سۋرەت: kazakhstan.travel
ىسكەرلىك ءتۋريزمنىڭ دە تابىس قاينارى ەكەنىن «Kazakh Tourism» ۇلتتىق كومپانياسىنىڭ «MICE – تۋريزم ەلشىسى» باعدارلاماسىن سارالاعاندا انىق كوز جەتكىزەسىز. 2021 جىلدان باستاپ ىسكە قوسىلعان باعدارلامانىڭ ناتيجەسى كوڭىل كونشىتەرلىك. ءتورت جىلدىڭ ىشىندە 40 تۋريزم ەلشىسى تاعايىندالىپ, وسى ءورىستى وركەندەتۋگە ۇلەس قوسىپ كەلەدى. حالىقارالىق قاۋىمداستىق مۇشەلەرى, بيزنەس, عىلىم, مەديتسينا, مادەنيەت سىندى سالالاردىڭ كاسىبي ماماندارى دا, ىزگى نيەت ەلشى رەتىندە, ىسكەرلىك ءتۋريزمدى دامىتۋعا كۇش سالىپ وتىر.
«Kazakh Tourism» ۇك» اق باسقارما توراعاسىنىڭ ورىنباسارى دانيەل سەرجان ۇلى ەلىمىزدى ىسكەرلىك تۋريزم ورتالىعىنا اينالدىرىپ, ماڭىزدى ءىس-شارالاردىڭ ءجيى ۇيىمداستىرىلۋىنا ەلشىلەردىڭ دە تيگىزەر پايداسى زور ەكەنىن ايتادى. الەمدىك اۋقىمداعى 11 ءىرى ءىس-شارانى ەلدە وتكىزۋدىڭ ناتيجەسىندە 6 مىڭعا جۋىق شەتەلدىك دەلەگات كەلىپ, قازىناعا 8 ميلليون اقش دوللارى مولشەرىندە پايدا تۇسكەن.
«MICE-تۋريزم, ياعني ىسكەرلىك ءتۋريزمدى تۇلەتۋ قالالاردىڭ ەكونوميكاسىن نىعايتۋعا ايتارلىقتاي اسەر ەتەدى. ىسكەرلىك ءىس-شارالار ماۋسىمدىق تۋريزمنەن تۇسەتىن پايدانى ەسەلەي تۇسەدى. شەتەلدىك ىسكەر تۋريستەردىڭ ەلىمىزگە دەگەن قىزىعۋشىلىعى جىلدان-جىلعا ارتىپ كەلەدى. ءبىز بۇعان دەيىن ءبىلىم, گەولوگيا, سپورت, تۋريزم, كاسىپكەرلىك سالاسىندا ماڭىزدى الەمدىك ءىس-شارالار وتكىزدىك. وسى شارالاردى ۇيىمداستىرۋعا مەملەكەت قازىناسىنان بولىنگەن قاراجات ەكونوميكامىزعا ءۇش ەسەلەنىپ قۇيىلادى. جالپى كىرىس شەتەلدىك دەلەگاتتاردىڭ قاراجاتى ەسەبىنەن تۇسەدى. ارقايسىسى ءبىزدىڭ ەلىمىزگە كەلگەن كەزدە ورتا ەسەپپەن 1438 دوللار جۇمسايدى. ولار تەك عيماراتتاردى جالعا الۋ, قوناقۇيدە تۇرۋ عانا ەمەس, كولىكتى پايدالانۋ, تاماقتانۋ, باسقا دا قىزمەت تۇرلەرىنە قاراجاتىن جۇمسايدى, ەلىنە كادەسىي ساتىپ الادى. مىنە, وسىلايشا, ىسكەرلىك ءتۋريزمدى تۇراقتى جولعا قويۋ ارقىلى دا تابىس كوزىن اشۋعا بولادى», دەيدى د.سەرجان ۇلى.
