تۋريزم جىلى جوباسىنىڭ جابىلۋ راسىمىنە ەلىمىز بەن قىتايدىڭ تۋريستىك يندۋسترياسىنىڭ 300-دەن اسا وكىلى قاتىستى. اتاۋلى جىل ىشىندە قحر-دىڭ ءتۇرلى قالالارىندا 30-دان اسا ءىرى ءىس-شارا وتكىزىلدى, ەكى ەلدىڭ كومپانيالارى مەن ۇيىمدارى اراسىندا 200-دەن اسا كەلىسىمگە قول قويىلدى. ىسكەرلىك, مادەني ميسسيالار تۋريستىك, مادەني الماسۋلاردى دامىتۋعا, ەلىمىزدىڭ تارتىمدى تۋريستىك باعىت رەتىندەگى پوزيتسياسىن نىعايتۋعا ىقپال ەتتى. ناتيجەسىندە, كورشى ەلدەن كەلەتىن تۋريستەر سانى الدىڭعى جىلدارمەن سالىستىرعاندا شامامەن 50%-عا ارتتى.
«بيىلعى جىل ەلىمىز بەن قىتايدىڭ تۋريزم سالاسىنداعى ءوزارا ءىس-ارەكەتىنىڭ ايتارلىقتاي كەڭەيۋىمەن ەرەكشەلەندى. ەكى ەل اراسىنداعى تۋريستىك اعىن ەلەۋلى ءوسىمدى كورسەتتى. بۇل ءبىزدىڭ تاتۋ كورشى ەكەندىگىمىزدى, ءوزارا تۇسىنىستىك پەن مادەني الماسۋعا دەگەن ورتاق ۇمتىلىسىمىزدى كورسەتەدى», دەدى تۋريزم جانە سپورت ءمينيسترىنىڭ ورىنباسارى ەرجان ەركىنباەۆ.
شەكارا قىزمەتىنىڭ دەرەكتەرىنە سايكەس, وتانداستارىمىزدىڭ قىتايعا ساپارى – 31%, ال قىتايدان ەلىمىزگە كەلگەن مەيماندار قاتارى 50%-عا ءوستى. بيىلعى جىلدىڭ العاشقى ون ايىندا 400 مىڭ وتانداسىمىز قىتايعا باردى. قىتايدان ەلىمىزگە 550 مىڭعا جۋىق ادام كەلسە, بىلتىر 367 مىڭ ادام كەلگەن ەكەن. دەمەك بۇل كورسەتكىش تە ەكى ەلدىڭ ءبىر-بىرىنە دەگەن قىزىعۋشىلىعى ارتا تۇسكەنىن, تۋريزم جىلى اياسىندا جۇزەگە اسىرىلعان جوبالاردىڭ جاقسى ناتيجە بەرگەنىن كورسەتەدى.
بيىل بەيجىڭ, سيان, شانحاي, گونكونگ, ءۇرىمشى قالالارىندا ەلىمىزدىڭ قالالارى مەن وبلىستارىنىڭ تۋريزم كۇندەرى ءوتىپ, ءبىزدىڭ ەل 4 تۋريستىك كورمەدە (COTTM, ITB China, ITE Hong Kong, قىتاي مەديتسينالىق تۋريزم جارمەڭكەسى) ۇسىنىلدى. شاندۋن, حەبەي پروۆينتسيالارىندا ەكى ۇلكەن كونتسەرت ءوتتى. تيانتسزين قالاسىندا ۇيىمداستىرىلعان «التىن ادام», « ۇلى دالا» كورمەلەرىندە ۇلتتىق مۋزەيدىڭ كوللەكتسيالارىنان ەكسپوناتتار ۇسىنىلدى.
سونداي-اق مادەني-اقپاراتتىق ءىس-شارالارمەن قاتار اۋقىمدى جوبالار دا ۇيىمداستىرىلدى. ماسەلەن, «جىبەك جولى» اۆتوكەرۋەنىنە, Peking-Paris Motor Challenge رالليىنە, جىبەك جولى بويىمەن ءجۇرىپ وتكەن موتوتۋرعا 500-گە جۋىق ادام قاتىستى. قىتايدىڭ ءىرى مەديا كورپوراتسيالارى ەلىمىزدىڭ تۋريستىك الەۋەتىن بەلسەندى تۇردە ناسيحاتتادى. قحر-داعى قازاقستان ءتۋريزمى جىلىنىڭ جالپى مەديا ناتيجەسى 1,8 ملرد قارالىمعا جەتسە, الەۋمەتتىك جەلىلەردە ەلىمىز تۋرالى جاريالانىمداردىڭ قامتىلۋ دەڭگەيى 160 ملن پايدالانۋشىنى قۇرادى. قىسقاسى, تۋريزم جىلىنىڭ ناتيجەسى ساياحاتشىلارعا جاڭا كوكجيەكتەر اشسا, تۋريستىك يندۋستريا وكىلدەرىنە سەرىكتەستىك بايلانىستاردى كەڭەيتۋگە مۇمكىندىك بەردى. ەكى ەل اراسىندا اۋە قاتىناسى ەداۋىر ۇلعايدى. تىكەلەي, چارتەرلىك رەيستەر ەلىمىزدى قىتايدىڭ نەگىزگى قالالارىمەن بايلانىستىرىپ, ساياحاتتاۋ اياسىن كەڭەيتتى.
