى ءىرى مىس كەن ورىندارىنىڭ ءبىرى. بۇل جەردە مىس ءوندىرۋ 2016 جىلى باستالدى. 2020 جىلى ول «ERG» كومپانياسىنا اۋىسىپ, ءۇش جىلدان سوڭ قايتادان اقتوبە مىس كومپانياسىنا باس كەن بايىتۋشى بولىپ كەلدى.
اينۇر قازىر تۇرمىستا, ەكى بالاسى بار. ەرى دە وسى كومپانيانىڭ كەن بايىتۋ فابريكاسىندا ەڭبەك ەتەدى. بەس كۇندىك جۇمىستا جۇرگەندە كىشكەنتاي بالالارىن اتا-اناسى قارايدى.
ا.بيجانوۆا ۇنەمى ىزدەنىس ۇستىندە جۇرگەندى جاقسى كورەدى. كەنشىنىڭ بەينەتتى جۇمىسىن وتە جاقسى بىلەتىن مامان قول ەڭبەگىن جەڭىلدەتۋ ءۇشىن وندىرىسكە جاڭاشىلدىق ەنگىزۋ قاجەتتىگىن نازارعا ۇستاپ, وسى ماقساتتا باسشىلىققا ۇسىنىستار ءبىلدىرىپ ءجۇر.
«فلوتاتسيانىڭ نەگىزگى كەزەڭدەرى – كەندى ۇساقتاۋ, سۇرىپتاۋ. بۇل بولشەكتەردىڭ مينەرالداردان ءبولىنۋىن جەڭىلدەتەدى. كەن بايىتۋ ءىسى – فيزيكالىق-حيميالىق ۇدەرىستەرگە نەگىزدەلگەن وتە كۇردەلى سالا. كەنشىلەردىڭ جۇمىسىن جەڭىلدەتىپ, ءوندىرىستى وڭتايلاندىرۋ ماقساتىندا «اقتوبە مىس كومپانياسى» جشس باسشىلىعى وندىرىسكە تسيفرلىق كومەكشى ەنگىزۋ جوباسىن قولعا الدى. ءبىز بۇل جۇمىستى №1 بايىتۋ فابريكاسىندا جۇزەگە اسىرماقشىمىز. قازىر قايتا جاراقتاندىرۋ جۇمىستارى ءجۇرىپ جاتىر. الداعى جىلدىڭ شىلدەسىنەن وسى جەردەگى بارلىق تەحنولوگيالىق ۇدەرىستى تسيفرلىق كومەكشى باسقاراتىن بولادى», دەيدى اينۇر جۇماعۇلقىزى.
وتباسى مەن كەن ءوندىرۋ ىسىندەگى جۇمىسىن قاتار الىپ جۇرگەن باتىر قىزدىڭ الداعى كۇنگە جوبالارى وتە كوپ. قازىردە الەم ەلدەرىنىڭ قالدىقسىز وندىرىستەگى تاجىريبەلەرىن زەرتتەۋگە, مەڭگەرۋگە دەن قويىپ, ەرەكشە ىقىلاس تانىتىپ ءجۇر.
اقتوبە وبلىسى