كەلەسى جىلى «Kazakh Tourism» كومپانياسى مەن مىسە-تۋريزم ەلشىلەرى تىزە قوسىپ الەمنىڭ 140-تان اسا ەلىنەن دەلەگاتتار كەلەتىن 3 ءىرى حالىقارالىق ءىس-شارا وتكىزۋدى جوسپارلاپ وتىر. سونىڭ ىشىندە كىتاپحاناشىلار ۇيىمدارىنىڭ حالىقارالىق كونگرەسىن ەرەكشە ايتۋعا بولادى. استانا قالاسىندا وتەتىن بۇل كونگرەسكە 4 مىڭعا جۋىق قوناق كەلەدى. 2026 جىلى وتەتىن ترەۆەل بلوگەرلەردىڭ حالىقارالىق جيىنى دا ىسكەرلىك ءتۋريزمنىڭ ءورىسىن كەڭەيتەتىنى انىق.
بيىل دا مىسە-ءتۋريزمنىڭ ەلشىلەرى تاعايىندالىپ, ىسكەرلىك سالانى ورىستەتۋگە كۇش سالماق. حالىقارالىق قاۋىمداستىق مۇشەلەرى, بيزنەس, عىلىم, مەديتسينا, مادەنيەت, ونەر, سپورت سالالارىنىڭ كوشباسشىلارى ەلىمىزدە ىسكەرلىك ءتۋريزمنىڭ قازىعىن قاعىپ, ورتالىعىنا اينالدىرۋعا ۇلەسىن قوسادى. «قازاقستاننىڭ گەوتەحنيكالىق قاۋىمداستىعى» قب باس حاتشىسى بيبىگۇل ءابدىراحمانوۆا ىسكەرلىك ءتۋريزمنىڭ ەلشىسى بولۋ زور جاۋاپكەرشىلىك جۇكتەيتىنىن بايان ەتتى.
«MICE-ءتۋريزمىنىڭ ەلشىسى اتانۋ – مەن ءۇشىن ۇلكەن ابىروي. ءبىز ارىپتەستەرىمىزبەن بىرلەسە 2025 جىلدىڭ تامىز ايىندا قازاقستاندا اۋقىمدى حالىقارالىق كونفەرەنتسيا وتكىزۋدى جوسپارلاپ وتىرمىز. وعان 40 ەلدەن وكىلدەر قاتىسادى. بۇل – ەلىمىزدىڭ تۋريزم سالاسىنداعى كاسىپكەرلەرىنە ىسكەر تۋريستەردى تارتۋعا تاماشا مۇمكىندىك», دەگەن ب.ءابدىراحمانوۆا العاشىندا شارۋا جايىمەن كەلگەن شەتەلدىكتەر كەلەسى جولى وتباسىمەن بىرگە قىدىرىپ كەلۋگە ىنتالى بولاتىنىن ايتتى.
ىسكەرلىك تۋريزم ەلشىسى, جۋرناليست شاڭعىشىلار قاۋىمداستىعىنىڭ (SCIJ) وكىلى اندرەي كۋكۋشكين بيىل ناۋرىز ايىندا جۋرناليست شاڭعىشىلاردىڭ حالىقارالىق دوداسى وتكەنىن اتاپ ءوتتى. «الماتىدا جۋرناليست-شاڭعىشىلار فەدەراتسياسىنىڭ اۋقىمدى باسقوسۋى بولدى. 30-دان اسا ەلدەن 100-گە تارتا شاڭعىشى جۋرناليست «شىمبۇلاقتا», «الاتاۋ» بياتلون كەشەنىندە سايىسقا ءتۇستى. بىرنەشە كۇن قوناق بولعان تۋريست جۋرناليستەر تەك سپورتتىق سايىسقا عانا قاتىسىپ قويعان جوق. ەلدەرىنە بارعان سوڭ قازاقستان تۋرالى, قارلى الاتاۋ بوكتەرىندە سەيىلدەپ ساياحاتتاعانى تۋرالى جازدى, كوپشىلىكتى قۇلاعدار ەتتى. ولاردىڭ اراسىندا ەلىمىزگە العاش تابانى تيگەندەرى دە بار. ەرەكشە اسەرلەنىپ, تابيعاتىمىزدىڭ تاماشا تارتۋىنا تاڭداي قاقتى. قايتا اينالىپ, قايىرا قىدىرىپ كەلەتىنىن ايتتى. ءبىز جۋرناليست شاڭعىشىلاردىڭ الەمدىك باسقوسۋىن العاش ۇيىمداستىرىپ, ەلىمىزدىڭ تۋريزم ورىسىندەگى الەۋەتىن ايگىلەدىك», دەدى ا.كۋكۋشكين.
