فوتو: centeraktiv.kz
پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ ۇكىمەت ۇلتتىق بانكپەن جانە جەرگىلىكتى اتقارۋشى ورگاندارمەن بىرلەسىپ, ىشكى نارىقتى تاۋارلارمەن قامتاماسىز ەتۋ, باسەكەلەستىكتى قورعاۋ, سىرتقى ساۋدانى جانە تاريفتەردى رەتتەۋ ەسەبىنەن ينفلياتسيانى تەجەۋ جونىندەگى شارالار كەشەنىن ىسكە اسىرۋدى جالعاستىراتىنىن ايتتى. وسىنداي ارەكەتتەردىڭ ارقاسىندا قازاقستاندا 2023 جىلعى جىلدىق ينفلياتسيا جىلىنا 20,3%-دان 9,8%-عا دەيىن تومەندەگەنى جانە 2024 جىلعى 11 ايدىڭ قورىتىندىسى بويىنشا 8,4%-دى قۇراعانى اتاپ ءوتىلدى.
«ۇكىمەت جاعدايعا مونيتورينگ جۇرگىزەدى ءارى الەۋمەتتىك ماڭىزى بار ءونىم تۇرلەرى بويىنشا ەكونوميكاداعى باعالاردى تەجەۋگە باعىتتالعان شارالار قابىلدايدى. الەۋمەتتىك ماڭىزى بار ازىق-ت ۇلىك تاۋارلارىنىڭ باعاسىن تەجەۋ ءۇشىن قىسقى جانە كوكتەمگى ماۋسىمارالىق كەزەڭگە قاراي جەتكىلىكتى كولەمدە قالىپتاسقان جاڭا ءونىم قورى شىعارىلاتىن بولادى. تۇراقتاندىرۋ قورلارىنىڭ, ساۋدا وبەكتىلەرىنىڭ قويمالارىندا جانە اۋىل شارۋاشىلىعى وندىرۋشىلەرىندە 29 نەگىزگى ءتۇرى بويىنشا 826 مىڭ توننادان استام ازىق-ت ۇلىك ساقتالادى. بۇل قورلار ساقتاۋ مەرزىمدەرىن ەسكەرە وتىرىپ ۇنەمى تولىقتىرىلىپ وتىرادى جانە ەلىمىزدىڭ قاجەتتىلىكتەرىن بىرنەشە ايعا قامتاماسىز ەتە الادى. سونداي-اق جاڭا جىلدىق مەرەكەلەر قارساڭىندا باعانىڭ ىقتيمال ءوسۋىن تەجەۋ ءۇشىن قوسىمشا شارالار قابىلدانۋدا. وڭىرلەردە تۇراقتى اۋىلشارۋاشىلىق جارمەڭكەلەرى ۇيىمداستىرىلادى. قىسقى كەزەڭدە جانە ماۋسىمارالىق كەزەڭدە باعانى ودان ءارى تۇراقتاندىرۋ ءۇشىن اقپان ايىنىڭ باسىندا تۇراقتاندىرۋ قورلارىنان كوكونىستەردى بوساتۋدى باستاۋ جوسپارلانۋدا, بۇل نارىقتى قاجەتتى ءونىم كولەمىمەن قامتاماسىز ەتۋگە جانە باعا اۋىتقۋلارىنىڭ الدىن الۋعا مۇمكىندىك بەرەدى», دەپ اتاپ ءوتتى نۇرلان بايبازاروۆ.
وڭىرلىك كوميسسيالار باعانىڭ وسۋىنە تالداۋ جۇرگىزەدى, ءونىمسىز دەلدالدار انىقتالادى جانە ساۋدا ۇستەمەسىنىڭ اسىپ كەتۋ فاكتىلەرى قارالادى. اتالعان كوميسسيالاردىڭ قىزمەتى وسى جىلى باقىلاۋ-فيسكالدىق جانە كۇشتىك ورگانداردى تارتۋ ەسەبىنەن كۇشەيتىلدى. ماۋسىمارالىق كەزەڭدە ىشكى نارىقتى كوكونىستەرمەن قامتاماسىز ەتۋ ماقساتىندا جاقىن شەتەلدەن ەرتە كوكونىستەردى جەتكىزۋ ءۇشىن «جاسىل ءدالىز» ۇيىمداستىرىلادى. بۇدان باسقا, ساۋدا سالاسىندا بيزنەسپەن تىعىز ءوزارا ءىس-قيمىل جۇزەگە اسىرىلادى.
