قازاق كۇرەسىنەن الەمدىك سايىس وتكىزۋدەگى ماقسات – قازاق كۇرەسىن حالىقارالىق دەڭگەيدە ناسيحاتتاۋ, الەم ەلدەرىنىڭ اراسىندا سپورتتىق بايلانىستى نىعايتۋ, تۇركى الەمىنىڭ مادەني مۇراسىن تانىتۋ. سالتاناتتى اشىلۋ راسىمىندە ءسوز العان تۇركىستان وبلىسى اكىمىنىڭ ورىنباسارى ەرتاي التاەۆ مەملەكەت باسشىسى جولداۋىندا بۇقارالىق سپورتتى دامىتۋ مەن حالىقتىڭ دەنساۋلىعىن جاقسارتۋ ماسەلەسىنە ەرەكشە كوڭىل بولگەنىن ايتىپ, كەيىنگى ۋاقىتتا وڭىردە سپورت سالاسى قارقىن الىپ كەلە جاتقانىن اتاپ ءوتتى.
«تۇركى الەمىنىڭ رۋحاني استاناسى, قاسيەتتى تۇركىستان تورىندە قازاق دالاسىنىڭ باتىرى, كۇش اتاسى قاجىمۇقان مۇڭايتپاس ۇلى اتىنداعى قازاق كۇرەسىنەن ەرەسەكتەر اراسىنداعى الەم كۋبوگىنىڭ ءوتۋى زاڭدىلىق. قاجىمۇقان مەن قازاق كۇرەسى – ەگىز ۇعىم. قازىر الەمنىڭ 40-تان استام مەملەكەتىندە ۇلتتىق كۇرەسىمىزدەن فەدەراتسيالار قۇرىلىپ, جۇمىس جۇيەلى جۇرگىزىلىپ كەلەدى. بۇگىنگە دەيىن 10 رەت الەم چەمپيوناتى, 12 مارتە ازيا چەمپيوناتى, 6 رەت الەم كۋبوگى, 6 مارتە ەۋروپا چەمپيوناتى وتكىزىلىپ, ءتول كۇرەسىمىز دامۋدىڭ جاڭا دەڭگەيىنە كوتەرىلدى. بۇل ءىس-شارالاردىڭ بارلىعى بۇقارا حالىق اراسىندا سالاماتتى ءومىر سالتىن, ۇلتتىق سپورتىمىزدى ناسيحاتتاۋعا سەرپىن بەرەدى», دەدى ە.التاەۆ.
قاجىمۇقان مۇڭايتپاس ۇلىنىڭ جۇلدەسىنە ارنالعان دودانىڭ باعدارلاماسىنا سايكەس, بالۋاندار 55, 60, 66, 74, 82, 90, 100, +100 كگ سالماق دارەجەسىندە بەلدەستى. ەلىمىزدىڭ ساڭلاقتارى 7 التىن, 5 كۇمىس, 10 قولا مەدال ەنشىلەپ, جالپى ەسەپتە كوش باستاسا, گرۋزيا سپورتشىلارى 1 التىن, 1 كۇمىس, 1 قولا مەدالمەن 2-ساتىعا جايعاستى, ۇشتىكتى 1 كۇمىس, 2 قولا مەدال بۇيىرعان موڭعوليا بالۋاندارى تۇيىندەدى. الەم كۋبوگىندە چەمپيون اتانعان بالۋاندار 500 مىڭ, كۇمىس جۇلدەگەرلەر 300 مىڭ, قولا مەدال بۇيىرعان ساڭلاقتار 200 مىڭ تەڭگە قارجىلاي سىياقى الدى. ءتۋرنيردىڭ ۇزدىك بالۋانى اتانعان اكەجان بىلالوۆكە (66 كگ) ەرەكشە قۇرمەت كورسەتىلىپ, اۆتوكولىك سىيعا تارتىلدى.