«ىسكەرلىك ءتۋريزمنىڭ ەلشىلەرى باس قوساتىن شارا جىل سايىن ۇيىمداستىرىلىپ, داستۇرگە اينالدى. بيىل دا استانا قالاسىنداعى باسقوسۋدا ەڭسەرگەن شارۋانى تياناقتاپ, كەلەشەكتە جۇزەگە اسۋى ءتيىس جوسپارلاردى پىسىقتاپ, وي-پىكىر الماسىپ, تاجىريبەمىزدى بولىستىك. ەلىمىزدەگى بيىلعى اۋقىمدى دودا V دۇنيەجۇزىلىك كوشپەلىلەر ويىندارى بولسا, ودان بولەك تە, ءار سالادا حالىقارالىق ءىس-شارا ءوتتى. مۇنىڭ بارلىعى ىسكەرلىك ءتۋريزمنىڭ قارقىن الىپ كەلە جاتقانىن اڭعارتادى. تۋريزم ەلشىلەرى ەلىمىزدە وسىنداي اۋقىمدى جوبالاردىڭ جۇزەگە اسىرىلۋىنا سەبەپكەر بولادى, جەتەكشىلىك ەتەدى. «Kazakh Tourism» كومپانياسى ەلىمىزدە جوبا ۇيىمداستىرۋعا ىقىلاستى جاندارعا ۇنەمى قولداۋ كورسەتىپ كەلەدى», دەيدى د.سەرجان ۇلى.
ۇقساتا بىلگەنگە ىسكەرلىك تۋريزم – تابىستىڭ قاينار كوزى. ەلىمىزدىڭ مەگاپوليستەرىندەگى قوناقۇيلەردە كەيدە شەتەلدەن كەلگەن مەيماندار قاتارى كوپ بولادى. سولاردىڭ دەنى ءتۇرلى ءىس-شارالارعا قاتىسۋشى دەلەگاتتار. دانيەل سەرجان ۇلى تەك ءىرى قالالار عانا ەمەس, وبلىس ورتالىقتارىنا دا ىسكەرلىك ءتۋريزمدى ورىستەتۋگە بولاتىنىن ايتادى.
«وبلىس ورتالىقتارىندا ىسكەرلىك ءتۋريزمدى دامىتۋ قارقىن السا, تۇسەتىن پايدا دا ارتارى ءسوزسىز. مىسالى, تۇركىستان قالاسىنا تۋريستەر كۇز, كوكتەم مەزگىلىندە جازداعىداي جاپپاي كەلە بەرمەيدى. وسى كەم-كەتىكتى كۇزدە وتەتىن مارافون دوداسى ايتارلىقتاي بۇتىندەپ وتىر. بيىل قازان ايىندا تۇركىستان حالىقارالىق مارافونىندا (Turkistan international marathon) ەلىمىزدەن, الىس-جاقىن شەتەلدەن 3 مىڭعا تارتا قاتىسۋشى جۇگىردى. ولاردىڭ كوپشىلىگى جالعىز كەلمەيدى. ءبىرىنىڭ دوسى, تۋىسى, جولداسى, جارى دەگەندەي, قاسىنا ەرىپ جۇرەدى. مىنە, ءسويتىپ ءبىر كۇندىك شاراعا كەلگەندەر قالانىڭ قوناقۇيلەرىنە قىرۋار قاراجاتىن شىعىندايدى, اۋقاتتانادى, قىدىرادى, كولىك قىزمەتىن پايدالانادى. مۇنىڭ بارلىعى دا – قارجى, پايدا», دەيدى باسقارما توراعاسىنىڭ ورىنباسارى.
ىسكەرلىك ءتۋريزمدى تۇلەتۋ ەل قازىناسىنا قۇيىلار قارجىنى مولايتاتىنى قاشاندا قاپەردە بولعانى ءجون.
