فوتو: الماتى وبلىسىنىڭ اكىمدىگى
ەسكەرتكىشتىڭ اشىلۋ ءراسىمى زامانبەك نۇرقادىلوۆ اتىنداعى ونەر مەكتەبىنىڭ الاڭىندا ۇيىمداستىرىلدى. سالتاناتتى ءىس-شاراعا مەملەكەت جانە قوعام قايراتكەرلەرى, اقىن-جازۋشىلار, تانىمال تۇلعالار مەن قايراتكەردىڭ وتباسى مۇشەلەرى قاتىستى.
ەسكەرتكىشتىڭ اشىلۋىن وبلىس اكىمىنىڭ ورىنباسارى نۇرجان قۇدايبەرگەنوۆ, قوعام قايراتكەرلەرى توققوجا ەستەنوۆ پەن بولات نۇرعازيەۆ اشىپ, زامانبەك نۇرقادىلوۆتىڭ ۇلى قايرات نۇرقادىلوۆ ءبيۋستىڭ اشىلۋ ءراسىمىن ورىندادى.
وبلىس اكىمىنىڭ ورىنباسارى ءوز سوزىندە قايراتكەردىڭ ەل دامۋىنا قوسقان زور ۇلەسىن اتاپ ءوتىپ, ونىڭ ەڭبەگىنىڭ ۇلت تاريحىندا ماڭگى ساقتالاتىنىن ايتتى.
«بۇل ەسكەرتكىش – حالقىمىزدىڭ قايراتكەرگە دەگەن شىنايى قۇرمەتىنىڭ بەلگىسى. ۇلت جاناشىرى رەتىندە زامانبەك نۇرقادىلوۆ ەل ەگەمەندىگىنىڭ نىعايۋىنا ەلەۋلى ۇلەس قوستى. وسىنداي تۇلعالاردىڭ ەڭبەگىن ۇرپاققا مۇرا ەتۋ – ءبىزدىڭ ورتاق پارىزىمىز. سونداي-اق بيىكتىگى 4,5 مەتر بولاتىن بۇل تۋىندىنىڭ اۆتورلارى ايدوس بۇركىتباەۆ پەن تيمۋر نۇرمۇحامەتوۆكە العىسىمىزدى بىلدىرەمىز», دەدى ول.
سالتاناتتى راسىمنەن كەيىن قاتىسۋشىلارعا زامانبەك ۇنۇرقادىلوۆتىڭ ءومىرى مەن قىزمەتى تۋرالى «نە تولكو و سەبە» اتتى كىتاپتىڭ 300 داناسى تاراتىلعان.
ايتا كەتەيىك, 2015 جىلى قۇرىلعان كەگەن اۋىلىنداعى بالالار ونەر مەكتەبى بالالارعا دومبىرا, قوبىز, بايان, ءداستۇرلى ءان, ەسترادا-ۆوكال, حورەوگرافيا, بەينەلەۋ, ءمۇسىن جانە ساندىك-قولدانبالى ونەر باعىتتارى بويىنشا ءبىلىم بەرەدى. بۇگىنگى تاڭدا مەكتەپتە 44 پەداگوگتىڭ باسشىلىعىمەن 890 وقۋشى ءبىلىم الىپ جاتىر.
مەكتەپتىڭ بولىمشەلەرى اۋدانداعى 12 ەلدى مەكەندە ورنالاسقان, بۇل بالالارعا قوسىمشا ءبىلىم الۋعا مۇمكىندىك بەرەدى. وقۋشىلاردىڭ جەتىستىكتەرى ايتارلىقتاي: حالىقارالىق بايقاۋلاردا – 38, رەسپۋبليكالىق دەڭگەيدە – 176, وبلىستىق سايىستاردا – 158, اۋداندىق جارىستاردا – 82 جۇلدەلى ورىندارعا يە بولدى.
مەكتەپتىڭ دامۋى مەن جەتىستىكتەرى ارقىلى كەگەن وڭىرىندە مادەنيەت پەن ونەردى ناسيحاتتاۋ جۇمىستارى جوعارى دەڭگەيدە جۇزەگە اسىرىلىپ جاتىر.