كەلەر 2025 جىل قازاقستانداعى قىتاي ءتۋريزمى جىلى بولىپ بەلگىلەندى. بۇل كەلىسىم ەكى مەملەكەت باسشىلارىنىڭ بىرلەسكەن ءباسپاسوز ءماسليحاتىندا رەسمي تۇردە جاريالاندى. ساراپشىلاردىڭ پىكىرىنشە, اتالعان ءىس-شارا ەلىمىزدە تۋريستىك سەگمەنتتىڭ جاڭا بەتتەرىن اشپاق. دامىعان ەلدەردە توپتىق تۋرلار وتكەننىڭ ەنشىسىنە اينالىپ ۇلگەردى. قازىر سمارتفونعا جۇكتەلگەن جول نۇسقاعىشپەن جەكە ساياحاتتاپ جۇرگەن شەتەل ازاماتتارىن كوپتەپ كەزدەستىرۋگە بولادى. دەمەك كەلەر جىلى IT يندۋسترياسىنىڭ تۋريزم سەگمەنتىنىڭ جۇگىن جەڭىلدەتەتىن باعدارلامالارى ۇيالى تەلەفوندارعا جۇكتەلەدى دەگەن ءۇمىت بار.
قحر-دىڭ الماتىداعى باس كونسۋلى تسزيان ۆەي حانىم قىتايدا تۋريزم جىلى جاريالانعان ساتتەن باستاپ مادەني, تۋريستىك باعىتتاعى ءتيىستى ۇيىمدار قوناەۆ, تۇركىستان سياقتى قالالاردا كوپتەگەن ءىس-شارا وتكىزگەنىن ايتتى. ۇلى جىبەك جولى بويىندا جاتقان وڭىرلەرگە ەرەكشە نازار اۋدارىلعانىن اتاپ ءوتتى.
«2025 جىلى قازاقستان قىتايدىڭ تۋريزم جىلىن قابىلدايدى. ءبىز قحر-داعى كوپتەگەن تۋريستىك ونىممەن, تانىمال باعىتپەن تانىستىرۋدى جوسپارلاپ وتىرمىز. ماقساتىمىز – ەكى ەل اراسىنداعى ءوزارا تۇسىنىستىكتى نىعايتىپ قانا قويماي, ىنتىماقتاستىعىمىزدى جاڭا دەڭگەيگە شىعارۋ», دەدى باس كونسۋل.
فورۋم, سايىپ كەلگەندە, اتقارىلعان جۇمىستاردى قورىتىندىلاۋدىڭ, سونداي-اق ىنتىماقتاستىقتى ودان ءارى نىعايتۋدىڭ ماڭىزدى ءىس-شاراسىنا اينالدى. 80-گە جۋىق قازاقستاندىق جانە قىتايلىق تۋروپەراتور ىسكەرلىك بايلانىستاردى نىعايتۋ, ارىپتەستىك ورناتۋ ماقساتىندا B2B كەلىسسوزدەر جۇرگىزدى.
«Kazakh Tourism» ۇلتتىق كومپانياسىنىڭ باسقارما توراعاسى قايرات سادۋاقاسوۆتىڭ ايتۋىنشا, قازىر الەمدىك تۋريستىك يندۋستريا قىتايدىڭ جەكە ساياحاتشىلارىنىڭ ىنتا-ىقىلاسىن تۋدىرۋعا كۇش سالىپ جاتىر. ەلىمىزگە كەلىپ كەتكەن قىتايلىق تۋريست ورتاشا ەسەپپەن 1000 دوللار جۇمسايدى.
