جەتىسۋ جەرىندە شالعايداعى اۋىل-ايماقتاردا دا تۇرعىن ءۇي سالۋ جۇمىسى قىزۋ ءجۇرىپ جاتىر. سولاردىڭ ىشىندە كەربۇلاق اۋدانىنا قاراستى التىنەمەل اۋىلىندا 5 ءۇي, شانحاناي, شۇبار, قاسپان اۋىلدارىنىڭ ارقايسىسىندا 6 ۇيدەن پايدالانۋعا بەرىلدى. اۋدان اكىمى قانات ەسبولاتوۆ اۋىلدارعا ارنايى بارىپ, جەكە تۇرعىن ءۇي كىلتتەرىن جاڭا يەلەرىنە تابىستادى.
اۋدان اكىمدىگىنىڭ مالىمەتىنە قاراعاندا, تۇرعىن ءۇي كەزەگىندە 1 603 ادام تۇر. ولاردى باسپانامەن قامتاماسىز ەتۋ ماقساتىندا قازىرگى ۋاقىتتا باعدارلى جۇمىستار جۇيەلى اتقارىلىپ كەلەدى.
«بۇگىندە كەربۇلاق اۋدانىنا قاراستى اۋىلداردا 100 جەكە تۇرعىن ءۇي سالىنىپ جاتىر. ودان بولەك اۋدان ورتالىعى سارىوزەك اۋىلىندا 60 پاتەرلى ەكى كوپقاباتتى ءۇيدىڭ قۇرىلىسى اياقتالۋعا جاقىن. تاعى 60 پاتەرلىك ءبىر ءۇيدى رەسپۋبليكا كۇنى قارساڭىندا قولدانىسقا بەردىك. سالىنىپ جاتقان تۇرعىن ۇيلەردىڭ بارلىعى كەزەكتە تۇرعان ازاماتتارعا, سونىڭ ىشىندە تۇرمىسى تومەن, الەۋمەتتىك وسال توپتاعى تۇرعىندارعا, ۇيلەرى اپاتتى دەپ تانىلعاندارعا بەرىلەدى», دەيدى كەربۇلاق اۋداندىق قۇرىلىس جانە قالا قۇرىلىسى ءبولىمىنىڭ باسشىسى باقىتكەلدى قابيدولدا.
اۋىلدارداعى جاڭا ۇيلەر 3 بولمەدەن تۇرادى. ارقايسىسىنىڭ اۋماعى 77 شارشى مەتر. ءۇي ىشىندە تۇرمىسقا قاجەتتى قولايلى جاعداي تولىق قاراستىرىلعان. جاڭا قونىس قۋانىشىنا كەنەلگەن ازاماتتاردىڭ ىشىندە قاسپان اۋلىنىڭ تۇرعىنى گۇلميرا جاناتاەۆا دا بار.
«قاسپان اۋلىندا كورنەكتى, جاڭا التى ءۇي سالىندى. سونىڭ ءبىرى – ءبىرىنشى توپتاعى مۇگەدەكتىگى بار بالاما بەرىلدى. ءۇيدىڭ ءىشى, جايلى, كەڭ, كوڭىلىمىزدەن شىقتى. وسىنداي قۋانىش باسپاناعا ءزارۋ ازاماتتارعا جۇعىستى بولسىن, ۇزاعىنان ءسۇيىندىرسىن», دەيدى قاسپاندىق تۇرعىن.
تالدىقورعان قالاسىنداعى «شىعىس» شاعىن اۋدانىندا دا 17 وتباسىنا جاڭا باسپانا بەرىلدى. جاڭا پاتەرگە يە بولعاندار قاتارىندا جەتىم بالالار, مۇگەدەكتىگى بار بالانى تاربيەلەۋشى وتباسىلار, كوپبالالى انالار, تولىق ەمەس وتباسىلار, ەكىنشى دۇنيەجۇزىلىك سوعىستىڭ ارداگەرلەرىنە تەڭەستىرىلگەن ازاماتتار بار. باسپانالى بولىپ جاتقان تۇرعىنداردى قۋانىشتارىمەن قۇتتىقتاۋعا قالا اكىمىنىڭ ورىنباسارى جەڭىس اندابەكوۆ ارنايى كەلىپ, پاتەر كىلتتەرىن تابىس ەتتى.
«كوپتەن كۇتكەن پاتەرىمدى الىپ, ريزا بولىپ جاتىرمىز. مۇگەدەكتىگى بار بالانى تاربيەلەۋشى وتباسى رەتىندە كەزەكتە تۇرىپ, 10 جىلدان اسا ۋاقىت كۇتتىك. مىنە, سول كۇنگە دە جەتتىك. حالىقتىڭ جاعدايىنا اسا كوڭىل ءبولىپ جاتقان قالا باسشىلىعىنا انالىق العىسىمدى ايتامىن», دەدى الميرا زاكاريانوۆا.
وبلىس اكىمى ءباسپاسوز قىزمەتىنىڭ مالىمەتىنشە, وتكەن ون ايدا وڭىردە 247,6 مىڭ شارشى مەتر تۇرعىن ءۇي پايدالانۋعا بەرىلگەن. تالدىقورعانداعى پاتەر كىلتى 5 جەتىم بالاعا, 4 مۇگەدەكتىگى بار بالانى تاربيەلەۋشى وتباسىنا, 3 كوپبالالى اناعا, 2 تولىق ەمەس وتباسىلارعا, ەكىنشى دۇنيەجۇزىلىك سوعىس ارداگەرلەرىنە تەڭەستىرىلگەن 2 ازاماتقا, سونداي-اق اسكەري قىزمەتىن ورىنداۋ كەزىندە قايتىس بولعان ءبىر وتباسىنا تابىستالدى.
جەتىسۋ وبلىسى
