كەڭەس وتىرىسىندا مەملەكەت باسشىسىنىڭ جولداۋىندا بەلگىلەنگەن مۇناي-گاز جانە ەلەكتر ەنەرگەتيكاسى سەكتورلارىن دامىتۋعا باعىتتالعان مىندەتتەرگە باستى نازار اۋدارىلدى.
KAZENERGY باس ديرەكتورى جاندوس نۇرماعانبەتوۆ قاۋىمداستىقتىڭ اعىمداعى جىل ىشىندە اتقارىلعان جۇمىستار جونىندە ەسەپ بەرىپ, الداعى كەزەڭگە ارنالعان جوسپارلار جايىندا ايتىپ بەردى.
«2024 جىلعى جەتىستىكتەر اراسىندا قر ۇكىمەتىنىڭ قولداۋىمەن جانە قر پارلامەنتىنىڭ جۇمىس كوميتەتتەرىنە بەلسەندى قاتىسۋ ارقىلى بىرقاتار سالالىق ماسەلەلەر وڭتايلى شەشىمىن تاپتى. «ەنەرگيا» تالداۋ ورتالىعى قۇرىلدى, ول EXia پلاتفورماسىنىڭ كومەگىمەن وتىن-ەنەرگەتيكالىق كەشەن ءۇشىن تالدامالىق ساراپتاما جاساۋدىڭ نەگىزگى كوزىنە اينالدى.زاڭنامالىق بازانى جەتىلدىرۋ جونىندەگى جۇمىس شەڭبەرىندە قاۋىمداستىق ساراپشىلارى قر پارلامەنتىنىڭ جۇمىس توپتارىنىڭ 30-دان استام وتىرىسىنا قاتىستى. بۇل گەولوگيالىق بارلاۋعا سالىناتىن ينۆەستيتسيالاردىڭ ارتۋىنا ىقپال ەتەدى جانە ينۆەستيتسيا كولەمى 15 ملرد اقش دوللارىنان اساتىن مۇناي-گاز حيمياسى ونەركاسىبىن دامىتۋدىڭ جول كارتاسىن بەكىتۋگە مۇمكىندىك بەردى. مۇنىڭ ناتيجەسىندە 20 مىڭ جۇمىس ورنى اشىلىپ, 2030 جىلعا قاراي ءوندىرىس كولەمى ەكى ەسەگە ارتاتىن بولادى», دەدى جاندوس نۇرماعانبەتوۆ.
حالىقارالىق ارەنادا KAZENERGY استانادا 2028 جىلى دۇنيەجۇزىلىك مۇناي كونگرەسىن وتكىزۋ قۇقىعىنا قول جەتكىزدى. كەلەسى جىلدان باستاپ ەنەرگەتيكا مەن مۇناي-گاز سالاسىنىڭ الەمدىك كوشباسشىلارىنىڭ قاتىسۋىمەن وتەتىن وسىناۋ جاھاندىق جيىنعا دايىندىق جۇمىستارى باستالادى.
سونىمەن قاتار وتىرىستا قر ەنەرگەتيكا ۆيتسە-ءمينيسترى ەرلان اقكەنجەنوۆ, سونداي-اق «قازمۇنايگاز», «تەڭىزشەۆرويل» جانە ExxonMobil Kazakhstan كومپانيالارىنىڭ وكىلدەرى ءسوز سويلەدى.
ءىس-شارا سوڭىندا قاۋىمداستىقتىڭ ءداستۇرلى ۇلتتىق ەنەرگەتيكالىق بايانداماسىنىڭ جەڭىلدەتىلگەن KAZENERGY Outlook 2024 نۇسقاسىنىڭ العاشقى شىعارىلىمى تانىستىرىلدى.