«بىراق Mastercard اقپاراتىندا 573 دوللار ەكەنى ايتىلدى. بۇل جەردە Mastercard مالىمەتتەرى وسى كارتاعا يە پايدالانۋشىلاردى عانا ەسكەرەتىنىن اتاپ وتكەن ءجون. باسقا ساراپشىلاردىڭ ايتۋىنشا, قىتايلىق تۋريستەردىڭ جارتىسىنان استامى (57%) سومانىڭ كوپ بولىگىن قولما-قول اقشامەن جۇمسايدى. سوندىقتان تۋريستەردىڭ ناقتى شىعىستارى Mastercard ۇسىناتىن دەرەكتەرگە قاراعاندا ەداۋىر جوعارى دەپ سانايمىز. ورتا ەسەپپەن العاندا قىتايلىق تۋريستەر ەلىمىزدە 4 كۇننەن 7 كۇنگە دەيىن بولادى: تۋريستەر 5-7 كۇنگە كەلەدى, ال قىسقا مەرزىمدى جۇمىس ۆيزاسىمەن كەلگەن قوناقتار 3-4 كۇننەن كەيىن قايتادى», دەيدى «Kazakh Tourism» باسشىسى.
قحر-داعى قازاقستان ءتۋريزمى جىلى تۋريزم سەگمەنتىنىڭ جاڭا دەڭگەيىن, ديپلوماتيالىق قىرىن تانىتتى. بەينەلەپ ايتار بولساق, رەسمي ديپلوماتيانىڭ اياعى جەتپەگەن جەرگە ءتۋريزمنىڭ جەتەتىنىن دالەلدەدى. ينفراقۇرىلىمنىڭ جوعارى دەڭگەيى, تۋريستىك مەنەدجمەنتتىڭ دامۋى جاعىنان قىتايدىڭ تۋريزم يندۋسترياسى كوپ ەلگە ۇلگى بولا الادى.
قازىر ەلىمىزدە رەسپۋبليكالىق دەڭگەيدە كولىك ينفراقۇرىلىمىن دامىتۋعا قاجەت قاراجات قاراستىرىلىپ جاتىر. بۇل قاراجات ەسەبىنەن 18 مىڭ شاقىرىمنان استام جول ءتيىستى جوندەۋ, قايتا سالۋ جۇمىستارمەن قامتاماسىز ەتىلەدى. مەملەكەتتىك كەپىلدىكپەن بەرىلەتىن قارىزدار ەسەبىنەن رەسپۋبليكالىق ماڭىزى بار اۆتوموبيل جولدارىنىڭ 10 تورابى رەكونسترۋكتسيالانادى. 7292 تەمىرجول ۆاگوندارى جىلجىمالى قۇرامىنىڭ پاركى جاڭارتىلادى.
«قىتايمەن اراداعى ءتۋريزمدى دامىتۋدىڭ ساراپتالعان ستراتەگياسى, وڭىرلەردىڭ قانشا تۋريست قابىلداۋ مۇمكىندىگى بار ەكەندىگى تۋرالى ناقتى جوسپار بولۋى كەرەك. ينفراقۇرىلىمعا قاتىستى ماسەلەلەر مەملەكەتتىك دەڭگەيدە زەردەلەندى. ءار وبلىستار مەن قالالاردا مامانداندىرىلعان گيدتەردى كوپتەپ دايىنداۋ, ترانسفەرلەردىڭ جەتىسپەۋشىلىگى ماسەلەسىن شەشۋ, ساۋدا ۇيلەرىن دايىنداپ, ماركەتينگتى كەڭەيتىپ, ەلىمىزدىڭ ءوز برەندىن جاساۋدى قولداۋ قاجەت», دەيدى ق.سادۋاقاسوۆ.
فورۋم بارىسىندا وعان قاتىسۋشىلار ايگىلى ءانشى ديماش قۇدايبەرگەننىڭ «كيەلى مەكەنىم» انىنە جازىلعان جاڭا كليپىن تاماشالادى. تۋعان ەل تۋرالى پاتريوتتىق كومپوزيتسيا ەلىمىزدىڭ كورىكتى جەرلەرىن كورسەتەدى. كورەرمەندەر كورنەكتى تۋريستىك ورىندارعا ۆيزۋالدى ساياحات جاساي الادى. ونىڭ ىشىندە شارىن شاتقالى, كولساي كولدەرى, اقمەشىت ۇڭگىرى, ازىرەت سۇلتان مۇراجاي-قورىعى, بوزجىرا شاتقالى, تورىش القابى ءتارىزدى بىرەگەي ورىندار بار. بەينەباياندا بۋراباي, كاتونقاراعاي, التىنەمەل, جوڭعار الاتاۋى ۇلتتىق پاركتەرىنىڭ كادرلارى دا كورىنىس تاپقان.
سالتانات سوڭىندا تاراپتار اراسىندا بىرقاتار ىسكەرلىك مەموراندۋمعا قول قويىلدى.
الماتى
